那年，我為左發達去左做全職義工。: 《 8 發動技能2 》

「喂！你係到做咩！」係一把女人聲，隻白貓一聽到呢個女人吼叫， 早已走得遠遠。

可惡，到底係邊個，我回頭，見到一個中年婦人，中等身型，長頭髮，個樣有d似李私煙。佢一邊行埋嚟一邊用佢夾硬提高8度既聲線質問我：「你喺度做乜嘢？」

「我餵貓囉。」我簡短地回答佢，因為似乎佢係一個難搞既麻煩人物，我都係盡快脫身為妙。

「餵貓？我未見過你嘅？你係到住架？」

我心諗「做乜鳩呀而家？差佬咩？」但係我實在唔想同佢糾纏落去，所以答佢「係呀！平時我阿媽餵開，佢返咗鄉下，所以今晚我餵。哈哈！原來都咁晏，我返去先啦聽朝仲要返工。你慢慢啦！」





講完我想轉身急步走，點知佢竟然捉住我隻手「咪走呀你！古古怪怪！都唔知係咪想毒貓！哦！前幾日黃仔唔見咗肯定係你做㗎啦！你收埋左佢去邊快啲交返出嚟！」

屌你！咩野黃仔呀！呢條友係咪痴線架！為咗唔想刺激佢我當然冇咁講出嚟，我只係一味話「我真係唔知呀我幫我阿媽餵貓咋」

「幫你媽餵？咁邊個係你阿媽？」

「我阿媽咪我阿爸個老婆囉！我真係要走啦！明天返早呀！」天呀！仲想點？放手啦！我其實好想fing開佢隻手，但呢d情況一郁，通常蝕底嗰個都係男人，佢屈你非禮你都有排煩，而且以佢個八婆格，絕對做得出，所以我盡量避免同佢爭拗。我慢慢向後幾步想同佢拉開距離，呢個時候佢喺佢個環保袋拎咗部三叔出嚟，八婆變身成狗仔隊mode「你唔好諗住走呀！你解釋清楚先！」，我用另一隻手遮住自己，雖則話三叔拍片蒙啫，都費事比佢影到。

佢見我唔反駁，佢更咄咄逼人「你身無屎點解唔解釋清楚？你話幫阿媽餵，你阿媽係邊個？叫咩名住邊？」





「我無必要答你， 你又唔係警察。我答左你，你信就信唔信就算」去到呢一刻，我都扯扯地...火

「我就係唔信你！你話阿媽餵開？餵開會餵偉+？你唔知食偉+會食死貓㗎？」佢變本加厲越來越大聲
屌你咩！偉+會食死貓，我見高登仔攞嚟撈飯都係咁，你估真係高登仔百毒不侵咩？「我唔知呀！阿媽無交帶落！你好放手啦！我唔想同你再爭論落去」

呢場爭執已經引起左屋邨保安既注意，有一個肥肥地好似鄭則仕既阿叔行過嚟問：「你地咩事架？」

「無野呀！我餵貓既時候同呢位姨姨有d誤會」

「誤會你個頭！佢講大話！我見佢鬼鬼鼠鼠喺度裝裝下，都唔知係咪落毒想毒貓！心腸咁差既d人！比我發現咗佢仲想走！」個八婆既五官已經唔係佢本來嘅位置，戚晒眼歪晒咀咁，個樣仲嚴峻過李志剛。





「唉！你要我點講你先至信！」我已經有氣無力咁答佢

「使唔使幫你地報警？」肥佬保安問

「好呀！報警拉左呢個人渣就啱」個八婆高聲叫囂
唉！報咗警又攪一大輪！但係咁落去都唔係辦法，唯有真係要報警。

「等一等先，誤會嚟咋！」身後突然傳來女性聲線，將眼前困局打開。我回頭睇睇到底係邊個....