那年，我為左發達去左做全職義工。: 《 7 發動技能 》

要捉貓首先要知邊到多貓易捉，而且最好係屋企附近，咁我會多啲時間埋伏。

我加入咗好多流浪動物同義工群組，睇下邊到多貓出沒。搵咗一陣， 果然皇天不負有心人，我見有個義工po夜晚餵貓既相出嚟攞光環，我認得，地點就係隔離既屋邨。

事不宜遲，落街買返幾罐貓糧今晚半夜行動！12點左右，我帶埋係超市買個3罐偉+出發過隔離邨。去到屋邨近山邊既花叢，我見到有幾個空既膠兜，有一個仲有隻小強係上面，好肯定係義工前一晚餵完貓嚟。

「頂你，餵完又唔清潔掛住影相攞光環，抵你地d義工比人屌」口係咁講，心入邊我只係諗緊我一陣係咪都要影下相攞下光環呢？我急不及待打開傳說中可以撈飯既偉+，又真係幾香喎！聞聞下差d想試一啖。

「冷靜d！快快手捉完返屋企食營多啦！」我放低罐偉+，行返開幾步，坐係近餵貓位置1米左右既花叢邊等候時機。





一坐就坐咗3個字，完全唔見有貓出嚟。

「唔通我坐得太近？」等我坐遠d試下，我慢慢向左移，係距離2米左右既位置繼續守候。等下等下又過咗半個鐘，仍然一d動靜都無，我雙腳就比蚊咬到一撻撻。

「早知噴定蚊怕水先落嚟，今日都係返歸把啦，聽日再戰！罐偉+就當係見面禮啦！」

我企起身掃下對腳準備返屋企既時候，聽到花叢傳出沙沙聲，我順住聲音來源望去，竟然，有！貓！呀！

仲係一隻白貓嚟，雖然佢既白毛已經明顯有流浪嘅痕跡，早已被泥塵沾污，但係黑暗中仍然係咁耀眼。





「機會嚟啦！等佢放鬆警戒我就落手！」佢面對眼前既偉+，好快就放底戒心，大口大口咁食，我慢慢嘗試接近，佢都完全冇逃走嘅意思，就係我將要接觸到佢嘅時候...