Milan: 唯有杜康

我一邊揼，家姐就一路飲。 我好死唔死問咗句：「今日做咩咁靜，你平時好多嘢講㗎」
 
家姐無即時答我，但係就將淨低嘅啤酒一口氣隊哂入口，跟住講咗句：「條仆街今日嚟咗舖頭。」
 
個下我就知問錯問題，但係反正唔問都問咗，索性問下佢吔嘅關係依家點
 
我：「佢無搞搞震滋擾你啊嘛？佢想點啊…翻撻？不過應…」
 
家姐揮一揮手，緊閉著眼，輕輕敲著額頭，然後攤大手板。
 


我：「做乜？」
因為我幫家姐揼膊頭嘅時候都係企住響度，方便出力。所以家姐擰頭仰首望著我，淨係講咗一個字：「酒」
 
呢個時候家姐雙頰微紅，顯然已有酲醉之意。於是我響佢個額頭打了個爆栗：「仲飲？唔使返工啊？聽日斷片你就知味道。」
 
家姐微嗔道：「啊由細到大你都係咁㗎喎，放鬆少少啦I am not a Puritan」說完抿了抿嘴，從下而上斜視著我。
 
大姐啊唔好咁望我啦，我都係為你著想咋
 
由細到大，我都係比較循規蹈矩，父母叫我讀書就讀，又無乜參加課外活動，摺到無人有。


相比之下，家姐都係放得開個個，鍾意試新嘢，有主見。佢想做嘅嘢基本上無咩人阻止到佢（所以有時我都會諗佢無誤入歧途真係萬幸）
 
響外人眼中佢都幾男仔頭，響我眼中佢簡直係我個阿哥咁濟。如果有「姊代兄職」呢個詞，形容佢就最貼切。
 
不過直至家姐出嚟做嘢之前，我時不時都會見到家姐溫柔嘅一面
 
例如氹我嘅時候、逗我嘅時候、鼓勵我嘅時候…
 
仲有失戀嘅時候
 


其實老豆同阿媽知唔知嘅呢？響早出晚歸嘅佢地眼中，家姐大概就只剩低男仔頭嘅一面。
 
「喂，做乜靜哂？男人老狗唔係比我話一話就嬲啊嘛？」家姐繼續仰首望著我
 
我望一望佢對眼，瞳孔中好似望到呆若木雞的自己
 
家姐依舊紅都面哂，睇嚟唔比佢飲酒係一個正確嘅選擇
 
「捏…」家姐望著我，突然伸手狠狠地捏咗捏我塊面
 
「做咩呆哂，唔好停手」跟住指一指自己嘅膊頭，好似老細落order咁「繼續幫我揼」
 
大概係響連鎖時裝店度做sales，儲埋儲埋唔少氣吧。不過你話我偏心都好，家姐即使係扮老細咁嘅款，一樣都係咁正。
 
我望一望佢裙下嘅黑絲。昏黃燈光下，纖穠合宜嘅雙腳被緊緊包裹著，只餘下輪廓。翹起的小腿緩緩擺盪。默默數過，大概每盪一下，我個心就跳咗三下。


嗯，依個look有種御姐嘅感覺，我如是想。
 
不過頭先比家姐望一望，個心差啲skip錯beat。今晚搞乜撚嘢，明明我又唔係飲酒個個。大概係因為有一排無比家姐咁望過啩。以前中學時家姐同我親密好多，而家要返工就無咁多相處時間啦…
 突然間我好似明白點解中學時自己完全無追女仔嘅慾望。