越界的姐弟戀（甜）: 結局篇- 第四章：威逼（四）

晚上六時四十：

我驚慌哋：「弊！唔通…..」我心中冒出一個令人擔憂嘅情況。

我慌忙哋拎起電話打比詩晴：「喂，詩晴，我係Michelle 細佬呀」

詩晴：「我知，咩事」

我：「我家姐今晚係咪約咗你出去？」



詩晴：「無wo，我哋都無約出街」

聽完後，我直接掛斷電話，然後立即打比家姐：「家姐，你係邊啦？」

家姐支支吾吾：「咪…約咗詩晴囉…地鐵好嘈…唔講啦」

家姐明明就無約到詩晴…點解…點解要講大話。而此刻我內心嘅不安感愈嚟愈强烈。因為我知道家姐係從來唔會講大話呃我，佢講得一定有啲咩特別原因係唔想比我知。

我左思右想，腦海諗咗幾個線索：



（1）家姐今日日頭心不在焉，好似有心事

（2）家姐平時出街都會打扮下，但今日卻無咩打扮，感覺似係被迫出去

（3）家姐見嘅人一定唔想比我知，咁對方一定係男嘅，而最大可能得兩個，Michael and Simon。

（4）經過頭先婉婷嘅爆料，Simon嘅可能性最大

整理完出嚟，我猜測係Simon用琴晚嘅情況嚟威脅家姐！



我緊張哋問婉婷：「你係咪有Simon電話」

婉婷點點頭。

我：「幫我試探下佢好無…求下你…」

婉婷約隱都估到發生咩事，係我指導下婉婷打比Simon：

Simon唔耐煩：「你又想點？如果你想講琴晚件事，我講聲Sorry ok？」

Simon呢一刻期待緊同家姐嘅約會，完全無心機理婉婷。

婉婷：「係關於琴晚啲相，我諗清楚啦，我可以比你」

Simon：「哈哈，做咩轉晒態，琴晚唔係好强硬嘅咩？」



婉婷：「我想得到家明！」

Simon：「哈哈，唔洗你啦，只要過咗今晚Michelle都已經會屬於我！」

婉婷：「你咩意思…」

未等婉婷講完，Simon已經直接收線。而從頭先Simon最尾果幾句，我已經好肯定家姐係出緊去見Simon。

晚上七時：

此刻嘅我心急如焚，一定要快啲搵到家姐，如果唔係……我唔敢再諗落去…….

婉婷內心充滿罪惡感，如果唔係佢，件事都唔會搞到咁：「咁點好…再唔搵到Michelle，都唔知Simon會對你家姐做啲咩…」



究竟有咩方法可以搵到家姐…我腦海一片混亂…完全唔知要點做…

婉婷：「呀…你家姐用咩手機？」

我：「IPhone呀」

婉婷靈機一觸：「我之前唔見過部iPhone ，最後都係靠Find My IPhone 搵返…」

果然一言驚醒夢中人，由於家姐係3c 產品白痴，佢部IPhone 啲嘢都係我幫佢setting，所以我自自然然知道家姐嘅apple id。

我十分激動，因為如果唔係婉婷嘅提點，我仲係手足無措，我激動咁講：「婉婷，多謝你呀！」

我立即用家姐嘅apple id登入i cloud，尋找家姐部iPhone 嘅定位 - 九龍餐廳！