越界的姐弟戀（甜）: 第九部 - 第四章：疑問

經過我呢兩日又氹又錫下，我同家姐嘅關係終於回復返正常。而婉婷咁嘅舉動，的確令我有少少不爽，但由於我同家姐嘅關係喺秘密，唔能夠明講，所以點都要諗啲方法去令婉婷死心。

星期一早上返到課室：

我行去婉婷位置：「婉婷，前日唔好意思呀，咁突然走咗去，而且嗰時打比問你嘅語氣又重咗少少」

婉婷微笑：「唔緊要呀，我都知你緊張你家姐，唔會介意～」

我：「我明明傷過你一次，點解你仲會繼續對我咁好…」



婉婷：「我鍾意你…唔會介意你點對我…雖然我唔知你而家鍾意嗰個人係邊個…但我會一直等你架…」

我：「其實你咁靚又溫柔，會搵到個比我更好架…」。

婉婷搖一搖個：「總之我會等你。我唔會騷擾你架…繼續當我係普通朋友就得～」

情場新手，面對呢啲問題，我都唔知點應付好，所以淨係應咗聲：「嗯」

第一節小息：



去廁所時，我撞見Michael，而Michael一見到我即往後跳遠三尺，驚我好似會打佢咁。但Michael就好似心事重重咁，忍唔住開口：「Michelle 細佬呀？」

我：「有咩貴幹？」

Michael ：「我講清楚先，我真係唔會再搞你家姐，但有啲嘢真係好奇怪」

我：「有咩奇怪？」

Michael：「嗰時我真係收到你家姐嘅WhatsApp叫我去你哋樓下等佢，但你家姐又話無send過比我，唔通我手機撞鬼？」



我：「我家姐話無就係無，點知你點解會收到」

Michael：「咁無嘢啦，但我重申一次，我真係唔係有心騷擾你家姐，因為我真係鍾意佢。不過既然你家姐講到明唔鍾意，再加上上次發生咁嘅事，我以後絕對唔會再打搞你哋！」

Michael講完就走，而同時佢心裡產生一個疑惑，覺得一定係有人從中作梗。

我都比Michael呢番說話嚇親，雖然佢外表係好MK，但係講呢番說話果時嘅語氣，卻比人一種好認真，好Man嘅感覺，所以我都暫時選擇相信佢。

聽完Michael講完後，果時浮現嘅第一個想法係，會唔會婉婷從中搞鬼呢？但我內心又極唔願意相信會係婉婷…

第二節小息：

正所謂「三個臭皮匠，勝過諸葛亮」，我搵下三個老死睇下佢哋嘅諗法。

我：「女仔被飛，係咪會產生好大嘅報復心理？」



口水佬：「會啦，女人天生心狠毒辣，被人飛實憎死條仔啦」

豬肉榮：「真，寧得罪小人，莫得罪女人呀」

豪仔：「屌，上得連登多？」

我：「喂，我認真問架」

口水佬：「你唔會係講緊婉婷呀嗎？」

我：「唔係呀，幫朋友問炸」

豬肉榮：「扮咩，你的朋友就是你」



豪仔：「但婉婷都唔似係嗰種攻心計嘅女仔啦，咁pure」

我：「咁又係…」

口水佬：「捉到你啦，仲唔係講你自己？」

我：「妖，我都係是但問下，唔好ff咁多，上堂」

豬肉榮：「妖，成日講啲唔講啲」

不過豪仔都講得岩，婉婷真係唔似會做呢啲嘢，可能真係我諗多咗。

與此同時，家姐課室：

自從無咗Michael搞搞震後，Simon變得更主動。



Simon：「Michelle，仲有一個月就考Mock，不過我哋由而家開始，每日放學抽啲時間一齊做past paper好無」。

家姐：「唔啦，我真係習慣自己一個人溫書」

Simon：「多個人一齊拆題，溫起嚟更快手」

家姐：「我會搵我細佬幫手，佢本身成績都唔錯」

Simon壓抑住內心不爽嘅心情，強顏微笑住：「咁好啦」

Simon拳頭一握，心諗：「點解連一次機會都唔比我！等我搵到證據，到時候，你哋兩姐弟就等住玩完」