越界的姐弟戀（甜）: 第九部 - 第二章：三角關係（二）

返到課室後，三個老死都圍過嚟。雖然三個老死平時嘻嘻哈哈，把口又衰，但都識分場合同時間。

豪仔：「無嘢呀嘛？」

豬肉榮：「記得唔好將啲嘢收埋收埋，唔怕同我哋講wo 」

口水佬：「真，巴打們都撐你！」

我：「有心啦你哋三個，我而家心情已經好返好多啦」



豪仔：「不如星期六出去唱K啦，當relax下心情，加埋我哋都好耐無唱啦」

口水佬搭住我膊頭：「阿明，一於咁講啦！」

盛情難卻，何況唱下K的確可以宣洩下情緒。而我們討論嘅時候，婉婷夾岩都聽到。

婉婷：「喂，你哋係咪星期六去唱K？」

豪仔：「係呀」



婉婷：「我又去」

豬肉榮佢地望住我，期待我嘅回應。咁人哋出到聲，又無理由拒絕嘅…

我：「好呀，一齊去囉」

放學時，我同家姐提起呢件事：

我：「家姐，今個星期六豬肉榮佢哋約我去唱K…家姐你一唔一齊去？」



家姐：「你哋全部男…我唔去啦～」

我尷尬：「我哋傾果時，夾岩婉婷聽到，佢又話跟住去…」

家姐：「咁我都去」

我：「家姐擔心我呢～？」

家姐：「哼」

如是者，嚟到星期六：

因為同班咸濕仔出去，我唔想家姐比佢地睇蝕，所以家姐係我嘅強烈「推薦」下，淨係著咗普通T-shirt長褲。

我哋約咗7點旺角嘅Mr. Way等，但婉婷話會遲少少嚟，所以我哋開房唱住先。



而過咗無耐，K房門被打開，一名青春可人嘅少女行入嚟，呢位少女正係婉婷。婉婷著住件小性感露肩上衣而下身則係一條牛仔小短裙，呢一身再現上一對小白鞋，誘人得嚟又帶啲可愛，完全就係gfable。

因為三個老死都未見過婉婷化妝出街嘅look，而呢個巨大嘅視覺衝擊，睇到佢哋口水都流出來。

口水佬細聲同豪仔&豬肉榮講：「嘩…完全無諗過婉婷係咁正…」

豬肉榮：「阿明點解咁幸福…」

豪仔：「真係估唔到…」

我見佢地望到眼直直：「喂，唔好咁丟架啦好嗎」

家姐都好識大體嘅：「婉婷，過嚟呢邊坐底啦」。



婉婷坐底後，口水佬：「阿明，仲唔問下人哋要點咩歌？」

婉婷：「唔洗啦，我唱歌唔好聽，我聽你哋唱得啦～」

家姐：「我都唔唱架，我可以陪下你」

之後我就同三條強散盡情高歌，而家姐同婉婷就係到傾計。

婉婷：「阿明家姐，你知唔知阿明點解會同我分手？」

家姐：「細佬佢無同我講太多…」

婉婷：「佢話佢有更鍾意嘅人…」

家姐：「係咩…」



婉婷：「你知唔知係邊個…」

家姐：「細佬無同我講呢啲…」

婉婷：「咁你覺得我仲有無機會同阿明係返埋一齊…？」

家姐：「我…我唔知呀」

婉婷：「咁家姐你有咩消息可唔可以第一時間叫我講」

家姐勉強地回應：「好呀…」

婉婷繼續追問：「阿明家姐你呢，咁多追求者，有無睇得上嘅人？」



家姐：「都唔太適合我」

婉婷：「除咗果個Michael，咪仲有一個都幾優質股嘅，好似係叫…叫Simon」

家姐：「唔係我鍾意嗰類」

家姐反問：「咁婉婷你點解會鍾意阿明嘅？」

婉婷：「阿明佢…讀書叻…又樂於助人…再加上…加上我嘅第一次都係..比咗阿明…」

家姐驚訝一問：「你…你哋咩時候…」

婉婷：「就係我同阿明仲係男女朋友關係果時…」

家姐聽完後沉默咗一陣，然後：「婉婷，我有啲唔舒服，你幫我同佢地講我走先」

家姐講完就匆匆離開K房，而家姐呢個舉動都令我同三條蛋散感到錯愕。

我以為家姐去廁所，所以問下婉婷：「婉婷，我家姐係咪去洗手間」

婉婷：「唔係，你家姐叫我同你哋講，佢唔舒服走先」

我二話不說，衝出K房去搵家姐。而婉婷望住我離去嘅背影，細聲講：「又係咁樣…點解…」

三條蛋散完全唔知發生緊咩事，個個懵晒樣。

口水佬率先打破沉寂：「阿明同佢家姐做咩事….」

豪仔：「係咪屋企又有啲咩急事…」

豬肉榮：「婉婷，知唔知佢哋咩事…」

婉婷企起身：「唔講啦，我都走先」

K房內只淨低三條傻佬你眼望我眼….