越界的姐弟戀（甜）: 第四部-第四章：替代品（一）

每逢星期日，婉婷屋企個工人放假都會出咗去同啲同鄉聚會，所以只有婉婷會係屋企。正因為咁，婉婷就提議去佢屋企到溫書。呢一次亦都係我第一次上佢屋企，而之前溫書都係去圖書館。

唔知點解，係去婉婷屋企溫書，我個心就好緊張，而且仲有些少興奮既感覺，可能始終係第一次去女仔屋企既關係。我前一晚已經同婉婷約好時間，所以我懷著興奮既心情，一大早9點鍾就已經到婉婷屋企門口。

我按下門鐘後等咗成兩分鐘，婉婷都無出黎開門比我。我心諗：「實仲訓緊教...」。我拎起電話，撥咗幾通電話後，婉婷終於接聽。婉婷用一種岩岩訓醒無耐，好懶散既語氣講：「喂～～～」

聽到佢把咁既聲，更加證實咗我想法係岩既：「你終於醒啦......我係你屋企門口等咗十分鐘啦，快啲開門比我.......」。唔洗一陣，我係門口就聽到由遠漸近既腳步聲。婉婷一開門，第一時間撟咗我手同用好嗲聲講：「對唔住呀～要你企係門口咁耐～」

每次面對婉婷撒嬌攻擊，我完全招架不住，每次個心都好似融化晒咁。之後婉婷就拖住我入屋，然後係梳化上坐低。我將岩先上黎前所買既兩份M記早餐放係茶几上，而婉婷望到兩份早餐後，大力咀咗我面珠墩一啖，然後開心咁講：「抵錫，仲識買埋早餐～」



我：「我一早估到你會未醒，所以買埋早餐上黎陪你食。不過就快凍啦。你快啲去刷牙洗面先。」婉婷著住條好可愛既睡裙，散發著青春少女既氣息，雖然無露啲咩出黎，但照樣睇到我眼鯨鯨。

我講完後，婉婷就即刻入廁所刷牙洗面。我坐係梳化到望一望婉婷屋企，大小望落好似同我屋企差唔多，大約1000呎左右，而個整體裝修望落去好溫馨既感覺。不過有啲奇怪既係，我望晒成個客廳，都搵唔到一張相。

我望望下，婉婷已經出咗黎。婉婷行過來坐到我隔離，然後指一指客廳四周，好自滿咁講：「成間屋啲裝修都係我諗架」。婉婷父母長年在外，自然好多嘢都要自己一手包辦。對於呢個狀況，我自己都不陌生，但只係呢一切，都由家姐去承擔咁解。

其實好多時候，我都可以係婉婷身上見到唔少家姐既影子。兩個人都好獨立，可以處理好好多事。而正正可能就係因為咁，所以我先會將婉婷當做替代品。

婉婷可愛睡裙示意圖: