[真人真事改編] 我係一個最愛hurt人感情嘅仆街校花: ［序］

白皙透亮嘅皮膚、自帶電力嘅雙眼、豪爽嘅個性、活潑開朗...

呢副唔錯嘅外表、又唔錯嘅性格，再加上識唱歌、跳舞、玩drama......

無錯，由細到大我都成日俾人讚好叻、好靚，從幼稚園、小學、到到中學，我都一直係眾望所歸嘅校花。

當然，係我呢16歲人生入面，緊係有過唔少嘅追求者啦。

但係，我係一個好理性、無咩感情嘅人。





其實正確啲黎講，我係一個表面好理性，內心好感性，但又唔識點表達出黎嘅人。

我好害怕感情，特別係愛情。

愛情對於每個少女黎講都好夢幻、好似好甜蜜咁，大家都對呢樣觸不到嘅嘢充滿期待，我都唔例外。

有無鍾意過人？當然有啦，咁我都係正常人黎嘅，雖然比較理性......

係踏入咗中學呢四年間，我遇到過四個男仔，佢地帶住愛情向我衝埋黎。





對於一個屋企唔比拍拖、又未嘗試過愛情嘅女仔黎講，呢樣，係一件好恐怖嘅事......