在西貢，見到日本兵的鬼魂: 第十三節

在這個西貢的荒島上，我們在沒有通訊設備和糧食的情況下，要和日本兵過一個悠長的夜晚。
 
坐在沙灘上的我們思緒良久不能平服，因為在我們的不遠處正正有一個人不知道什麼原因下被殺掉，而我們對於「兇手」則一點頭緒也沒有。
 
雖然我們圍在一起可以互相監察對方背後的事物，可是在坐的所有人也不時轉身望一望背後是否有「人」在背後。
 
「我地而家點做好？係咪響度坐一晚？」阿培說。
 
「唔係點，我地又同唔到外界聯絡，又報唔到警，總之而家我地坐埋一齊唔好走散，咁就最安全啦！」船家說。
 




「話時話，除左威揚之外，有邊個真係見到日本兵既鬼魂呀？」大昌用懷疑的目光看著我。
 
「仲有我，我都親眼見到！個日本兵當時就響我同威揚既身後邊，過左一陣佢就走左，我同威揚就即刻叫醒你地啦！」經紀張說。
 
幸好得經紀張說出了他也看到日本兵的鬼魂，從他們的眼神可以看得出他們的注意力已經轉移到去我的身上，他們或去想把所有的責任都推向我的身上也說不定。
 
「咪住先，大昌你咁樣講好似係懷疑係威揚殺左周老闆喎！」志文說。
 
「唔好咁講，我地都係想問清楚個情況，如果真係日本兵既鬼魂要殺人，咁應該殺左威揚先啦，點解會殺周老闆？佢嗰時都係同我響地洞上面睇水，點解日本兵又唔殺我地先呢？」阿信說。
 




我看著阿信不發一語，或者應該說現在的我根本沒有理由去為自己辨護。
 
「可能咁啱周老闆想去沙灘痾尿呢，所以日本兵咪有機會落手囉！你地諗下，我地發現周老闆既時候，成個沙灘得佢既腳印，而且係威揚同我一齊見鬼既，佢又點可能殺到周老闆？」經紀張說。
 
「會唔會有機會響呢個荒島上面，除左我地之外，仲有其他人響度？如果真係有，佢地可能因為咁樣而去殺左周老闆再將佢既鑽石偷走都唔定！」阿釗說。
 
「有可能喎！」志文拍掌附和。
 
「仲有一個可能，或者我地其中有一個人等錢駛，殺左周老闆攞埋佢既鑽石都唔定呢！」阿信再一次用懷疑的眼光看著我。
 




「咁腳印呢？點解釋？響沙灘又好，其他地方殺完人再去沙灘都好，冇可能只得一周老闆既腳印，你地究竟明唔明呀？」經紀張說。
 
「咁你要問下威揚點解啦，威揚你知唔知點解呀？」阿信說。
 
窮，本身已是一種罪？
 
是否因為我窮，所以當遇到一失竊事件或因錢殺人的事件一定會關我事？從大昌和阿信的眼神告訴我，我有機會是殺掉周老闆的兇手，而且見到鬼亦只是我把責任推卸的理由。
 
「如果大家真係咁懷疑，不如大家去搜下周老闆個身同佢個袋，睇下佢啲鑽石仲響唔響到就得啦！」
 
我們先查看一下周老闆的背包，發現鑽石就正好放在他的背包內原封不動，沒有被偷掉。
 
即是說，第一個有關我因為窮而去殺周老闆偷鑽石的嫌疑已經被洗掉。