在西貢，見到日本兵的鬼魂: 第十一節

只見周老闆臉向沙地，而背部近腰部的內臟被挖了出來，並散落在沙灘上。
 
我們看著周老闆的屍體嘔吐大作。
 
與電影所看到的恐怖片不同，除了視覺的刺激，還包括了刺鼻的血腥臭味，再加上海風吹來的陣陣海水味夾雜在一起，那種味道實臭得不能用筆墨去形容。
 
「日本兵！一定係日本兵既鬼魂做架！你地仲記唔記得張紙寫左個‘咒’字呀？佢今次黎係要攞我地命架！」志文竭斯底里的在大叫著。
 
在這空曠的沙灘上，志文的大叫更顯得無助，感覺像「Cast Away」一樣十分空虛和孤獨，不同的是在我們的不遠處有一具不知什麼原因而被殺的屍體在沙灘上。
 




「咩事呀？志文做咩響到大叫呀？」大昌他們可能聽到志文的叫聲而走了過來沙灘的位置。
 
「你地睇下，周老闆死左呀！佢仲死得好慘呀！」我指著周老闆的屍體說。
 
「唔係掛！死左？冇可能！」大昌和阿信快步的往周老闆的方向走過去。
 
「嘔！」大昌他們看到周老闆的屍體後，和我們一樣嘔吐大作。
 
「點解？點解佢會死架！」大昌的神態十分激動，這也難怪，他和阿信自中五畢業之後已經在周老闆的公司工作，他們視周老闆為第二個父親，現在周老闆慘死，他們當然十分激動！
 




「我地都唔知，我地行到過黎就見到周老闆瞓左响沙灘上面，我地咪走過去囉，點知行過去就見到周老闆死左啦！」經紀張說。
 
「係咪你地殺佢既！你地成日話佢對你地兩個暑期工唔好，係咪因為咁你地要殺左佢！」大昌和阿信把我們推倒在地。
 
他們失控了！現在的情況如果我們不說些什麼的話，他們一定會以為我和志文是殺人兇手也說不定！
 
「唔關我地事，你睇下沙灘上面周老闆瞓響到既位置！我地響周老闆頭部既前面行過去，所以你會見到我地既腳印，但係你睇下周老闆既腳後面就只有佢一個人由樹林行出黎沙灘既腳印，即係話根本唔會有‘人’殺左人之後唔會留腳印響度，所以……」
 
阿信和大昌看著周老闆的屍體再確認了一下我的說法。
 




「啲鑽石我唔要啦！我攞返去俾日本兵啦！」阿信可能刺激過度，急步的走入樹林往之前發現地洞的方向跑去。
 
其他人見狀也紛紛的跟著阿信走入樹林。
 
「威揚，你諗住點呀？啲鑽石你俾唔俾返日本兵呀？」志文說。
 
「我唔知，我響度諗緊如果日本兵要殺都殺我先啦，點解會殺周老闆？」我說。
 
「唔知呀，可能你時運高掛，周老闆死得好慘，我唔想好似佢咁樣，我都打算俾返鑽石日本兵，希望佢會放過我啦！仲有，你之前都講得啱，我地去到既時候只係見到周老闆條屍同佢既腳所，可能真係日本兵既鬼魂做架！」志文說。
 
我沒有回應志文，因為鬼魂殺人對我來說還是有點不可思議。
 
「喂，有冇人有印象之前個地洞響邊呀？」走在前方的大昌說。
 
「前面就係啦！我好肯定！」我從後大叫回應。




 
很快，我和志文便追到大昌他們，只見他們站著一動也不動。
 
「係咪呢度呀？」大昌神情嚴肅的向著我說。
 
我望一望四周確認一下附近的花草樹木，再望向大昌手指著的位置。
 
我發現，那個日本兵的地洞不見了。