前度: may2.7
個日係聖誕前夕，都已經12月，但天氣都唔係好凍，我收工後，行去潮特門口，終於見到個位曾經熟悉又陌生既人。佢同以前無乜大變化，係個樣俾以前憔悴左少少，睇黎依幾年佢經歷左唔少事。
我：喂，稀客喔，阿May，竟然約我食宵夜，我買左份聖誕禮物俾你。
May：哇，送YSL唇膏，我屋企有幾枝啦（早知唔送啦）
May：我收11點半啊嘛，咁耐無見就一齊食下傾下囉。係啦，最近Alex搵返我啊！
我：真係恭喜你喔，復合囉，Alex咁好。
（我嘲笑式講）
May：唔好玩我啦，Alex依D撲街，我一世唔會原諒，你快D幫我唸下點覆佢，佢好煩啊。
我：下，我可以點教你覆啊？
May：你得既，你咁多計仔，快D啦快D啦！
於是我同May走到去太子銀龍食宵夜。
May：唔該，請問有無魚香茄子燴米？
我：你食依D既咩？
May：哈，我不嬲都食，係你唔知姐。
我：唔該，我要個揚州炒飯。
兩個餐都黎左，我地一邊食一邊傾，大家講下近年既狀況。
我：你準備考DSE喔，返學繼續加油啦。
May：我退左學好耐啦⋯
我：下！乜嘢事退學啊？
May：唉⋯總之一言難盡啦⋯
May手機突然響起，顯示係Alex發whatsapp過黎。
我：你睇下佢幾愛你，你就好心覆下佢啦～人地對你癡心一片，你當人地癡X左線。
May：佢傻X左個腦啊，無可能。
食完宵夜已經係凌晨1點幾，旺角已經無曬巴士返去佢屋企，唯有送佢到朗豪坊地下搭小巴返去啦。
行到朗豪坊門口，突然May停低，May：你等我一陣。
我：搞咩啊你？
May左搵右搵，搵左成分鐘，終於搵到包煙出黎，阿May即刻攞出枝藍莓8點著佢。
我：哇！你食煙㗎？完全唔知你食煙喔。
May笑住講：我食煙㗎，係唔係扣曬分先？
我：哈哈，扣幾分囉～
May：之前有好多嘢煩，好多嘢唸，我見我fd有食開煙，於是叫佢俾枝我食，我依家儘量食少D既啦。
同May圍完垃圾桶一陣，佢食完枝煙，於是我同佢行到朗豪坊地下小巴站。我唸住揮一揮手，不帶走一片雲彩，點知⋯⋯
May：喂，chris，你送我返屋企樓下啊。
我：大佬May，你同以前無變，都係咁鐘意要人送返屋企喔，你屋企荃灣，我屋企觀塘個邊，你叫我點返去啊⋯
May扮唔開心既樣：咁我自己一個返去囉⋯
我同自己講唔好心軟，但最後我都係心軟左，送佢返去，我坐返的士好彩先110蚊。
我同May上車後無講過嘢，佢坐靠窗個邊，而我坐出面個位，佢雙眼望住窗外。繁華熱鬧既香港，閃爍耀眼既霓虹燈，一一照射入May既雙眼，但May雙眼透露出不少失落，我唔知佢經歷左D咩，我都唔夠膽問⋯⋯
May：我想訓一陣啊，到左你嗌我啊。
我：好啊⋯
May即刻攬住右臂訓教，我望住May慢慢咪埋雙眼⋯⋯