前度: may2.4

兄弟Danny：喂，chris，你唔係同May拍咁拖咩？

我：係啊，咩事啊？

Danny：我同你講你唔好嬲喔⋯

我開始好緊張：究竟咩事啊？

Danny：我聽聞May同個師弟好親密。



我：下⋯⋯

Danny：個男仔係足球隊隊員，而且仲係男神啊。

我聽完之後，我覺得好心痛，我幾咁希望依件事係假既，係老作既，但放學個陣，我見到佢地兩個一齊行，我就知道依件事係真㗎。

May真係鐘意左其他人⋯⋯

到左夜晚，我唸咁問唔問阿May好，我真係好驚好驚無左阿May，但有D嘢你總要去面對，有D嘢你點都會失去。



我夜晚鼓起勇氣whatsapp阿May。

我：8:00 係唔係度？

May： 8:02 係度啊。

我：8:03 你係唔係鐘意左其他人？

May：8:10 係⋯⋯



我：咁⋯咁我成全你地⋯我地分手啦⋯同埋⋯刪左我張相佢啦⋯

我：如果佢⋯佢對你唔好，你搵返我啊，我會等你⋯⋯

May睇完之後無覆我，我默默咁睇住個whatsapp已讀不回，心情差到食唔落飯，我好想好想大喊一場，但我喊唔出。

好記得個晚，我由10點，一直眼光光到天光，到左返學鬧鐘響起，我都係無訓過，我帶住疲倦既身體行去學校。

我係學校上堂個陣先攰到訓著，當我醒返個陣，D空虛寂寞後悔既感覺又通通返曬黎。

我個日後刪除曬May所有既聯絡方法，電話號碼、facebook、instagram通通刪除。

我咁做唔係因為小氣，亦都唔係嬲阿May。

而係咁樣做，我係想唔會咁傷心同難過，我唔洗睇到佢地親密既合照，唔洗睇佢地曖昧既對話。



你知唔知點先知自己又幾愛對方？就係當你失去左佢，你望到佢同第二個一齊，你個心係有種俾人緊緊擰住咁。無錯，我係個撲街，當初人地係你身邊時你唔好好對待人地，失去先黎後悔，有X用咩？

我個陣真係無時無刻都係唸起佢，過得快唔快樂啊？有無病到啊？

個師弟對May真係唔錯，May經常睇師弟踢啵比賽，師弟對May無微不至既照顧，後來May走去返M記，師弟都有去接佢收工。

師弟真係May既理想型，又陽光，又溫柔。

我好驚會撞到May同師弟出現係我面前，但大家讀同一間學校，點都係避唔到。

有時我返學見到May同師弟一齊行，雙眼會立即感到酸痛，但我忍住，無將眼淚滴落黎，我放慢腳步行，我好驚俾阿May見到我行過，好驚俾佢見到得我自己一個。

有時放學係樓梯見到佢地係前面落樓梯，我都會走去廁所或者去其他地方，等幾分鐘之後見唔到佢地既影我先走。



有時係走廊或者操場撞到，我都會望向另外一邊，扮到完全無見到咁，直到離開佢地既視線範圍我先抖返啖氣。依種模式一直到我畢業個陣。

間唔中聽到May既消息，我都會感到少少難過，但我應該為May感到開心，佢離開左我依個渣男，但佢得到個暖男男神，佢依家好幸福，佢面上既笑容俾起同我拍拖個陣，係多好多。

有時避無可避既對望始終會發生，望到佢同師弟，佢地兩個又望住我，然後May會尷尬到得低頭。依種最熟悉的陌生人既感覺，依種愛人結婚了新郎不是我既感覺，就好似攞把刀將我心臟一刀刀切成1000塊咁⋯⋯

但我知道，我罪有應得，我係低死㗎⋯⋯