<<坐上前往尖沙咀的天星小輪，迷失在維多利亞港>>: <<迷失六十六>>

「阿華......」奔跑著的阿康像是感覺到阿華的死亡，眼眶不自覺流出了 — 眼淚？
 
「發......發生咩事？」我緩緩地醒轉過來，只感到身體傳來一陣又一陣的痛楚，並且有點發熱。
 
「你終於醒啦！你繼續休息一陣，我會送你去巢穴核心之後送你走。」
 
「巢穴？核心？發生咩事，頭先......我明明同書遙一齊，之後......個BB.....個BB......」
 
我回想起昏過去前的情況，撕心的劇痛馬上向我襲來，比起身體上的傷勢，內心的那種傷痛更令我有窒息的感覺。
 




本來還在奔跑著的阿康，看到我這樣的狀況，馬上從背上放我下來。
 
「阿森，冷靜啲！冷靜啲！深呼吸。」
 
我聽著阿康的說話，慢慢調整自己的呼吸，窒息的感覺稍為緩和，但是那種從心而發的痛苦絲毫沒有減退。
 
「阿森，你聽我講，你依家咁樣去到核心都離開唔到呢度，你唔可以絕望，你要相信，相信你一直以嚟堅信嘅事物，只要有希望，你先可以離開呢度。」
 
「我......我唔明你講咩......」
 




內心和身體的雙重煎熬，令我吐出一字一言，都仿佛要死掉似的。
 
「深淵簡單講就係人類絕望嘅集合體，內心絕望嘅人會同深淵進一步同化，慢慢變到離唔開呢度，繼而成為深淵嘅養份。所以你唔可以再係咁落去，你一定要離開呢個地方。」
 
「點解......你會知得咁清楚？點解我一定要離開，我......我已經好攰，離開咗又點......」
 
阿康看著說著洩氣話的我，深深地嘆了口氣。
 
「醒下啦，黃洛森！再喺咁你就會同深淵同化㗎啦！」
 




「同化？係又點......書遙佢死咗，我呢幾年做嘅嘢根本係白忙一場。」
 
「你啲朋友，你啲親人呢？你唔諗下佢哋！」
 
「親人......有我阿哥佢哋，應該無問題嘅。朋友......無咗我一個，分別都唔大。講到尾，呢個世界，無話少咗邊個就會死......」
 
「你就算要死都唔可以死喺呢度！你係第一個帶住希望入嚟深淵嘅人，如果你真係成為第一個帶住希望死喺呢度嘅人，之後深淵就會無差別咁吸引其他人入嚟，到時就唔只你，你嘅朋友，親人，所有人都會陸陸續續咁消失喺呢個世界。」
 
我看著阿康，雖然他的話很有衝擊力，但我卻完全無法提起幹勁。
 
「只有你成功離開呢度，先可以削弱深淵，之後再對付佢。所以你一定要保持希望離開呢度！」
 
是嗎？但我真的沒有幹勁，甚至連回覆阿康我也不想。
 
「我知道咁短時間經歷咁多唔好嘅事，好難好似之前咁。但係正面啲咁睇，內心絕望，入得嚟嘅人係無辦法離開，死亡對佢哋嚟講已經係最好嘅選擇。如果唔係死亡而係被轉化嘅，就會好似頭先隻怪物或者鄧美玉佢哋咁，永永遠遠被深淵操控。」




 
死亡已經是最好的選擇？那，就讓我死掉好了。
 
阿康看著我這樣子，忍不住狠狠地賞了我一個巴掌。
 
「你到底想點呀？」
 
「殺咗我......書遙講得啱，有啲嘢過咗去就無得返轉頭。」
 
「你醒下啦，係嗰隻怪物用你前女友個樣去講呢啲嘢咋，你前女友會點諗你最清楚！」
 
「我本來......都以為會好清楚，我都好清楚書遙唔係咁懦弱嘅人，佢唔應該會感受到絕望，但依家佢一樣出現喺呢度......我可能根本唔了解佢。」
 
「白痴，每個人都有絕望嘅時候，佢可能咁啱喺傷心嘅時候入咗嚟呢度，咁唔代表佢就係一個懦弱嘅人！你寧願相信呢度啲怪物嘅說話，都唔相信你認識嘅佢？」
 




阿康的說話像鐵錘一般敲打我的腦袋，對啊，我到底在做甚麼了，以前才因為不信任書遙而導致之後出現的問題，現在又因為有著書遙外貌的怪物而失去了對書遙的信任。我真的是一個無可救藥的白痴。
 
「就算係咁，我都已經無可能對佢道歉......」
 
「你覺得佢真係想你道歉咩？」
 
阿康說得很對，可能書遙根本沒有像我這樣放在心上，而且，以她的性格，即使向她道歉，大概也只是笑笑了事。
 
「呢層......」
 
「睇嚟你清醒返啲啦，唔好浪費時間啦，我哋要繼續前進。如果你仲想同你前女友道歉，喺離開呢度嘅時候，可能會有機會畀你咁做。」
 
「咩意思？」
 
「離開呢度嘅時候，有機會可以遇到被深淵吸收嘅人嘅意識，或者你鍾意叫靈魂都得。如果你真係想親自同佢道歉，你更加要離開呢度，呢個係你見到佢嘅唯一機會。」




 
聽到阿康的說話，本來還略帶猶豫的我，就像是看到黑暗中的光明一般，意志堅定地只想向光明處走去。
 
「唔好再浪費時間，我哋要盡快去到核心位置。」
 
阿康準備背著我再次前進，但我卻沒有馬上出發，因為我還有事情必需弄清楚。
 
「阿康，你......到底係咩人？」
 
清醒過來的我，回想起阿康對所謂的巢穴竟如此熟悉，而且貌似比阿華更了解這個地方，很難想像一個普通人能對此了解到如此程度，難道說僭入的調查員不只一人？
 
但阿康和阿華感覺是互不認識，到底阿康是甚麼人？