<<坐上前往尖沙咀的天星小輪，迷失在維多利亞港>>: <<迷失十四>>
「佢......佢死咗？佢仲話會答我哋問題，結果點樣離開呢度又無講，點樣阻止老化又無講！但係佢竟然就咁就死咗？」阿康激動地說。
而其實，我也不比阿康好得了多少，只因最終我還是沒能夠問出書遙到底是不是來過這裡。
如果她真的來過這裡，是不是已經跟周博士她們一樣，已經離開這個世界呢。
「無可能！無可能！書遙無可能會放棄自己，佢唔應該屬於呢個地方！」
「阿森，你知唔知呀，我一直都想揹住背囊，然後行勻全世界。」
「阿森，我呢，仲未放棄攝影呢個夢想，我真係好想拎住相機，同你一齊周圍去，影一啲靚相返嚟。」
「阿森，你覺得，我哋將來會點呀？結婚，然後生小朋友？」
「阿森，你估下，我哋過兩年會點呀？」
「阿森，我......我好想辭職離開香港......」
「點解......你可以變到淨係諗住返工嘅嘢？當初我哋講好嘅夢想呢？」
「或者......逃避嘅係我，我只係用夢想呢個美麗嘅包裝，去逃避緊殘酷嘅現實......」
「阿森......我哋......分手啦。我要去追尋自己嘅夢想，我......唔要咁樣過一世。」
對，沒有錯，書遙是懷抱著夢想、積極、不會輕言放棄的人。
要是周博士說的話都是真的，她絕不可能出現在這裡！
但......要是有個萬一呢......
「阿森！」明叔的叫喊聲，把我從妄想裡抓回現實中。
我抬頭一看，發現阿康和其他人都用一種充滿異樣的眼神看著我。
「做......做咩事？」我感到大家對我的情緒起了些變化。
「做咩事？你同頭先個老太婆係咩關係？」阿康激動地說。
「吓？」我一時半會實在弄不清阿康的意思是甚麼。
「你唔駛扮嘢啦！頭先個女人講啲嘢癲癲得得咁，你都繼續問佢，跟住佢又話咩我哋死晒，得你一個走得甩，你哋係咪夾埋想對付我哋？」阿康瞪著我，像在看著甚麼怪物似的。
「咩對付你哋呀？我依家咁嘅樣點對付你哋，對付你哋我又有咩好處呀？」我真的完全摸不著頭腦，到底要怎樣想阿康才會想到這結論。
「我點知你！話唔定你同嗰個老女人一樣，由此至終都係當我哋係實驗品，又或者成件事根本就係你搞出嚟，你想近距離睇我哋點死先會喺度出現。」
「係囉，如果你同個女人無嘢，點會淨係偏坦你。話唔定就係你帶我哋嚟呢度，仲喺我哋面前做呢啲大龍鳳。」阿May附和說。
我總算知道為甚麼阿康會突然起了這樣的變化，肯定又是這女人不知道在背後說了些甚麼。
「哈，不如你話畀我聽點樣做可以令人喺眼前老化仲要變成灰呀。」面對這可笑的指責，我只能夠冷笑一聲，並惡狠狠地瞪著阿May。
「呢層就要問你啦，始終係你變出嚟嘅把戲，不過我諗你都唔會講畀我哋知點做㗎啦。」阿May絲毫沒有退讓。
看到阿May這樣的行動，我不禁在心裡產生了疑問，這女人到底在盤算著甚麼？
我實在看不清她的意圖，暫時能確定的，就是這女人的心機十分之重，她不僅把阿康弄得言聽計從，而且更在短時間內令其他人對我產生了懷疑，我的直覺在警告我，要小心這女人！
「其實，你頭先講嘅嘢充滿矛盾。如果我真係主謀人，點解我要特登畀周博士講啲嘢出嚟，然後等你哋懷疑我。」我說話的同時，觀察著所有人，除了阿康以外，明顯其他人也有所動搖。
「再者，點解你要一口咬定周博士講嘅嘢係瘋言瘋語？我諗大家心入面都好清楚，喺我哋面前發生嘅，絕對唔係一般現會發生嘅事。但係你偏偏要否定呢一切，會唔會，你先係有問題嗰個？」我可不會放過這機會，要是讓這女人掌控了現場的氣氛，我可是會吃不完兜著走。
「你講咩呀？明明係你有問題，你仲想屈阿May！」阿康果然立刻護著阿May，但阿May卻露出了不妙的神情，正想說話時，卻被我搶先了。
「明明我哋應該係唔識嘅，點解你要咁幫住阿May？仲有，我不妨同大家講，頭先阿康有向我提議，由佢爬落去駕駛室，而阿May就提議唔駛同你哋講。但我覺得呢件事已經唔再係一個人嘅事，而係大家嘅事，所以我阻止咗你哋，係咪咁？」我質問阿康。
「係咁又點？阿May只係想快啲解決件事，等我哋可以快啲返去岸邊，咁有咩問題？」幸好阿康只是一個熱血的蠢材，多得他這樣回答，剛剛懷疑我的眾人，已經把注意力從我放到阿May身上。
阿May用一臉厭惡的神情看著阿康，腳步不期然退後了一步。
「無錯，我係有提議阿康咁做，但係，我只係想快啲返上岸啫，我咁做有錯咩？依家有人死咗呀！我懷疑你，有錯咩？我......我都只係想安全離開呢度咋......」阿May說著說著，竟然哭了起來，要不是我剛剛注意到她看著阿康的表情，說不定也會被她騙到，但這一刻，我只為她的行動感到心寒。
「你睇你，阿May做錯啲咩？你要逼到佢咁？」阿康發自內心地向我咆哮，我心中冷笑了一下。
「我逼佢？哈，點都好啦，呢度發生嘅所有嘢，你哋都應該自己判斷咩係真咩係假。不過如果有人係不懷好意咁想將呢度發生嘅怪事，推晒喺同一個人身上，嗰個人肯定都有問題。」我意有所指地把話說完後，雙眼不避嫌地直視著阿May。
而在哭泣中的阿May，我仍然能清楚看到，她用那隻充滿怨狠的眼光看著我，看來我還是要小心她了，免得被她在我背後捅我一刀。
「始終啱啱發生咗咁多怪事，諗嘢諗歪咗一啲都唔奇，所以大家唔好再記住頭先嘅事啦。」明叔主動地替我打圓場，大概他也看穿了阿May的技倆，只是還不好揭穿她而已。
「無錯，依家最緊要係諗辨法離開呢艘船，其他嘅嘢之後再諗啦。」阿華也附和。
「好啦，雖然我都唔知離開呢艘船係咪正確選擇，不過我哋點都無可能長期留喺度。」我也表示贊成。
雖然有很多事情還沒有弄得明白，但阿華也說得對，我們總不可能繼續留在船上。
而且，船柱的圖畫也顯示，當日那些人也是坐著船回到岸上。
要是我們的情況跟他們一樣，也許上岸才是正確的選擇吧。
「咁......我哋要點樣離開呢度？」張強提出了眾人心中的疑問。
「阿康，你咪話你可以爬落去駕駛倉嘅？不如......」阿May不知何時停止了「哭泣」。
「嗯，雖然我唔想為咗呢個人而行動，不過既然大家都想離開呢艘船，只要你哋無異議，我即管試下落去駕駛倉。」阿康瞪著我，看來他還是懷疑著我，他也太單純了吧。
眾人聽到阿康自告奮勇，當然沒有阻止的理由，都紛紛點頭表示贊成。
「好，咁你依家無聲出啦？阿May你等我一陣，我依家就爬落去。」
就在阿康在找尋工具協助他時，船尾突然傳來一聲慘叫聲。
不會是阿萍出了甚麼事吧？