<<坐上前往尖沙咀的天星小輪，迷失在維多利亞港>>: <<迷失八>>
「有無人可以話畀我知發生梗咩事？嗰兩個人點解會咁？下一個係咪我呀？」經歷了兩人在眼前化為微塵後，眾人的心情早已七上八下，亂作一團，而其中最為混亂的，相信便是阿萍這位家庭主婦了。
「你哋搵人答下我啦，究竟發生咩事？下一步我哋要點做呀？我唔想死呀！我仲有老公，有仔女要照顧㗎！我唔可以死喺度㗎！」
然而，現場的我們根本沒有人能解釋這狀況。
「你......你係博士嚟，一定識好多嘢！求下你，話畀我知之後點做，我唔想死......我唔想死......」阿萍緊緊抓著周博士。
「走開啦！咁大個人仲問人點做，自己用腦諗啦！」周博士一臉嫌棄地把阿萍的手甩開。
「你......你係醫生，你一定知點做嘅。」阿萍被周博士甩開後，馬上轉為向明叔求助。
明叔雖然沒有甩開她，但也只是輕輕搖了搖頭，沒有作聲。
阿萍幾乎向現場所有人，包括比她年輕的兩位學生也求助過了，但當然沒有得到任何回應。
「收聲呀！」阿康受不了這師奶的大吵大鬧，忍不住大喊。
「你再嘈落去又可以點？呢度所有人都同你一樣，完全唔知發生梗咩事，但唔代表大吵大鬧可以解決到，你唔好再喺度嘈生晒啦！」
「咁唔係點啫？我只係一個女人仔，從來都係老公教我點做，依家佢唔喺我身邊，點解我唔可以問人點做好。」阿萍沒有因為阿康的說話而停下，反而變得更加激動。
「你要問係你嘅事，但係你依家煩到我，煩埋其他人！我講多次，無人知依家發生梗咩事呀！」阿康亦因為阿萍而變得激動起來。
看著阿康和阿萍吵得愈來愈厲害，一股違和感在心內湧現。
「頭先蕭sir就係情緒突然變得激動，然後就突然間開始老化同埋消失，唔通......」一念至此，我馬上阻止二人。
「你哋冷靜啲！話唔定，我發現到啲嘢。」
兩人聞言停止了爭吵，然後眾人都把目光投向我。
「先講明先，呢個只係我嘅感覺。頭先鄧美玉同蕭sir消失之前，佢哋嘅情緒都突然間變得好激動，而且仲變得好唔理性。之後佢哋就開始老化同消失，所以我估，消失係同情緒激動有關。」
我把話說出來，觀察著眾人的反應。
當中大部份人也微微點頭，看來也和我想到同一個方向去。
而其中，周博士、明叔和阿華並沒有任何反應，難道他們有其他想法？
「咁係咪啫係我冷靜落嚟，就唔會有事呀？」阿萍看著我，希望我能給予她一個明確的指示，我實在不想被她糾纏下去，只好微微點頭。
「我唔完全認同。」周博士簡單而有力地否定了我的想法。
「點解？」
「首先，只係得兩個樣本，實在太少，唔足以證實呢個講法。」周博士以樣本去稱呼鄧美玉和蕭sir，感覺令人不太舒服。
「而且，鄧美玉佢雖然好激動，但佢之後明明因為受傷而昏迷，而佢嘅老化跡象係昏迷之後出現嘅。至於蕭sir，就係清醒嘅情況下出現老化，兩個樣本嘅情況完全唔同，出現老化嘅時間點都唔同，所以我先唔完全認同你嘅講法。」
雖然周博士的用詞令我不太舒服，但她的分析是正確的。
「既然情緒激動唔係老化嘅原因，咁你覺得原因係咩？」我還沒有開口，明叔已替我把心中的話說出來。
「原因？我都唔知，始終依家得兩個樣本，如果可以喺條件差唔多嘅情況下，多一個樣本，咁就可以試下分析。現階段我都只能夠指出阿森講嘅嘢唔係正確。」周博士滿不在乎地再次說出「樣本」二字，我心裡不期然冒出了一陣寒意。
「多一個樣本先可以分析？所以頭先你先會特登刺激阿萍？」明叔的話，令眾人都把目光放到周博士身上。
「咩話？原來你係特登刺激我？你係咪想我去死，等你可以做啲乜鬼嘢分析？好得人驚呀你！」阿萍聽到後激動地說，明叔則示意她冷靜下來。
「哈，我都唔知你講乜。」周博士冷笑了一聲。
「你頭先話唔完全認同阿森嘅說話，即係話你有某部份認同佢嘅說話，但你無將你嘅諗法講出嚟，即係你想搵到啲嘢去證明你嘅諗法。而要證明你嘅諗法，當然係愈多『樣本』愈好啦。」明叔特意把「樣本」二字提高了音量，彷彿在提醒我們，周博士並沒有把其他人當作「人」來看待。
「係咪真㗎？」阿萍衝著周博士說。
「Hawthome Effect，霍桑效應。你哋有無聽過？」周博士沒有直接回答，反而拋出了另一個問題給我們。
除了明叔和阿華，其餘人都露出了不清楚的神情。
「霍桑效應，係指實驗者知道自己成為觀察對象之後，而改變佢嘅行為動機，從而令到實驗結果有出入。」周博士解釋。
「咁同我哋依家嘅情況有咩關係？我哋又唔係你嘅實驗對象！唔通你......」我不期然把周博士和這次事件的始作俑者連繫起來。
「你放心，我唔係你諗嘅元凶，如果我係搞呢件事出嚟嘅人，我絕對唔會咁蠢將自己放埋入去個實驗入面。經過鄧美玉同蕭sir嘅情況，好明顯係有條件地令佢哋出現變化，為咗搵出呢啲條件，觀察同樣本係必要嘅。但係，呢個觀察，只能夠喺樣本唔知道嘅情況下進行。」
「即係你特登刺激我，等我去死，你個人心腸真係狠毒。你呢啲人肯定無親無故，有嘅都會被你逼死！」阿萍不悅地罵起周博士來。
「哼，你鍾意點講就點講，我無必要同你解釋。不過你哋要知道一樣嘢，就係明叔嘅說話，只會令我哋更加難發現老化嘅規律，話唔定我哋全部死晒都仲未知發生梗咩事。」
「毒婦，賤人，仲咒我哋會死晒，你先會死呀！」
阿萍謾罵過後，小輪上又再次回復平靜，只是，氣氛比之前更加尷尬。
這樣的情況下，也不好再討論些甚麼。
畢竟大家在明叔提醒過後，都不敢再胡亂說話和行動，深怕自己成為下一位遇害的人。
可是，大家心裡其實亦很清楚，這樣呆等下去並不是辨法，始終不行動事情就不會有任何進展。
但......誰會願意行動，又應該如何行動呢？
「隆隆」，小輪突然又再晃動起來，而這次的晃動程度，比之前要來得更加強烈。
晃動的時間感覺比之前更長，好不容易晃動終於結束。
「嗰啲咩嚟㗎？」眾人剛從晃動中回過神來，一把女聲驚呼起來，是女學生鄭樂欣。
只見她和陳家輝摟在一起，手指指向船中間的船柱部份。
到底，她看到甚麼了？