<<坐上前往尖沙咀的天星小輪，迷失在維多利亞港>>: <<迷失七>>
「點會咁㗎？明叔？」眾人都不敢相信自己的雙眼，紛紛把疑惑的眼神投向明叔。
只是，明叔此刻的表情，跟我們並沒有太大差別。
「無可能，點會咁？」明叔一臉驚愣地看著眼前剩下的衣服。
「明叔......」我以為明叔跟我們一樣，也是接受不了眼前的狀況才會這個模樣。
「我......我又一次救唔到任何人。」明叔內心的痛苦無以復加，明明人就在他眼前，他卻只能再一次看著生命在面前消失殆盡。
「痴線，邊有可能？無可能會咁！」剛剛還在強調沒有甚麼需要感到奇怪的蕭sir，大為震驚地說。
「哈，你頭先唔係話我哋只係經歷梗啲普通嘢，無咩出奇嘅咩。嚟呀，解釋下頭先發生咩事啦。」張強看到蕭sir這失神的模樣，想起了剛剛他那嘴臉，忍不住嘲諷他。
「我知啦，一定係魔術！肯定有古怪，如果唔係無理由會咁！」蕭sir不願相信眼前的事實。
「魔術？點做呀？又無道具又無助手，仲要我哋十二個人望住佢慢慢變成灰，咁都做到咪仲勁過大衞高柏菲。」張強不肖地說。
「我唔知點做到，但一定係魔術，唔會有其他解釋，唔會有！」面對張強的質疑，蕭sir比之前反應得更加強烈。
「奇怪，蕭sir反應會唔會太大？」我不由自主這樣想著，看來比起膽小現實主意，蕭sir背後似乎有更深的理由，才會如此不願相信超現實的事情。
「張強，唔好再講啦，依家唔係講呢啲說話嘅時候。」阿康制止了張強，不讓他繼續說下去。
眾人也微微點頭，附和阿康的說話，張強才閉上了嘴，不再出言挑釁。
我看了看眾人，除了蕭sir，看來其他人也有了同樣的想法。
那麼，是時候開始認真討論一下現況了，但從哪裡開始好呢？
我思考了一下，看到明叔開始從震驚的神情中回復過來，我便問道。
「明叔，對於啱啱鄧美玉嘅情況，你有無咩諗法？」
「有咩諗法？就係不可思議，我都解釋唔到......」
「如果係早衰症呢？」周博士提醒明叔。
「早衰症？有啲似，不過......都係無可能......」明叔搖了搖頭。
「咩係早衰症？」我問。
「早衰症，全名係早年衰老症候群，簡單講就係人體急速老化現象。你哋可能都有聽過，有啲人出世幾年已經好似一個老人家一樣，其實就係患咗呢種先天遺傳病，呢啲人身體老化會比一般快五倍、十倍甚至更快。」
「咁咪同頭先個女仔一樣囉！果然，係可以解釋，係可以解釋嘅！」蕭sir聽到明叔的說話，好像在水中看到救命索一樣，馬上緊緊抓著。
「唔同，完全唔同。頭先我都講過，早衰症係先天遺傳病，鄧美玉已經二十歲有多，無理由依家先病發。就算我當佢係後天嘅特例，老化嘅速度亦都太快，佢已經唔係十倍，二十倍，而係更加誇張嘅速度衰老。」
「既然係特例，速度快啲都可以啫，係咪？你話係咪？」蕭sir緊張地說，他可不想這根救命索就這樣斷掉。
「就當速度快係有可能，咁都無辨法解釋點解佢會風化。呢種病只會喺患者生存梗嗰陣存活，頭先鄧美玉明明已經失去生命跡象，但係佢嘅身體仍然繼續出現老化現象。一般嚟講，人死後遺體要完全風化，閒閒地都要上百年，而且呢度根本無任何微生物可以令屍體進行分解作用，所以無論點樣分析，都無可能會變成咁。只能夠話，呢件事係不可思議嘅。」
「痴線！你究竟係咪醫生嚟㗎，呢啲嘢你都講得出？科學啲啦好無，一定有得解釋嘅！」蕭sir聽到明叔的分析，情緒愈來愈激動，說甚麼也不願接受這是一宗不尋常的事件。
「蕭sir，我諗你有啲鑽牛角尖啦。科學其實唔係否定一切超自然現象，而係應該不斷嘗試去證實一啲解釋唔到嘅事。超自然絕對係科學嘅一部份，我唔明點解你要咁抗拒。」周博士有點過看不過蕭sir的這種態度，忍不住出聲。
「超自然就係超自然，科學就係科學，點可以混為一談！你唔好以為一個係醫生，一個係博士就可以亂咁講！我唔會信，一定有方法可以解釋，一定有，一定有......」蕭sir不斷重覆著，樣子看上去有點不妙。
「其實呢個世界有好多嘢係科學仲未解釋到，人體自燃、第六感、前世記憶等等，呢啲事其實都係科學未能解釋，而最多人認為嘅，就係呢啲全部都係假嘅，老作出嚟呃人嘅。但係科學解釋唔到就等於唔存在，本身就係一種唔科學嘅諗去。」周博士沒有理會蕭sir的說話，繼續解釋。
「解釋唔到就係無！你夾硬話未解釋到有咩意思，唔存在就係唔存在！唔科學嘅嘢係無稽，係迷信！科學先係一切！」蕭sir歇斯底里地說。
「科學先係一切？解釋唔到就係無稽同迷信？你知唔知道，喺十七世紀嗰陣，啲人仲以為地球先係太陽系嘅中心，其他星體都係圍繞住地球轉，當時嘅教會仲認為提出日心說嘅人係邪惡嘅。直到後來日心說先被人證實係啱嘅。蕭sir，過份信任科學，其實先係一種迷信。」周博士語氣略帶不肖地說。
「過份相信科學係迷信？唔係......唔係咁......」蕭sir雙手緊抓著自己的臉頰，還弄出一小道血痕，嚇得站他身旁的人都退後了數步，當然，我也不例外。
「蕭sir，你講嘅嘢唔係無道理嘅，你冷靜啲先。」明叔看到蕭sir的樣子，忍不住開口。
「我梗係有道理，我梗係有道理啦！我講嘅嘢係啱嘅，點解你哋唔信我？點解？」明叔的說話並未起效，蕭sir的臉上又多添了一道血痕。
「我哋信你，我哋梗係信你啦。周博士你話係咪？」明叔向周博士打了眼色，暗示她暫時附和一下。
看到暗示的周博士，瞥了蕭sir一眼後，眼裡流露出的是無情。
「哼，信佢？正常人點會信一個痴線佬講嘅嘢？虧佢仲話自己係老師，憑佢呢啲咁嘅思想，點會教到學生。難怪依家啲學生愈嚟愈差，根本連教嗰個人都有問題！」
明叔還沒有來得及對周博士抱怨，蕭sir已然發作。
「你講咩呀？咩點教學生呀？我為咗教好啲學生做咗幾多嘢，你又知啲咩呀？如果唔係因為迷信，我學生就唔會死！我......我......」蕭sir近乎崩潰地哭了出來，看來是回憶到甚麼了。
「蕭sir，冷......」明叔正想安慰蕭sir，周博士卻把他的話打斷了。
「學生因為迷信而死？雖然我唔知發生咩事，但係你竟然將責任推落去學生度，你仲有咩資格做老師？」周博士不肖地說。
「我......我......」蕭sir抱著頭，身體在擅抖著。
「蕭sir，我覺得最近好唔舒服，我成日覺得有人跟住我。」
「蕭sir，我知道跟住我嘅係咩啦，係鬼呀。」
「蕭sir，我好驚，我好驚佢哋嚟攞我條命。」
「蕭sir，我無病！我無病呀！我信你先同你講，點解你要咁對我？」
「蕭sir，真係有鬼，真係有鬼㗎！點解你唔信我？點解？」
「蕭sir，你唔信有鬼，你唔信我？我......用自已證明畀你睇，世界上係有鬼嘅！」
「唔好埋嚟！我信你！我信你！你唔好埋嚟呀！」蕭sir突然顯得十分驚恐，對著眼前大喊。
「蕭sir，冷靜啲！無人接近你，唔好咁緊張！」明叔嘗試安撫蕭sir，蕭sir卻好像沒有聽到似的。
「唔好埋嚟！唔好埋嚟！我......我信，我信你啦！有鬼，呢個世界係有鬼！所以......唔好埋嚟......」蕭sir一屁股跌坐在地上，雙手向前方亂揮，精神狀態明顯處於混亂狀態。
「蕭sir，無鬼，呢度無鬼呀。你聽唔聽到我講嘢？」明叔深怕走近蕭sir會更加刺激到他的情緒，只好加大聲量嘗試與他對話。
「我信你......我信你啦......我唔配做老師......我唔配，係我唔好，我無信你。」蕭sir的話愈來愈奇怪，明顯不是對現場其他人說的。
「蕭sir？蕭sir？唔得啦，佢應該出現幻覺。阿康，阿森，幫我捉實佢，然後綁住佢手腳，唔好畀機會佢傷害自己。」明叔憑著過往的經驗，對兩人下達了命令。
我和阿康聽到後，互相看了一眼後，戰戰競競地接近蕭sir。
「阿森，我會衝埋去捉實佢，然後鎖住佢上半身。你襯機會綁住佢雙腳，然後我同你一齊綁住佢雙手。」阿康向我示意後，便打算撲向蕭sir。
「唔好呀！我錯啦，我唔配做老師，求下你唔好帶我走！求下你！」我和阿康還沒有來得及抓實蕭sir，蕭sir卻已起了變化。
只見蕭sir揮舞著的雙手正急速老化，臉上亦開始老化並出現皺紋。
「明叔？」我和阿康不知道應否按計劃抓住蕭sir，只好詢問明叔。
但明叔還沒有來得及指示我們，眼前的蕭sir跟鄧美玉一樣，完全風化並變成沙粒，消散於我們面前。
短短十分鐘內，這已是第二人在我們面前消失殆盡。
剩餘的人和我在內心都浮現出一個疑問，下一個，會是自己嗎？