<<坐上前往尖沙咀的天星小輪，迷失在維多利亞港>>: <<迷失五>>
「點解會變成咁？我......又救唔到......」明叔看到那女的割脈後，竟失神地跪了下來，一點也不像剛剛幫助阿華的樣子。
就在眾人也被那女人的行動嚇呆了時，阿康已然行動起來。
「大家快啲嚟幫手，佢流好多血。」
阿康跑到那女人身旁，想替他止血卻不得其法，其他人則是被眼前的景象嚇得目瞪口呆，只能站在人旁看著她繼續出血。
「明叔，快啲嚟幫手，再唔止血佢會死！」阿康著急地大喊，但明叔卻仍然跪在地上，沒有回應。
「明叔！明叔！」我嘗試扶起明叔，但他失神得聽不到我的聲音。
「病人出現排斥反應，腹腔大量出血！」
「血壓持續下降！」
「心臟停止跳動！」
「Certified！死亡時間係......」
「醫生，我個女點呀？我個女點呀？」
「點解？點解會咁㗎？你明明話個手術好安全㗎？」
「殺人兇手！畀返個女我呀！」
「阿明，其實你唔駛辭職，今次件事法院都裁定病人係死於意外，你唔需要自責。」
「佢咪就係嗰個殺人兇手囉，聽講佢做手術嗰日飲咗酒㗎，都唔知點解仲有面留喺度。」
「個女仔咁後生就去咗，無陰公囉。」
「殺人兇手！殺人兇手！」
「唔好再做醫生，唔好再害人啦！」
「明叔！求下你應下我啦，個女仔頂唔到好耐㗎！明叔！」我看到阿康努力地嘗試做一些緊急處理，但那女人的臉色卻愈發蒼白，我只好繼續嘗試喚醒明叔。
「依家得你有辨法救佢咋！明叔！」我把明叔扶到那女的眼前，但明叔仍然沒有任何反應。
「我要救佢。」
「救佢？你覺得你仲救到佢咩？」
「依家得我一個可以，我唔救就無人救到佢。」
「乜你覺得你仲有資格救人咩？」
「我......唔可以見死不救。」
「好偉大！咁點解你要殺我？」
「我無，嗰次係意外！」
「意外？你真係覺得係意外咩？你個殺人兇手！」
「我......我......」
「你唔好再扮嘢啦，你唔會救到任何人！就算你去，你都只會殺咗個女仔！」
「我唔會，我今次一定會救到佢！」
「明叔，佢就嚟唔得啦！」阿康用力按壓著那女人出血的手，但仍是無法止血，溫熱的血液濺到明叔的臉上。
「咦......」明叔被血液濺到後，總算清醒過來。
「太好啦，你終於有反應啦！依家點算好呀？」阿康著急地說。
「仲有脈搏，放心，我今次一定會救到你！」
清醒過來的明叔，好像下定了決心似的，他馬上吩咐眾人幫忙。
在一輪慌亂的行動後，明叔總算做好緊急處理了。
「明叔，佢係咪無事啦？」阿康問。
「好在佢把刀唔夠利，傷口並唔係好深，所以先可以勉強止到血。」明叔邊說邊把這女人放置成頭低足高位的模樣。
「明叔，點解你要將佢個頭放喺地，對腳就放喺櫈上面？」我看到這古怪的模樣，忍不住問明叔。
「咁樣做可以令佢大腦同其他重要器宮有足夠嘅血液提供，不過呢啲都係緊急處理，我哋點都要盡快送佢去醫院。始終把刀上面可能有細菌，同埋佢無咗咁多血，我驚佢都捱唔到好耐。」
的確，我和阿康離這女人很近，可以感受到她的呼吸有點急促和紊亂，明白情況並不樂觀。
「但係可以點算，依家架船又停咗喺海中心，電話收唔到，門又開唔到，仲點送佢去醫院。」我說。
「我唔信開唔到，我再試一次。」阿康不死心地用力踢向那道木門，這次亦理所當然地沒有成功。
「我覺得，我哋應該先整理一下情報。」一名OL裝扮的女性走了出來。
「整理情報？」阿康按著隱隱作痛的右腳詢問。
「無錯，我諗大家應該都唔會認為，我哋唔只係壞船咁簡單。」OL解釋。
阿康用「此話何解」的眼神投向OL。
「一開始你大嗌船長嘅時候無人回應，其實已經好奇怪，不過我即管當佢有啲咩意外，可能暈咗或者出唔到聲回應。而啱啱你同呢位先生都分別試過開呢度門，但都開唔到，我唔相信呢度門有咁嘅強度，可以承受咁重嘅撞擊。」OL分析。
「講得無錯，依家已經零晨十二點幾，即係我哋已經困喺海上面一個鐘頭有多。正常嚟講，船公司應該已經會派人嚟處理。但係到依家我哋都無見到任何人同任何船過嚟，我諗......我哋可能同一啲神秘事件扯上關係。」一名身形肥胖，看上去像是電車男的大叔，用酷似偵探的語氣搶著分析，但這翻說話配搭上他的造型，感覺就是有些格格不入。
「你哋講啲咩呀？咩神秘事件呀？我哋唔係壞船咋咩？」一名身型微胖，師奶裝扮的大嬸不安地說。
然後其他人亦開始加入討論，情況變得有點混亂起來。
「好啦，大家聽我講下先。」阿康拍了拍手，終止了那混亂的狀況。
「我認為我哋的確被捲入咗一啲神秘事件入面，但再係咁混亂落去都唔係辨法。所以我提議搵一個人帶住我哋，去討論呢件事。不過我先講明，我呢個人行動力係有，不過我諗嘢完全唔掂，所以我唔希望由我帶住大家。」
眾人你一眼我一眼的，就是沒有人願意站出來。
「我提議呢位先生帶住我哋討論。」OL突然指著我說。
「嗯，我都贊成。」阿康附和，其他人則無可不可地看著我。
「吓？我......我唔得㗎。」我從沒有當過這種事的。
「其實，我都贊成。因為你頭先一直都好冷靜，無論係一群人埋嚟船尾、定係啱啱有人受傷，你都無特別緊張。」明叔也附和。
其他人也點了點頭，我就這樣莫名奇妙地被推出來帶領大家討論。
但是，到底應該討論甚麼啊？