<<坐上前往尖沙咀的天星小輪，迷失在維多利亞港>>: <<迷失四>>
小輪總算漸漸平穩下來，眾人確定沒有問題後，才慢慢站起來。
然後，我們都紛紛朝著發出慘叫聲的方向望去。
只見剛剛那手持電話的男性，正掩著右耳，臉上露出痛苦的表情。
「你無事呀嘛？」我檢起了地上的電話，走到那男的身旁。
「好痛......我耳仔好痛......」他痛苦地說。
正當我和其他人不知怎樣應對，一名較為年長的男性走出來。
「讓開，唔好掂佢。」這名年長者看上去應該超過六十歲了。
只見他輕輕拿開了那男人掩著耳朵的手，仔細地觀察了一會。
然後又用手輕輕觸碰那男人，看來像在為他觸診。
「你覺唔覺得頭暈？」年長者向男人詢問，那男人輕輕搖了搖頭。
「好彩，耳仔無出血，亦都無頭暈嘅感覺，應該只係鼓膜突然受到聲音刺激，鼓膜膨脹令到你覺得耳仔痛。如無意外，你休息一陣就無事㗎啦。」
年長者的說話聽起來十分專業，我們都禁不住盯著他看。
「其實我係退休醫生嚟，對我嚟講，呢啲係基本嘅醫療知識嚟啫。」年長者解釋。
「我......我好啲啦，多謝......」過了一會，那男人表情稍為緩和，看來疼痛開始減退了。
「叫我明叔啦。」
「多謝明叔，我叫阿華。」阿華向明叔道謝。
「嗯，你仲有無唔舒服嘅感覺？」明叔詢問。
「耳仔入面仲有啲痛，同埋有少少耳鳴。」阿華回答。
「咁過多陣應該會好啲㗎啦。不過，點解你會突然間痛成咁？啱啱應該無任何嘅聲音會令到你耳仔受損先啱。」
「電話......我部電話......」
「喺呢度。」
阿華從我手上接過電話，然後放到耳邊。
「可惡！」
「做咩呀？」我問。
「電話打唔通......無晒訊號......」阿華消沉地說。
「咩話？」聽到這話的眾人，都馬上拿出手機確認。
「大鑊，真係打唔到電話，連上網都唔得。」現場的人紛紛鼓燥起來。
「阿華，到底發生咩事？」明叔問。
「其實啱啱我畀架船震醒咗，然後我發現已經喺十二點，我驚我個女會喺屋企一直唔瞓等我返去，所以我就打返屋企叫佢瞓先。咁開頭都無事嘅，但愈傾個電話收得愈差，突然之間，個電話仲發出一下好尖嘅聲音，我即刻覺得隻耳仔好痛，痛到我暈咁滯。」
「咁依家點算呀？」
「收唔到電話，有客搵我就死梗啦。」
「有無咁黑呀？無啦啦遇到啲咁嘅嘢。」
知道了電話失去訊號後，大家又開始吵鬧起來。
「大家冷靜啲先，收唔到訊號都無辨法。我建議我哋都係盡快到下層駕駛室，就算船長真係出咗啲咩意外，駕駛室入面一定有其他通訊嘅設備。咁到時我哋就可以求救啦。」阿康拍了拍手，站出來安撫了鼓燥的眾人。
「咁快啲開門啦，仲等咩？」剛剛那不太友善的女生在催促，我對她的印象又差了一點。
但阿康似乎毫不在意，他把手放到手把上，嘗試開門。
「果然鎖住咗。」阿康搖了搖頭。
「撞門啦。」不知是誰提議。
阿康頓了頓，然後便重重地踢向木門上。
「碰」的一聲，木門沒有如預期般被撞開，反而阿康被反作用力弄得跌倒在地上。
「唔係啩，咁都踢唔開？」眾人看到阿康這用力一踢竟無法把這看起來十分脆弱的門給踢開，都感到不可思異。
「你無事呀？」我伸手扶起阿康，觸碰到他時，從手上傳來顫抖的感覺，相信剛剛那一踢真的是用了很大的力氣。
「我無事，不過，呢度門真係唔知咩構造，我啱啱用盡全力踢落去，感覺就好似踢落一道牆上面噉。」阿康搖了搖頭，似乎也無法相信竟無法踢開這道木門。
「等我試下。」我環視了一下眾人，以體格來說，除了阿康外，我應該算是最健壯的了。
我先握著把手，嘗試拉一下木門。
我用了很大的力氣去拉那道木門，結果真的如阿康所言，我就像在拉一面牆壁一樣，完全沒有辨法將它打開。
「無理由，明明係一道木門嚟，點會連拉郁嘅感覺都無。」
我不死心地再次嘗試，這次我用力地用上身撞向木門，但木門仍然紋絲不動，還使我手臂隱隱作痛。
「你係咪男人嚟㗎？連度爛鬼門都開唔到，無鬼用！」剛剛那不友善的女人又再口出狂言。
「你講到咁叻咁勁，不如你試下開呢度門啦。不過我估你呢啲得把口嘅死港女，都唔會開到㗎啦！」我稍為有一點動惱，對著這種口沒遮攔的人，我是不會客氣的。
「你講咩呀？你話邊個係港女呀？」這女人聽到我的說話後，開始抓狂起來。
「呢度仲有邊個港女得過你呀？你除咗喺度講廢話仲識做啲咩？」
正當我倆爭持不下，其他人都在旁看戲時，明叔開口了。
「好啦好啦，兩個都唔好嘈啦，我哋都係諗下有咩方法打開度門啦。」
「阿叔，呢壇嘢唔關你事，唔好阻頭阻勢！」這女的不願意接受明叔的勸架，還愈吵愈烈，好像控制不了自己似的。
看到這情況，其他人亦忍不住開口。
「喂，明叔做好心勸交咋喎，你做咩鬧佢？」
「咪係，個後生仔講得啱呀，你係咁勁嘅咪打開度門囉，唔好喺度得把口。」
「講嘢咁無禮貌，我係女人都唔幫你。」
眾人你一言我一語，紛紛都把矛頭指向這語氣囂張的女人身上。
「做咩呀？你哋憑咩鬧我呀？你哋當自己係邊個，有咩資格鬧我？」
「大家都唔好嘈啦，依家嘅情況情緒唔好係正常嘅，大家盡量包容下啦，後生女你都冷靜少少先。」明叔繼續勸架，並嘗試安撫這囂張的女人。
「冷咩靜呀？我又無做錯，做咩要我冷靜？仲有，你做咩淨係同我講，你唔叫佢哋收嗲？佢哋收嗲我咪冷靜囉。」
這女人不但沒有收斂她的態度，而且更變得愈來愈暴燥。
「明叔，算啦，我哋唔會好佢啦。呢啲女人點講都唔會聽，由得佢繼續發癲，我哋諗下有咩方法開門罷啦。」明叔原想繼續勸她，但我阻止了明叔，畢竟跟這種女人再說下去，也不會有任何結果。
而且，眼下的情況實在有點奇怪，這樣無意義地爭論下去對事情沒有任何幫助。
於是，我無視了她的謾罵，和其他人商議如何把木門打開。
「喂！做咩呀？唔理我算係點呀？答我呀！」
任那女人如何大吵大鬧，我和其他人始終無視了她，就當她是吵鬧的空氣吧。
「出聲呀！我叫你出聲呀！」
那女人走到我身旁，狠狠地摑向我的臉傍。
我向後退了一步，使她揮了個空，結果，她整個人撲了個空，倒在地上。
面對這情境，我實在忍不住笑了起來，而在場的其他人亦偷偷竊笑。
「你哋笑咩呀？唔準笑！唔準笑呀！」她聽到我們在取笑她後，她的情緒更加激動。
可是，接下來的情況，我們卻笑不出來。
只見她拉起了手袖，手臂上露出了大量的傷痕，那是割脈自殺的痕跡。
本來以為她只是一個自我中心的港女，誰想到她竟然是有自殺傾向的瘋子。
就在我們都嚇得呆住的時候，她從口袋裡拿出了一把小刀。
我們都害怕得退後了數步，深怕她拿著刀子就這樣刺向我們。
「你哋同出面啲人都一樣，都係睇我唔起！我努力做嘢，你哋就喺背後笑我；我明明無做錯，你哋就將矛頭指向我，逼我認錯！我唔會再聽你哋講，我唔會呀！」她激動地揮舞著手上的刀子，眼神裡充斥著的卻不是殺意，而是滿滿的不信任和絕望。
「小姐，你聽我講，我哋信你，你無錯，你係啱嘅。」面對這情況，明叔仍然堅持要勸她，他也太過執著了吧。
「你唔駛呃我！你同佢哋一樣，你同佢哋一樣......點解要咁對我，點解......」她由歇斯底里突然變得陰沉低落，這轉變實在有夠大的。
眾人看到她沒有剛才那麼暴燥，都稍為安心下來。
只有明叔看到她這個樣子後，顯得十分慌張。
「唔好呀！」明叔邊喊邊跑向她，像在害怕甚麼發生似的。
我們還沒有意識到明叔的用意，事情便已出現了變化。
那女人，竟然拿著手上的刀子，狠狠地朝手腕上的大動脈割下去。
漆黑的夜裡，孤寂的小輪上，誰也沒有預料到，事情會發展成流血事件。
到底，我們能夠平安回到岸上嗎？