上左個肥婆身, 好難移動呀: 第九章: johnny

果晚我冇再望過佢地之後點樣，我就同johnny走左。一路上johnny見到我個樣，都唔係好敢岀聲。就咁樣一直陪我行左好多條街。最後我地行左去個公園入面。
我訓係滑梯，望住個天發呆。
合起雙眼，腦入面響起katrina既旋律。
「何時心死  還期望他喜歡你   誰會這麼的不服氣  竟有個人　陪你一起　就似你」
訓係我隔離滑梯既johnny，竟然又哼起呢首歌。
原來佢唱歌都幾好聽。
佢望望我，不經意咁問:「想唔想聽下我既故事？」
「麻麻地啦」
「故事發生係我中學既時候。」
屌，咪又係照講，假民主。




「果陣我中六，有個同班既女同學，我暗戀左佢三年。
佢有住塊包包面，小小肥，但笑起上黎總係可以比到好大正能量我。佢係果種，你見到佢笑自己都會自然心情開朗既人。
為左可以見到佢笑，佢叫咩我都肯做。做功課，借書比佢，冇m巾就揾圍問人借比佢。呢啲對我黎講都係濕濕碎。
因為當你好鍾意，好鍾意一個人既時候，你會覺得，佢比自己重要十倍。」
我聽到呢到:「咁之後你地有冇一齊到？」
Johnny苦笑左一下，答我:「有。」
「但最後先發覺，越愛一個人，你越難擁有佢。有幾愛，就有幾痛。冇人可以逃離呢種厄運。」
「而揾一個，冇咁愛既人。大家互相帶比大家既傷害都冇咁大，反而可以白頭到老。」
「所以大部分人既結婚對象都唔會係一生最愛。好似我老豆有三個老婆都唔夠就知啦。你個故事都好老套姐。」我借啲意挖苦佢，點知佢係都要駁翻我一句:
「你咪同我一樣，唔係洗咩而家同我呢件老套野一齊攤係度放負」




屌，又比佢串到應一應。兩個loser一齊係度放負。不過感覺有人明白既痛苦，好似變得冇咁難承受。

「johnny...上次件事sorry呀，我諗住你係想呃錢我先想報仇...」我突然諗翻起上次我都係過分左既。
「其實為左錢我唔係第一次咁岀賣自己，冇野啦，岀得黎行預左。我係嬲你唔比錢我姐。」
估唔到佢竟然冇放上心。屌，搞到我越黎越內疚。
「你因咩事咁缺錢？」
「咪又係果啲老套野囉。我屋企係做室內設計加裝修果種一條龍服務既，連拜四角，風水果啲都包埋黎撈。但我老豆比個拍擋穿櫃桶底重用公司名差落一大筆債。我老豆要面唔想報警搞到咁大。一時間冇咁大筆錢咪岀黎撈囉。
講起上黎我多謝你先啱。你打電話比我果日，原本我地含家產諗住燒炭一鑊熟嫁啦，點知聽完你個電話突然多左300萬，果晚我地全家即刻拎包炭岀去bbq慶祝。」
我聽到呆左。估唔到我從來亂咁揮霍既錢，竟然係人地掙扎求存既希望。突然覺得好慚愧。
其實johnny都係一個可憐人。




「你一早同我講...我知你係呢個處境一定幫你，好彩而家冇事咋。
不過我想問下...你頭先話你公司包埋拜四角，風水呢啲野？你地公司請埋風水師嫁？」
「唔係，係我老母。
你信唔信呢個世界有鬼先？」
我諗，
冇人比我係呢個世界更加相信有鬼。