上左個肥婆身, 好難移動呀: 第一章:上身
我而家，寸步難行，大氣都抖唔撚到。
因為我上左個200磅既肥婆身。
點都估唔到，我會有200磅呢一日。
話說我生前係好撚注重飲食，咩煎炸油膩甜野通通唔食去keep住我22寸腰，日日保養，得閒做下facial引下狗公咁就一日。
所以我死左之後ig都有成千個rip嫁，我都知大家都唔捨得我。
相反，我個妹因如，個名唔單止聽落似某個肥藝人，連個身型都一樣。
廿歲人已經成200磅，肥到座山咁。
不過我最中意同佢影相，顯得我瘦吖嗎。
講翻我先，點解好地地我會上左因如身！
事關我本人叫心如，因如係我細妹。
不過我同佢唔同老母岀既。我屋企算有頭有面既人，老豆大大話話都已經有3個老婆。呢3房人當中，我老母就係大婆，因如係三房所生既，算地位低啲啦。
二房早幾年去左淨翻個仔。
所以總括講我有一個細佬一個阿妹。不過大家關係都麻麻，可能本身幾房都各懷鬼胎，成日叫我地幾兄妹唔好接觸咁多。
而家我係因如入面，我醒翻已經見到成屋都白色，仆街，行岀個廳重見到我張車頭相放左係啲祖先隔離。
呢下先意識到我真係死左。
聽翻講我係咖啡因過量中毒死，但警察未查到邊個做。
我死前淨係記得，飲完杯咖啡我就好眼訓咁死左。
醒翻就發覺係因如身。
咁因如呢？
我行翻岀廳，發現我阿媽好憔悴咁坐左係梳化度，成個人落哂形，睇到我個心好痛。
相反，三房坐係梳化度，眉飛色舞咁，不知幾好氣息，同工人有傾有講，差在未開張麻雀枱玩翻2手。依家我死左呀
班人真係冇人性嫁！
我即刻跑去攬住阿媽:媽咪，我係度呀！
點知我阿媽唔知係比我啲脂肪壓親定點，嚇到透唔到氣咁款。
「陳因如你作死呀！你老母係度呀！」katy姨係後面嬲住咁叫。
係喎，而家我係因如，我老母係katy姨先啱。一時未適應傻撚左添。
而我老母，而家要嗌佢媚姨，一野推開我。
都係既，而家我呢個行為係佢眼中都唔知攞景定贈興。
我唯有慢慢行翻去katy姨度。
屌，行2步已經岀哂油。唔怪得平時因如咁少岀街又冇咩朋友咁，可能驚自己啲肥油嚇親人。
不過除左肥，因如平時都算又靜又乖既，又肯幫我影女神相呃like。
可惜，又有邊個會留意下佢既內在美呢？
冇幾耐二房個仔杏子落埋黎，我都唔明一個大男人個名點解可以咁女人，不過都襯佢既，因為佢長期病樣，而且身體好潺，瘦到得棚
骨咁。不過好彩有錢，佢得160但都靠父幹食唔小女。
之後我老豆落埋黎，算係成家齊整係廳。我老豆個樣真係有啲似李嘉誠，一睇就覺商人樣，不過真係本事既白手興家而家過億身家。
平時老豆都有教開我從商，好似係有意將來會比間公司我管。
而家我死左，我老豆個樣都憔悴左。佢落黎講左2句，大概係都過左去，而家唯有等警察查，叫我地大家好似平時咁做翻自己野，節
哀順變。
現場除左我阿媽喊到豬頭咁，其他人真係入房做翻自己野。
我默默行翻入房，望左眼媽咪同爸爸。
放心，我一定會揾到兇手，還翻我一個公道咖。