[愛情][少甜]我地係炮友定係情侶【每日00:00更新】: 7b

《張梓謙視角》
亭亭玉立嘅希雯企喺我前面，沉呼吸咗一下：「我好鍾意你，自從我第一眼見到你我就有種砰然心動嘅感覺，不如我哋一齊呀！」

「我都鍾意咗你好耐，我永遠永遠都只會愛你一個」我踏前一步

希雯甜美咁笑一笑：「以呢種水準，我哋班際話劇實贏緊，劇本寫你講完應該要攬住我」佢低頭研究幾秒，「不過遲D先啦，而家練好對白就夠㗎啦！」

我坐喺張櫈度打咗個大喊露，「聽曬你話啦大導演！十年後金像獎實有你份，遲幾年tbb揾埋你做女一都有機！」
佢背住我偷笑，然後就話我又亂吹。



不過希雯，份劇本寫得啱㗎，我永永遠遠都只會愛你一個，我會用我一生去守護你……

「八點幾啦喎！你唔洗返屋企咩？」佢問我
「幫你洗埋碗先啦，呢個世界無免費晚餐㗎嘛！」
枱面上有兩碟食得七七八八嘅餸菜同兩個碗，雖然我好少幫阿媽煮飯洗碗，不過得幾隻碟仔難唔到我嘅~
希雯求其點咗下頭就去咗沙發篤機，就咁背向我攤咗喺沙發，呢個係佢信任我嘅表現。就算忍得幾辛苦，我都絕對唔會破壞呢份信任。

不出所料洗幾隻碗，已經搞到個廚房好似啱啱打完仗咁，仲要成地濕到一個點。為左收拾殘局，我搞到九點先出返嚟，而我出到嚟就見到希雯瞓咗喺沙發沉睡。老實講見到自己心愛嘅人，毫無防禦咁瞓喺自己面前只係少D定力都精盡人亡。不過我就係唔衝動嘅好男人，而且對住佢，我只會保護而唔係傷害佢。

我靜靜留下字條，靜靜幫佢冚被，靜靜拎走佢條後備匙，準備無聲無息咁走。走之前我見到佢部電話有一個新嘅whatsapp，係簡智朗send嚟㗎，係時候對隻狗公仔下個馬威啦！



{簡智朗吓話？}
【你邊位呀？點解有我電話？】
{我警告你唔好再搞希雯，佢已經夠慘夠煩㗎啦！}
【你係喺車站嗰個男仔？】
{總之，如果你傷害到希雯嘅話，我係唔會放過你㗎！}
【你放心，我哋乜都唔係！】
{最好係啦厹！小心我告你性騷擾}

我無興趣知佢嘅回應，反正我要做嘅野已經做完，接下來就係返歸瞓覺嘅重大任務同面對親愛嘅母親嘅訓話。



「阿仔呀，人地希雯大好女仔嚟㗎，你唔好對唔住佢添呀！」

但明明……我咩都無做過……