日本食人魔《十六歲透明感少女黑夜狩獵事件》: 第五十九節B
市川說到這裡握緊手中的槍，姑媽見狀立即開聲喝止︰「你唔好亂嚟呀！！」
「……子彈都打你地唔死……究竟你地係乜嘢怪物……」市川喘著氣苦笑的說，然後又忽然笑起來。只是那笑聲當中滿是孤獨寂寞。
「……我係你身上見到以前嘅自己……」市川笑聲轉靜以後，對著張恩東說。
「個時我同你一樣咁迷茫……時刻都係到諗點解我會做出一啲咁奇怪嘅事……」
「所有人都同我講，我做嘅嘢唔啱……但係我諗唔明，咁點解我會一路都想做？一直想要其他人身上嘅肉……」
「細個嘅時候，我係到諗……或者食咗其他人嘅肉，我嘅外表會變得正常…身體會變得強壯……」
「然後就變成一個正常人一樣，返工，談戀愛，生小朋友……」
「到後來大個之後先知道，哩個只係泡沫一樣嘅夢……」
「外面嘅世界根本就唔屬於我嘅……我只係畀人拉住手腳嘅木偶，係台上做馬騮戲……我嘅人生過得點樣，跟本唔會有人在乎……」
「佢地只係吸乾我身上面嘅養分，按照設定好嘅劇本，將我一步步推向滅亡……」
「我冇講錯啩……」
張恩東沒作聲，只是靜靜的聽著。
然後市川又轉頭看著Amber說︰「你知嘛？我原本打算食你嘅肉……係第一次見到你之後，就有想要將你吞落肚嘅慾望……」
「但當我照鏡見到自己，我就知道我地之間嘅距離有幾遠……」
「我時刻都係到諗，或者終有一日，有一個人，會靜靜地咁行近我身邊，然後同我講︰我鍾意你……」
「我嘅要求就只係咁簡單……只係想要係生存落去之中，有少少咁多安慰……」
「但係從來都冇發生過……就連夢裡面都冇發生過……」
「哩種心情……你會明咩？」
「我求下你殺咗我啦……就算將我好似林光正咁割開十四份……我都冇所謂……我已經生存得太耐…太漫長……」市川說完以後一陣苦笑，然後咳了幾聲，幾點血沿著口角滑落到地上。
「唉！我頂唔順喇！再聽哩個痴線佬講落去，我都就嚟痴線！Amber你幫我抱住個細路，我而家就殺咗個痴線佬……」姑媽說著就向Amber走過去，把孩子塞在她懷中。
此刻Amber的心思彷彿飄到無限遠，只是茫然的對著空虛處出神。心裡面一遍又一遍重覆想著市川的說話。
「唔好…殺佢……」張恩東一手掩著腰間的傷口，慢慢撐在地上起來說。
「咩話！？點解唔殺？？？」姑媽大惑不解的問。
張恩東撐著身子，一步步向著市川走過去，停在他面前。沉默了好一會以後，才開口說︰「你係話……我地原本都想要搵到屬於自己嘅世界……但係忙咗一場之後，先發現嗰個世界根本就唔存在……係咪？」
市川沒答話，只是靜靜的點頭。
「東！快啲殺咗佢啦！唔好再同佢亂講一通！」姑媽朝著他大叫。
張恩東沒理會她，靜靜的拉起襯衫，發現腰間的傷口正在此時癒合。體力也在漸漸回復，傷口再也不痛了，只是帶點癢癢的。
「子彈都打我唔死……我又係乜嘢怪物……我而家又生存係一個乜嘢世界裡面……」張恩東低頭看著那傷口自言自語的說著。
嘆口氣，然後就走到Amber身邊拉著她的手。只見Amber全身突然像觸電般彷似從夢中醒來。
「我地走喇……」張恩東對她說。
Amber只是對著虛空處發呆，然後就抱著嬰兒，轉身向著雞棚外離去。
姑媽完全不了解他兩個人發生了甚麼事，看著Amber一個人向著通道裡走進去，搶過來張恩東身邊問︰「搞乜嘢？發生咩事？唔殺佢嗱？」
張恩東只是搖頭，然後說︰「……我而家淨係想搵返阿魚……」說完，就跟在Amber身後離去。
「痴線架！……你地一個二個都痴晒線！！」姑媽回頭望了市川一眼，最後只好把他丟下，跟著他兩個離去。
市川同樣不明白為何張恩東決定不殺他，撐著就想要爬起身。只是氣力已經不足夠讓他起來，只好用最後一口氣大叫︰「搞咩呀！？點解唔殺我！？點解唔殺我！？」
張恩東雖然聽見他的叫喊，但沒想過去理會。
「張恩東！！！」
「你唔好走！！！」
「返嚟……返嚟殺咗我……」
「你地想將我點都可以……將我撕開兩邊都可以……」
「求下你地唔好走……唔好丟低我一個……」
市川的叫喊聲正在身後慢慢減弱，那聲音裡面滿是絕望。
「張恩東！！！」市川用盡最後的氣力竭斯底里叫著。
張恩東在黑暗通道裡面停下腳步，回頭只見微弱火光之中，市川正慢慢舉起手上的槍，塞在口中含糊的說︰「 張恩東……我地都只係一步步咁向住滅亡走過去……」
然後砰一聲巨響，火光閃過，市川的身軀最終軟癱倒下去。
在火光閃過的一瞬間，張恩東彷彿見到市川身後有影子晃動。
也許只是錯覺，又或者是火花造成的短暫眩目。
那時候，張恩東見到一隻長毛猿猴，正站在市川身後，靜靜的向著那陰影角落退進去。