荒島日記（新手、後宮甜）（不定期更新）: 地下.二
「呢到就係黑市？」
係Jennie嘅帶路下，終於嚟到郵輪地下一層。
位於郵輪地下一層嘅黑市，同八九點後就漆黑一片嘅郵輪大堂相比，呢到燈火通明，而且無論係擺攤定係顧客都非常多。
唔講真係唔知宜家已經係凌晨時分。
Jennie見我滿懷好奇便提醒我。
「啲嘢好貴㗎，一般人係買唔起。」
「我都無錢，我睇下姐～」
今日捕魚換返嚟嘅糧票全部係曬辣椒妹手上。
嘩⋯呢啲係⋯
我嘅目光俾其中一個攤位深深吸引著。
「靚仔識貨！我呢到有成個郵輪最多種類嘅刀，你想要咩類型嘅都有！係第二間絕對無我咁多！」
四十歲左右嘅男攤主展示佢攤位上嘅廚刀系列。
佢好溫柔咁攞起其中一把。
「比如呢個，XXX主廚刀，德國製造，柄身使用最先進嘅合成物料，符合人體工學設計，就算使用五六個鐘都唔會攰，簡直係very beautiful！very powerful！」
我無理會佢，繼續睇其他刀具物品。
我只係望咗唔夠半秒其中一把，攤主立刻起勁又攞起嚟講解。
「呢把仲勁！XXX牛刀！日本製造，大馬士革紋，全場240mm，製造商有500幾年歷史，早期係以生產武士刀而聞名，亦係本店嘅鎮店之寶！只可以講very beautiful，very powerful。」
感覺佢係個刀癡嚟⋯
「呢把都唔錯！係XXX嘅菜刀！中國製造⋯⋯」
個攤主又繼續滔滔不絕咁講解把刀⋯⋯
Jennie細細聲係我耳邊講。
「快啲走喇⋯你仲想聽去講落去啊⋯」
於是我同Jennie趁個攤主無注意到我地便偷偷離開⋯⋯
「有無興趣？」
突然身後傳嚟把年紀大約五十歲嘅男人聲。
我擰轉頭一望，見個中年男人坐係攤位前，翹著雙手望住我，我望一望佢攤位嘅物品，係一把左輪嚟！
竟然有槍賣？
咪住！會唔會係假嘅⋯或者係⋯
我回想返起係營地嘅時候比肥佬陳用無曬子彈嘅手槍威脅嘅日子⋯
「我呢把係真槍嚟。」
中年男人見我疑惑嘅眼神後便立即答。
「竟然有槍！」
隔離亦有人發出驚訝。
我望向旁邊，係一個年紀同我差不多大嘅少女，留著飄逸嘅啡色長卷髮，身材十分高挑，雪白的肌膚大大的眼睛，俾人感覺好似童話故事精靈仙子。
睇佢嘅五官，應該係混血兒嚟。
Jennie用手篤一篤我個肚。
「喂，做咩係咁望住佢，未見過靚女啊？」
「佢係邊個？」
我係Jennie耳邊細聲問到。
Jennie亦細聲係我耳邊回答。
「佢係彭婉兒，有錢女嚟㗎，屋企好似係香港屬於名門望族嚟，啱啱係國際學校畢業，準備去外國升學，而企係佢隔離嘅係佢保鑣，叫曾安泉。」
「佢個名叫真安全⋯認真呢⋯」
我望向企係有錢女婉兒身後嘅少年。
Jennie用力打咗我個肚一拳。
「你以為我講笑啊⋯佢個泉字係溫泉個泉⋯」
呢個名究竟係點樣諗出嚟⋯
有錢女婉兒向我微笑一下便望向其他攤位，而佢嘅保鑣面無表情咁跟係佢身後。
待有錢女同保鑣離開走去其他攤位後，我先再問Jennie。
「個保鑣同個有錢女好似一樣年紀喎，你確定佢真係保鑣？」
Jennie有些無奈後繼續說到。
「真係㗎！安泉由細細個已經開始培訓成為保鑣，佢由細到大就已經貼身保護婉兒，返學都一齊返，去到邊都係一齊。」
我繼續望向佢地兩個嘅背影，彭婉兒不斷望周圍攤位上嘅貨品，而佢身後嘅曾安泉，眼觀四方保護著佢。
真係第一次見上流社會嘅人，原來真係有股與眾不同嘅氣質⋯
我回過神後，發現旁邊Jennie唔見咗⋯
不遠處，見到Jennie好似俾人勾走靈魂，向著一個方向行過去。
「阿奇⋯」
我望向Jennie邊行邊望住嘅方向，只見到一個光頭大叔。
佢係阿奇？個樣咁老嘅？一啲都唔似啱啱畢業嘅大學生喎⋯
我拉停了Jennie。
「你睇錯喇，佢唔係阿奇。」
「個部⋯阿奇嘅相機⋯」
Jennie指住光頭大叔攤位上嘅全黑單反相機。
「你又咁肯定係佢嘅？」
「因為佢係個機身上綁住嘅手繩係我送俾阿奇⋯個部一定係阿奇嘅相機⋯佢肯定知道阿奇係邊到⋯」
Jennie講完，便急不及待地想跑向光頭大叔嘅方向。
我一嘢拉住Jennie。
「喂⋯你冷靜啲先⋯」
「我好難得先搵到阿奇嘅線索⋯」
Jennie回過頭嚟，我先發現佢眼眶早已泛紅⋯
「我知⋯但如果你咁樣貿貿然走去問佢，你覺得佢會同你講咩？佢肯定乜都扮唔知，而且你會害咗自己。」
Jennie用手抹去眼眶上嘅淚水。
「咁我可以點⋯」
我思考咗數秒。
「我應承你，我會幫你調查，幫你搵阿奇，但我好希望你唔好打草驚蛇，ok？」
「點解你要幫我？」
「我講出嚟你唔好笑。」
「你講啊，我唔會笑。」
Jennie一臉認真咁望住我。
我尷尬地望向其他地方。
「因為你好似以前住係我屋企隔離嘅姐姐⋯」
「哈！」
Jennie聽到後露出笑容。
「喂！你又話唔會笑⋯」
待續