荒島日記（新手、後宮甜）（不定期更新）: 二人.五
「你有無聽過香港福建同鄉慈善基金青少年協助委員會？」
稀疏男講得有啲快，我聽得唔係好清楚。
「咩啊？福建乜嘢慈善乜嘢協助會啊？」
稀疏男嘆了口氣，放慢語速講。
「係香港福建同鄉慈善基金青少年協助委員會。」
我都係第一次聽咁長嘅會名。
「我無聽講。」
「我同大佬興係依個委員會嘅會員嚟。」
我指著稀疏男大罵到。
「你地兩個咁大年紀都算青少年？！」
稀疏男啤了我一眼，然後繼續講。
「挑！我係裡面係最後生㗎！咁我地委員會嘅宗旨係幫助福建同鄉在港嘅協助，包括在港就業、律師支援、爭取福⋯⋯」
聽住稀疏男仲係到介紹佢個乜嘢委員會。
「我唔係好想了解你個咩嘢青少年委員會嘅運作，同我講重點！」
稀疏男鄙視了我一眼，然後開始回憶起依個郵輪之旅。
「我同大佬興因為係週年飯局抽中咗免費郵輪嘅獎，所以跟住個會去旅行。
出事個一日，海面十分平靜，天氣晴朗，萬里無雲，偶然會見到有小海鷗在海上捕魚，會見到有飛魚群在海面跳躍⋯⋯」
睇住稀疏男好似朗誦咁一邊講一邊意境，我真係恨不得一拳打過去。
「講重點啊！」
俾我打亂意境中嘅稀疏男感到不爽。
「我就嚟講重點嘅喇，你冷靜啲聽我講埋先。
出事個日下晝，我地香港福建同鄉慈善基金青少年協助委員會，同另外一個都係嚟自香港嘅協會，包咗郵輪最頂嘅地方開party。
場面非常熱鬧，然後由於人數過多，我地又租埋另外租嘅泳池同室內，有成二百幾人，我地上面嘅人一齊共進美酒佳餚，吹著看風，看著海天一色，互相交流下心得⋯」
我握緊拳頭，稀疏男望到我雙眼殺氣騰騰，手臂青筋暴突，便立即講快啲。
「突然海面周圍嘅天氣變得十分異常，原本萬里無雲嘅天空突然烏雲密佈，幾分鐘後便雷雨交加，十分惡劣。
郵輪開始搖晃得好厲害，咁我地就決定早啲結束個party，準備返入船艙裡面，點知郵輪嘅底部傳出巨響，然後郵輪搖擺得嘅幅度更加傾斜，更加嚴重。
有個以前做過船工嘅同鄉立即話架郵輪就嚟唔掂，我地所有人見到咁嘅情況，就決定坐上救生艇離開。」
我指住稀疏男。
「哦！唔怪得聽人講啲救生艇就嚟無曬，原來係你班仆街百幾二百人坐曬。」
稀疏男立即擺出副冤枉嘅樣。
「唔可以怪我㗎⋯我都係聽佢地指示㗎⋯我大佬興因為太大隻連救生艇都無得坐⋯最後佢係靠自己游上岸。」
「光頭佬咁有運動細胞嘅咩？咪住！你所講嘅佢地指示，係講邊個？」
稀疏男挨近過嚟，搞到好神秘咁。
「係我地香港福建同鄉慈善基金青少年協助委員會第七屆嘅永遠榮耀⋯⋯」
我狠狠抆了稀疏男嘅一條頭髮。
「講重點！」
稀疏男痛到摸著頭殼頂說到。
「我地嘅委員會會長，鼎爺，我地所有人嘢都係聽佢指示。」
稀疏男在附近執起一條樹枝，用樹枝開始在地上畫地圖，然後在一旁解釋。
「咁我地被沖到上嚟依個島，所有通訊設備通通無用，同外界無辦法聯絡，原本大家耐心等待救援，但等咗差唔多一個月，仍然唔見有人嚟救我地。
咁鼎爺佢地幾個商量咗一日，就決定我地一邊等待救援，一邊解決食物同居住嘅問題，於是我地就成立咗兩個隊伍，一隊係負責打獵嘅，另一隊係負責起樓嘅。」
我無聽錯嘛？起樓？
「起樓？你地係個島上面起樓？」
稀疏男點一點頭，繼續講。
「我地有唔少同鄉都曾經做過建造業，一開始我都係見佢地起啲木屋之類，後嚟唔知佢地係邊到搵到材料，開始燒磚起屋。
咁我地個到，慢慢就發展成一個村莊。」
我望住稀疏男在地上畫嘅地圖，然後思考咗一陣。
「咁條村距離依到有幾遠？」
「係幾座山後面，大概要行十幾日。」
稀疏男指住一個方向，一個我地原本打算前往嘅方向。
稀疏男繼續一邊講一邊畫。
「後嚟房屋同食物嘅問題完全解決後，鼎爺就再成立一個隊伍，由一班有豐富行山探險經驗嘅人組成，佢地係負責探索依個島周圍嘅情況。
佢地個隊人帶夠食物，就會向住一個方向進發一個星期，再返嚟報告情況，然後再向另一個方向進發。
頭六次嘅探索，佢地都只係搵到新嘅材料，新嘅蔬果之類嘅嘢，直到第七次，探索隊兩個星期後仍未返嚟。
我地見佢地咁耐無返嚟，以為佢地已經係遇難，點知又過咗一個星期，探索隊終於返咗嚟，而且帶嚟咗一個驚人嘅消息。」
我好認真咁望住佢。
「乜嘢消息？」
稀疏男左望右望，然後細聲講。
「佢地話係十日嘅路程上嘅海邊，搵到一個由其他生還者聚居嘅地方，人數大概接近三四百人，而且⋯」
三四百人⋯咁即係大部分嘅船難嘅生還者都係曬個到⋯
「而且乜嘢？」
「而且有好多女性係個到居住，個時我地聽到女人依兩個字都即刻癲曬，因為我地住個到，男女比例已經好嚴重，女人已經十指可數，而且俾頂爺個班高層包曬。」
睇嚟係一班餓咗好耐嘅狼，一班比稀疏男年紀仲要大嘅中年色狼阿伯。
「後嚟聽講鼎爺派人去了解下，準備打算搬過去，點知鼎爺其中一個下屬因為發生咗啲事而俾個到嘅人打死咗，聽講係搶人老婆。
於是鼎爺聽到下屬嘅噩耗就嬲到立即集結一班人去還拖！去搶地搶糧搶女人，但佢地估唔到對面陣型係易守難攻，導致我地死傷慘重。」
我托著腮思考一會。
「咁你同光頭佬呢？係唔係都有份去打人？」
稀疏男聽到後立即否認。
「我地無啊，我同大佬興係負責條村所有人嘅飲食，我同佢無出過條村，所以根本唔知佢地所講嘅地方係邊，依啲事全部都係聽佢地講。」
我疑惑咁望住稀疏男，要睇清楚佢係唔係講大話。
「你地兩個負責飲食？」
稀疏男拍曬心口表示。
「唔好睇我大佬興傻傻更更，煮嘢食係有一流嘅水準，而且佢地裡面有幾個好勁嘅人，根本唔洗我同大佬興出手。」
「好勁嘅人？」
稀疏男誠懇地點頭。
「係！一個玩飛刀玩到出神入化，一個識縮骨功嘅人，仲有一個識訓練動物嘅人，係喇！仲有一個醫師，雖然醫術一流，但佢嘅愛好竟然係整毒藥，搞到我病咗都唔敢搵佢睇⋯」
「你地個委員會嘅成員都幾勁喎，各行各業嘅人都有，連飛刀縮骨功依啲特殊技能嘅人都有。」
稀疏男意味深長地嘆了口氣。
「佢地唔係我地委員會嘅人，我地本身唔識佢地，係突然有日，佢地跟住個著西裝戴住鳥嘴口罩嘅男人嚟到我地條村⋯」
「戴住鳥嘴口罩嘅男人？咁奇葩？」
依個人絕對有中二病。
「佢係一個怪人，鐘意自己一個人食飯，而且後嚟決定攻打嘅事，都係佢同鼎爺獻計。」
咁睇嚟我地唔可以再向個方向前進，唔係就會遇到佢地。
「咁你地兩個點解會係依到？」
稀疏男深深地嘆了一氣。
「因為我見到佢地係點樣對待俘虜⋯實在係太殘忍，而且佢地第一次打敗仗後，就經常搵我同大佬興出氣，所以趁佢地大部分人再出發嘅時候，我就帶住大佬興逃離依個鬼地方⋯」
待續