荒島日記（新手、後宮甜）（不定期更新）: 離開

「大陸仔，我地依到所有人都等咁你嘅指示。」
四眼妹拍一拍我膊頭，令我回過神嚟，我望向前面，見到其他空地上嘅女仔都陸續走到我面前。

我望咗陣火紅嘅山頂。
「大家，我地要儘快離開依到，依到已經唔適合居住。」

啲女仔聽到後，紛紛轉身議論。
「搬屋？我地啲嘢仲係⋯」

「依家咁夜⋯」



見到佢地猶豫不決，搞到我都想嘔血。
「個火山已經爆發，噴出嘅岩漿會對我地有危險，或者造成好似依家嘅山火，遲早都會燒到落嚟，所以我地要快啲離開依到，搵一個安全嘅地方居住。」

「大家，我地依家就企係個定時炸彈下面，如果個火山噴出大量熔岩，我地想走都走唔切。」
雪兒走上前同仍然議論嘅女仔講。

「咁俾五分鐘時間大家考慮，五分鐘後，我地就會河邊集合，尋找新嘅地方居住，如果你仍然選擇留係到，就唔需要嚟集合。」
四眼妹講完，便帶住佢同居嘅女仔走向河邊方向，我同三女、達叔都跟住四眼妹走。



嚟到河邊後，四眼妹便轉個身同我地講。
「如果唔俾有限嘅時間佢地考慮，佢地就會一直猶豫到天光，依家俾五分鐘佢地，咁佢地就要係依短時間內快速選擇。」

「你又咁肯定佢地會快速考慮？」

「佢地處於被動，愈係猶豫，我地就愈要強硬應對，逼佢地短時間內做決定，依啲係我阿爺教我嘅做生意技巧。」
四眼妹得瑟地托一托副眼鏡。

「睇嚟你阿爺教唔少係商界打滾嘅技巧，你個家族生意好大㗎？」
達叔見四眼妹講到頭頭是道，於是問。



「唔大唔大，不過已經係百年老店，由太爺個代已經開始做起，經歷過九七金融風暴、沙士、零八金融海嘯，仍然屹立不倒，唔少名人明星都同我阿爺好熟，我阿爺仲上過唔少電視節目做嘉賓添。」
四眼妹一講起佢阿爺便感到高興。

聽到四眼妹咁講，我都忍唔住拍手，生意做到第三第四代係唔容易嘅事，如果以後有機會嘅話，我都想見下依位老人家。
「wow！四眼妹！原來你阿爺咁犀利㗎？唔怪得你咁識做生意啦，經商嘅果然係經商嘅，話時話，四眼妹你屋企係做咩生意？」

「大酒店囉。」

「大酒店⋯⋯」
我同達叔佢地幾個感到震驚。

旁邊嘅秋儀拉一拉我衫袖。
「學東哥，乜嘢係大酒店啊？」



我都唔知點講好，而雪兒同辣椒妹係一旁搖曬頭咁，四眼妹見我地嘅反應後，無奈咁講。
「做咩？殯儀館好失禮啊？」

「唔係⋯只不過唔係想像中嘅企業姐⋯」

「我阿爺間殯儀館好pro㗎，唔少明星都幫襯過，每年七月左右，各個電視台都有節目搵我阿爺做嘉賓，喂，大家咁熟，如果有機會返到香港，打個八⋯⋯唔⋯」
四眼妹未講完，達叔就已經按住佢把口，唔俾佢繼續講落去。

五分鐘過後，終於見到啲女仔走到我地依邊，四眼妹立即數人頭，然後打個手勢俾我知，我地依邊住嘅女仔已經齊曬。
「好啦，我地係時候⋯⋯」

「不！！！」
河對面營地方向，傳嚟人大嗌嘅聲音，我地互相望幾眼後，便一齊走向營地個邊。

穿過樹林，走到空地個邊，便見到十數人企咗係某個已崩塌嘅山洞前面，企係後面嘅高佬佳見到我地行咁過嚟，即刻篤一篤旁邊嘅肥豬劉。


「大陸仔佢地過咗嚟。」

而係前面嘅獅子狗，聽到高佬佳嘅說話，亦都擰轉頭望咗我幾眼，然後繼續望住前面。

「我的食物⋯我的食物啊⋯它們全都在裡面啊⋯」
肥佬陳跪係山洞前面哭喊著，而秘書Lily同凌兒在一旁拉扯住肥佬陳，生怕肥佬陳會衝入被山泥淹沒咗嘅山洞。

跟係我地身後嘅女仔見到肥佬陳哭跪係山洞前，便係旁邊議論紛紛，肥佬陳隨即擰轉頭望到我地眾人後，便快速跑到我地面前，對住我地講。
「你們⋯你們進去幫我取回食物，我就分三分之一的食物給你們。」

眾女聽到肥佬陳嘅說話後再次議論紛紛，而我望咗一陣俾山泥淹沒嘅山洞，便嘆了一口氣。
「個山洞已經被淹沒，無辦法入去，我勸你都係⋯⋯」

肥佬陳用力捉住我手臂。
「不！不！不！只要清了那些泥土，就可以進去的了，要不這樣⋯我分一半食物給你們！一半！裡面的食物很多！夠我們全部人吃一個⋯⋯」



「清咗啲泥入去又點？如果再嚟餘震，個山洞就一定會再崩塌多一次，到時將入去嘅人全部活埋。」
四眼妹係一邊不耐煩咁講。

原本有女仔想幫肥佬陳挖掘，然後分一杯羹，聽完四眼妹嘅說話後，便立刻退後幾步。

「不！！！我的食物啊⋯⋯」
肥佬陳無法接受，然後佢激動地跑返到山洞前，徒手挖掘堵塞山洞口嘅山泥，而秘書Lily同凌兒係一旁再次拉扯住肥佬陳。
「陳總⋯不要這樣⋯」

眾人望咁肥佬陳拼命挖掘山洞口嘅泥土時，嘉雯從人群中走出，然後走到雪兒身邊。
「雪兒，你地打算點啊？」

雪兒望一望我，然後同嘉雯講。
「個火山爆發，依到已經唔可以繼續居住，我地打算離開，搵個新地方生活。」



「我地都正有咁嘅打算。」
獅子狗走到嘉雯背後，伸手攬住嘉雯條腰，嘉雯立即用手推開獅子狗隻手。
「喂⋯⋯」


待續