荒島日記（新手、後宮甜）（不定期更新）: 爆發（10月8更新）

呀！呀！呀！呀！呀！

山洞口外突然傳嚟大量動物嘅叫聲，文健俾嚇到跑出獅子狗嘅山洞，驚恐咁望住天上嘅眾鳥亂飛。
「發⋯發生咩事⋯」



而另一邊。

數分鐘後，荒島轟隆一聲巨響，把其餘仍在熟睡中嘅人都驚醒，我亦都被嚇到跳起身，快速咁跑到山洞外面，唔少人都陸續走出山洞，抬頭仰望天空上亂成一片嘅飛鳥。



腳下嘅土地有極輕微嘅震動，你唔手腳並用嘅話，你都未必會察覺到震動。

我環顧四週，再望向天上亂成一片嘅飛鳥，突然想到某些事。

我跑返入山洞裡面，見雪兒同秋儀已經起咗身，而辣椒妹仍然在熟睡中⋯出面咁大嘅動靜都無辦法整醒佢⋯

「雪兒，秋儀，快啲出山洞。」
我抱起熟睡中嘅辣椒妹，雙手感到十分沉重⋯辣椒妹果然係肥咗⋯



雪兒快速攞起弓箭，而秋儀抱住裝開山刀同軍刀等雜物嘅旅行袋衝出山洞，當我地跑出去嘅時候，空地上嘅所有人此刻抬頭仰望，不過佢地面上都呈現著鐵青色，我亦跟住抬頭仰望。

我地面前嘅山頂發出紅色的光芒，把原本漆黑一片嘅天空照亮到好似夕陽西下，紅色的光芒中傳出滋滋嘅聲音。

「山頂著火啊⋯」

「會唔會燒過嚟㗎⋯」

「點算啊⋯」



「仲點算？咁係跑啦！」
空地上嘅女仔俾嚇到東奔西跑，有啲跑去營地個邊搵肥佬陳佢地，一啲跑返入山洞裡面執實物品。

達叔見到我地出嚟後，便快速咁跑過嚟。
「東哥東哥⋯山火⋯有人放火燒山啊⋯」

而係一旁緊盯著山頂嘅雪兒，隻手微微咁顫抖。
「唔係有人放火燒座山⋯而係依座山⋯係個火山嚟⋯」

望住跑返入山洞嘅女仔，我想返起曾經睇過嘅一套電影。
「大家！唔好跑入山洞啊！快啲跑返出嚟啊！危險啊！」

座山再次發出轟隆巨響，令我感到震耳欲聾，過咗陣，腳下嘅土地再次震動起嚟，而且比剛才嘅震動強十數倍，原本正在站立嘅人都瞬間跌倒在地上，所有人感到驚恐。

「哎⋯我個頭⋯」


我攬住辣椒妹跌倒係地上，辣椒妹終於醒咗。

「點解會地震㗎⋯」
唔少女仔吃力咁爬出山洞，有啲企咗起身跑了數步後又跌倒在地上，樹林中嘅樹木不斷地搖晃，有數棵幼樹敵不過震動而倒下。

「又山火⋯又地震⋯死啦⋯」
幾個年紀較細嘅女仔俾依一連串嘅情況嚇到放聲大哭。

荒島下嘅地殼板塊正在移動，導致有輕微嘅地震，而令岩漿流動上山頂，令依個似乎已死去嘅火山爆發，火山爆發產生嘅力量，令到停止震動嘅荒島再次震動，並且比之前劇烈。

「個震動愈嚟愈勁⋯」
雪兒吃力爬到我身邊，捉緊我隻手，秋儀快速地跳入我懷裡。

「我咁大個女都係第一次遇到地震～吖吖吖～原來係咁㗎～」
辣椒妹係一旁大叫著，我已經分不清楚佢係害怕定開心。



「東哥⋯點算啊⋯」
旁邊嘅達叔問到。

「仲可以點算⋯只可以等佢停⋯」

「佢會唔會一直震落去⋯」
達叔不停咁問，睇嚟係俾依場地震震到害怕了。

「唔知⋯唔清楚⋯唔好再講啦⋯留返啖氣暖下個肚好過啦⋯」
我講完，達叔就無再出聲，

我一直好驚火山爆發，噴岩漿落嚟，或者係會有啲岩石從山上碌落嚟，但幸好跌到我地身上嘅都係啲小石粒嚟，最多對我地造成些少擦傷。

強烈嘅震動持續咗五六分鐘後先開始減退，我地先可以企返起身，我拍一拍身上嘅塵埃，無意中望到周圍人群腳下嘅影子。



大鑊⋯

山頭上火光沖天，天空已經被照亮到好似紅霞般，山頭嘅火勢開始蔓延，但速度非常緩慢，只流出甚少岩漿，啲火勢遲早都會延燒到我地依邊。

「大家無事啊嘛？」

見無人回應我，我環顧四周，見到佢地全部人都望住一個個因地震而倒塌嘅山洞，見到佢地淚流滿面，於是我走過去問到。
「做咩？係唔係有人被活埋係裡面？」

個女仔望咗我一眼，然後大哭。
「我啲衫褲⋯啲食物⋯乜都無啦⋯」

我頂⋯我仲以為有人被活埋係裡面⋯原來係因為啲食物而喊⋯



「我⋯我啲錢啊⋯⋯」

「彤姐彤姐⋯唔好啊⋯」

四眼妹跪係地上，無奈咁望住個山洞，而佢幾個同居嘅女仔擋住佢，生怕佢會衝入去，而佢個充滿雜物猶如雜貨舖嘅山洞，此刻已經俾山泥碎石淹沒，裡面嘅物品無辦法再攞得返。

我走過去拍一拍四眼妹膊頭，四眼妹立即擰轉頭望向我，正想講幾句安慰佢嘅時候，佢突然講嘢。

「唓，錢姐，無曬可以再搵過。」
四眼妹講完後，仲要懶有型咁對住我托一托副眼鏡。

四眼妹嘅心態變得咁快嘅⋯啱啱佢先sad完無幾耐，咁快變得咁樂觀⋯

「大陸仔，依家我地可以點？」
雪兒走到我面前問到，而空地上嘅女仔全部都望向我，好似等待咁我嘅決定⋯⋯



待續