荒島日記（新手、後宮甜）（不定期更新）: 驚嚇
「大撚鑊⋯」
依一下仆街，令高佬佳跌到個鼻破損，鼻腔裡慢慢咁流出溫暖嘅鮮血。
高佬佳心知不妙，因為佢突然咁出現係獅子狗嘅山洞裡面，破壞咗二人交歡嘅氣氛，一想起獅子狗嘅脾氣，再想起曾經獅子狗單打幾個師兄嘅事跡，佢就緊張到滿頭大汗。
心裏想著究竟繼續扮暈低定還是快速起身逃跑嘅高佬佳，仍然繼續趴係地上不敢輕舉妄動。
跑⋯可能自己已被獅子狗認到⋯唔跑⋯留係到就真係等死！
好！跑！
高佬佳立刻起身準備轉身離開，點知佢起身一抬頭，便見到獅子狗已企咗係佢去面前，獅子狗拉住佢嘅頭髮。
獅子狗用力扯住高佬佳個頭，令佢無辦法低頭避開獅子狗嘅眼神。獅子狗見到高佬佳個樣後便感到驚訝。
「阿佳？」
「阿⋯阿sir⋯」
俾獅子狗用力捉住嘅高佬佳驚嚇到瑟瑟發抖，身體好輕微咁顫抖著。
「點解佢會係到㗎⋯咁我咪俾佢睇曬⋯」
床褥上嘅嘉雯大聲問到，雙手更用咁攬住張被，遮擋住自己半裸嘅身軀。
「阿⋯阿sir⋯聽我解釋⋯我⋯⋯」
高佬佳未講完，獅子狗便一巴車落高佬佳塊面，令高佬佳失平衡跌倒地上。
高佬佳立即坐起，然後伸手摸向已被打到又紅又腫嘅臉頰，獅子狗用力捉住佢嘅手臂，令高佬佳痛到叫出聲。
獅子狗捉住高佬佳，將佢拖出黑布外面，一直拖到佢到山洞口邊，高佬佳忍住手臂上劇烈嘅痛楚，不斷向獅子狗解釋。
「阿sir⋯阿sir⋯我真係唔係特登㗎⋯我係嚟通知你⋯叫你食飯⋯阿sir⋯我唔係特登入嚟偷窺⋯」
聽完高佬佳嘅說話，獅子狗就鬆開高佬佳隻手，然後對住佢面無表情咁講。
「對唔住，未搞清楚件事就整親你，但以後你地最好企係洞口前通知聲我，如果無我嘅批准，你地就唔好行入嚟！否則後果自負！」
「係⋯」
「好，你返去，等陣我就過嚟。」
獅子狗伸手拍一拍高佬佳嘅膊頭，然後便調頭走返入山洞裡面，高佬佳鬆了口氣，隨即感到手臂上嘅痛楚。
「嗄⋯俾佢捏到瘀曬⋯」
高佬佳按住個手臂，慢慢咁行返出去，走返去營地嘅空地上，肥豬劉見到高佬佳忍痛嘅樣，立刻上前了解。
「阿佳，發生乜嘢事？」
高佬佳望一望肥豬劉，思考數秒後便答。
「無⋯無嘢⋯我跌親姐⋯」
然後佢用手遮擋面上熾熱鮮紅嘅掌印，唔俾肥豬劉望到，文健、肥佬陳、秘書Lily同肥佬陳嘅小老婆凌兒亦係依個時候行咗過嚟，準備享受肥豬劉烹調嘅美食。
肥豬劉望到秘書Lily手上攞住個玻璃樽，裡面裝住黑紅色嘅液體，於是興奮地講。
「陳總，唔洗咁開心開紅酒慶祝喎！」
嘴裡叼著雪茄嘅肥佬陳聽到後雙眼凸咗一下，然後攞走秘書Lily手上嘅玻璃樽。
「什麼紅酒？這瓶是醋來的，吃螃蟹怎麼可以沒有醋呢？我特意拿來和大家分享，你看我多大方。」
「就知佢無咁好死⋯⋯」
高佬佳細細聲咁埋怨。
肥豬劉失望地接住樽醋，然後見女伴分好曬啲碗碗碟碟係大石做嘅石檯上，於是將樽醋平均倒在碗裡面，倒到第三碗嘅時候，肥佬陳伸手捉住佢隻手。
「好了，不要倒了，把這三碗裡的醋再平均倒在其他碗，這醋只剩下這瓶了，要省吃儉用啊。」
說罷，肥佬陳倒醋係自己碗裡，佢碗裡面嘅醋比肥豬劉嘅三碗醋仲要多，肥豬劉差啲俾肥佬陳激到嘔血。
肥豬劉煮嘅蟹湯已經煲好，獅子狗同嘉雯亦係依個時候過嚟，嘉雯尷尬咁望了一眼高佬佳，而高佬佳害怕咁得低頭，驚會見到獅子狗兇狠嘅眼神。
獅子狗攬住嘉雯條腰坐係一邊，等待肥豬劉嘅女伴把食物平分。
「嚟，依碗係阿sir嘅，依碗係嘉雯嘅。」
肥豬劉把兩碗裝滿蟹湯嘅碗遞到佢地面前，再用隻碟放上一堆蟹俾佢地。
「多謝。」
嘉雯接上碗蟹湯，然後用小嘴吹一吹啲湯，再慢慢咁飲。
文健望住嘉雯後，突然想起佢返嚟時候見到嘅嘢，於是便問到。
「嘉雯，我返嚟個陣好似見到辣椒妹從你住嘅山洞走出嚟。」
嘉雯聽到文健嘅說話後，把嘴裡嘅蟹湯噴曬出嚟，然後喪咳數秒，佢估唔到辣椒妹搵佢依件事會俾文健睇到曬。
獅子狗見嘉雯噴到成地蟹湯，於是好溫柔咁拍打嘉雯嘅背隻。
「無事啊嘛？」
「無事⋯」
嘉雯用手抹走嘴角上嘅湯跡，獅子狗見嘉雯無再咳嗽，於是問。
「辣椒妹過嚟搵你？」
「施sir，辣椒妹即係白穎林，同嘉雯係同班同學。」
文健搶住答。
獅子狗望一望文健，然後再望返嘉雯，嘉雯回想辣椒妹講嘅嘢，考慮數秒後覺得唔應該同獅子狗講，於是扮到好淡定。
「佢搵我敘舊姐，話曬都咁耐無見。」
肥豬劉分好曬啲食物後，大家便開始享受美食，肥佬陳狼狽地進食，深怕食慢啲，碗裡嘅蟹肉就會少咗。
「啲蟹肉真係好食。」
肥豬劉大啖大啖咁食啲蟹肉，而其他人好安靜咁食，連平時食嘢時會不同講嘢嘅肥佬陳，今日都好安靜咁食蟹。
秘書Lily準備食手中嘅蟹身，望一望旁邊嘅肥佬陳後，便把蟹身遞到肥佬陳嘅碗上。
「陳總，你喜歡吃蟹，吃多點。」
肥佬陳點一點頭，然後捉起碗裡嘅蟹身，唔夠十秒，便把蟹身吃得一乾二淨。肥佬陳嘅小老婆見佢咁喜愛食蟹，亦都把碗裡嘅蟹肉俾曬肥佬陳。
「我食飽啦，你幫我食埋啊。」
肥佬陳嗯嗯咁應咗一聲，然後快速咁吞噬凌兒俾嘅蟹肉。
文健終於飲曬成碗蟹湯，食埋湯裡面嘅貝殼肉，只剩下碗裡隻完整無缺嘅螃蟹，佢特登食咗其他嘢先，留低蟹肉到最後先慢慢品嚐享受。
文健攞起隻蟹，慢慢咁欣賞佢紅色嘅蟹殼、白滑嘅蟹肉同肥美嘅蟹膏，然後遞到嘴邊，準備要咬落去。
「文健，把你碗裡的螃蟹給我。」
文健驚訝咁望向聲音嘅方向，坐係一邊嘅肥佬陳一直望住佢手上嘅螃蟹，並且不斷咁用脷舔嘴邊，流曬口水。
肥佬陳見文健好似唔想俾佢，即刻搶走文健手上嘅蟹，然後快速啃食。文健望住肥佬陳食咁自己嘅蟹，眼淚差啲湧出嚟。
待續