荒島日記（新手、後宮甜）（不定期更新）: 獅子狗

今日嘅消息實在太震撼⋯首先係嘉雯嘅出現⋯然後係獅子狗⋯最後係佢地兩個嘅親密接觸⋯佢地兩個肯定有關係⋯⋯

依單嘢我一定要同達叔講下⋯

我同雪兒走返到山洞，秋儀同辣椒妹已經返咗嚟，辣椒妹見到我地兩個後，便好開心咁走到我面前。

「你地睇！我對巴黎世家～靚唔靚先～」
辣椒妹抬起其中一隻腳。

「攞我啲食物買⋯咦！啲手工咁差嘅？似係淘寶世家喎～」


我求其講幾句嚇吓辣椒妹。

「唔會嘛⋯明明寫住義大利製造喎⋯」
辣椒妹好緊張地除低對鞋，然後攞起身不斷咁檢查。

「辣椒妹用少少肉，換埋個手袋啊～」
秋儀好開心咁攞住個LV手袋走過嚟，辣椒妹立刻放低對鞋，秋儀把手中嘅LV手袋交到辣椒妹。

辣椒妹攞住個手袋，係我同雪兒面前不斷咁擺姿勢。
「點啊？係唔係好襯我？」



雪兒捉住辣椒妹膊頭。
「好襯你啊辣椒妹！但你知唔知，我地啱啱見到邊個？」

辣椒妹一邊摸個手袋，一邊望住興奮狀態嘅雪兒。
「見到邊個？」

雪兒好開心咁講。
「係嘉雯啊！同你同班個個啊！仲有施sir啊！學校體育科嘅施sir啊！」



手中嘅手袋跌到在地上，辣椒妹俾依個突如其來嘅消息嚇到呆咗。
「嘉雯⋯施sir⋯」

雪兒激動地捉住辣椒妹嘅膊頭不斷搖，辣椒妹仍然被嚇呆，無曬反應。
「係啊，佢地兩個仲生存啊！啱啱先係營地個邊見到佢地，太好啦，以後我地多兩個熟悉嘅人，可以多啲照應。」

「好嘢！有多兩個學校嘅人生存。」
秋儀係一旁開心地跳舞。

「我去將個消息話俾達叔知。」
我講完，便跑去達叔個山洞，發現裡面空無一人。

「喂！東哥！早啊！」
我回頭一望，達叔同紫霜提起桶水返嚟，達叔笑容滿面，紫霜怕怕醜醜咁望一望達叔，又望一望我，面色比以前好咗勁多。



「達叔，我有啲嘢要單獨同你傾吓。」

「紫霜你返入去先。」
達叔拍一拍紫霜背部，紫霜便自己一個提住個桶走入山洞裡。

我搭住達叔個膊頭，走到空地上嘅其中一角，環顧四週無人接近，達叔見我神神秘秘咁。
「東哥，有乜嘢事要咁神秘啊？」

我細細聲係達叔耳邊講。
「達叔⋯營地個邊多咗兩個生還者⋯你知唔知係邊個？」

達叔聽到生還者後，雙眼立刻望實我。
「我識㗎？係邊個？」

「你識㗎⋯一個係嘉雯⋯另一個⋯係獅子狗⋯」



「哦～原來係嘉雯同獅子狗～乜嘢話！！！嘉雯同獅子狗？」
達叔聽到後驚訝地大嗌，空地上嘅人立刻望住我地兩個，我即刻按實佢個嘴。

「喂⋯細聲啲啦⋯」

達叔點點頭，我鬆返隻手後，達叔左右望一望，然後淫笑地問我。
「係啦啦隊個女神嘉雯？」

「係啊⋯」

達叔確定係嘉雯後，便興奮咗數秒，但無幾耐後便沈默。
「獅子狗⋯⋯係教籃球隊個件垃圾？」

「係啊⋯」



「哦！原來個日係架船上見到嘅人真係佢嚟嘅！個仆街竟然無死！有無天理⋯想當年佢咁樣害張sir！我永遠都會記得佢個仆街做過啲咩！」
達叔愈講愈氣憤。

我托住腮諗一諗。
「你咁講我都諗返起，我記得佢好似無份坐郵輪，當初簽通告嘅時候，隨行老師都無佢個名。」

達叔橋住雙手說到。
「佢同校長兩個咁撚fd，肯定有門路跟埋嚟啦，依條撚樣，哎呀⋯啱啱好似想起啲咩，依家又唔記得⋯」

達叔沈默思考咁啱先想起啲咩，我等咗佢幾分鐘後，便拍一拍佢膊頭。
「達叔⋯其實仲有件好重要嘅事⋯你聽完後要冷靜少少⋯」

「吓？仲有乜嘢重要嘅事？」



「嘉雯⋯同獅子狗⋯嘅目前關係應該唔簡單⋯⋯」
我將啱啱事情發生經過一五一十地將曬俾達叔聽，達叔由一開始難以置信，好快便轉變成憤怒。

達叔一拳打落牆壁上，少量嘅泥土隨即跌落嚟。
「我地嘅女神嘉雯⋯獅子狗一定係強逼佢⋯獅子狗份人咁仆街⋯當年害到張sir無咗份工⋯枉張sir對佢咁好⋯⋯」



張sir張德任曾經係我地嘅體育阿sir，亦都係學校足球隊嘅負責阿sir，佢同獅子狗係中學母校嘅師兄弟。

當年獅子狗係大學畢業後，係張sir嘅引薦下入咗我地中學任教，一開始兩人關係都唔錯，但我地個屆入讀後，兩個人嘅關係開始轉差⋯

原本嘅體育科主任年邁準備退休，於是學校就係四位體育老師裡面，揀咗張sir升任依個職位，獅子狗對於依件事非常不滿，認為自己更有力升任，但無奈當時校長極力推薦張sir，唯有接受。

所以我地張sir帶領嘅足球隊同獅子狗帶領嘅籃球隊係水火不容。

後嚟到我地中三個年，舊校長因為身體健康問題而提早退休，由副校升為校長，獅子狗就同副校關係密切，而且獅子狗帶動其他體育阿sir杯葛張sir，暗地裡不斷抹黑。

最後張sir受唔住輿論嘅壓力，唯有離開我地去其他學校任教⋯⋯



待續