荒島日記（新手、後宮甜）（不定期更新）: 熟人

第二日朝早

我走出山洞，空地上十分熱鬧，啲女仔將空地搞到好似市集般，賣著各式各樣嘅物品，有啲人賣手飾，有啲人賣衫褲，有啲人賣附近摘嘅野花，亦有人賣雜貨。

當然⋯成嘅空地市集上最多嘢賣嘅人⋯係四眼妹佢⋯

「有無嘢啱有無嘢啱？價錢可以商量吓！靚女！係唔係想買？攞上手試吓啦！」
四眼妹對住佢面前思考嘅女仔揮手。

「做咩突然會有個市集係到⋯」



有人係背後拍一拍我，我擰轉頭望，係雪兒嚟。
「訓醒啦？佢地一朝早起身，食完個早餐後便搞市集，因為唔係各個女仔都接受到成身污糟咁去捉蟹，唯有賣吓啲嘢換食物，反正佢地依家都大把收穫！」

「原來係咁⋯」

「賣嘢啦！賣嘢啦！唔好錯過吖！」
一把熟悉嘅聲從市集上其中一角傳嚟，我望一望，係辣椒妹同秋儀⋯

辣椒妹攞出我啲鰻魚乾同鬣狗肉擺攤，而秋儀坐係一邊同佢一齊睇檔。


「啱心水可以傾吓！」

由於辣椒妹佢地賣特別嘅食物，所以佢個檔口係企滿曬人，我拉住雪兒，千辛萬苦先擠入去。
「喂⋯做咩攞我辛苦捉返嚟嘅食物賣⋯」

辣椒妹見到我後。
「你啲食物未就係我啲食物，喂！靚女！係唔係想買鰻魚乾！定係想買鬣狗肉？」

「鰻魚乾點賣法？」



辣椒妹立刻掃一掃個女仔全身。
「靚女！當我益吓你！你身上嘅名牌手袋同對鞋俾我，我就俾一條鰻魚乾你！」

個女仔立刻退後一步，雙手緊緊攬住手中嘅手袋。
「嘩⋯咁貴⋯個LV手袋我好鐘意㗎⋯而且對巴黎世家鞋係我男朋友送㗎⋯」

辣椒妹雙眼一直望住個女仔嘅手袋同鞋。
「唔貴唔貴！你係個島咁貪靚有咩用啊，不如食好啲仲好過啦！鰻魚乾好有益㗎！你食過就會返尋味！」

個女仔聽完後便思考，係一旁默默無出聲嘅秋儀突然講嘢。
「你都有咁多對鞋，就賣對鞋啦，個手袋我幫你勸吓辣椒妹。」

「喂⋯啲食物我㗎⋯⋯」
我都未講完，文健突然出現係我面前。



「大陸仔，個邊有人搵你⋯」
文健用手指公指向營地方向。

「邊個搵我？肥佬陳？」

「你去到未知囉！」
文健有啲唔耐煩咁。

佢一講完，便頭也不回地走去河邊，返去營地個邊，完全唔理我究竟會唔會過去。

又一朝早就派人過嚟搵我，唔通死肥佬又係到搞啲咩壞主意，上次就開會，今次會搞啲咩？

我返到山洞裝備一下，把軍刀同開山刀都攞走，一回頭便見到雪兒都返咗嚟，並且手中握住弓箭。

「多個人照應吓嘛。」


說罷，雪兒便好開心咁攬住我手臂行，我內心係極度唔想帶埋雪兒去，但唔帶佢去，佢一定會嬲到仆街⋯

原本我想叫埋達叔一齊過去，但雪兒話趕時間，想早啲去早啲返嚟，於是得我地兩個行去營地個邊。

無幾耐，我地兩個行到營地個邊，望住空地上只剩下過去嘅餘燼，好無生氣。

係肥佬陳山洞前睇水嘅文健，一見到我同雪兒嘅出現，立刻擰轉頭向裡面大嗌。
「大陸仔到咗！」

我走到文健面前。
「鴻門宴啊？做咩搞到咁神秘？」

文健並無理會我，我同雪兒見佢無回答我嘅問題，唯有無奈地走入去，拉起塊分隔嘅黑布，便見到肥佬陳、高佬佳同肥豬劉係大廳。

佢地三個都坐係梳化上，高佬佳同肥豬劉望了我一眼後，便陰陰嘴咁笑，而肥佬陳面無表情，嘴巴叼著粗雪茄。



「早上好，王學東。」
秘書Lily企係肥佬陳後面。

「早晨Lily。」
我對住Lily微笑點點頭，Lily亦微笑點頭，雪兒便用力揑咗一下我手臂⋯

「一早叫我過嚟做咩？」

佢地三個人無回答我，高佬佳同肥豬劉只係望住山洞裡面，無幾耐，裡面走出咗一個著住短裙嘅女人。

「嘉⋯嘉雯⋯」
走出嚟嘅女人⋯係我曾經鐘意過嘅女同學⋯嘉雯⋯

嘉雯係學校裡面係數一數二嘅女神，而且佢係學校啦啦隊嘅隊長，身高米七，雖然胸部細咗啲，但個對傲人嘅長腿加上天使嘅面孔，胸部細啲無所謂啦～



由於佢啦啦隊不斷要練習，所以身上都係肌肉嚟，沒有多餘嘅脂肪，臀部亦因此而結實。

有無數師兄師弟同級同學拜倒係佢石榴裙下，就連隔離嘅學校嘅學生都俾佢吸引到。

聽聞佢每次出外表演，都會有眾多粉絲特登前去觀看，欣賞女神嘅精湛表演。

我唔敢相信仲會見返啲舊同學，係個荒島生存咗咁多日，我以為能夠生存落嚟嘅都只有依到嘅人⋯唔會有其他人仲在生⋯

嘉雯見到我同雪兒後一開始感到驚訝，然後慢慢地忍唔住激動起嚟，眼眶逐漸泛紅，淚珠吊掛係眼角上。

雪兒立刻上前捉住嘉雯隻手，感性嘅雪兒已經忍唔住落淚。
「嘉雯⋯原來你仲在生⋯實在係太好啦⋯太好啦⋯唔唔⋯我仲以為永遠都唔會見返你⋯」

原本忍住淚水嘅嘉雯，見到雪兒嘅淚水後，瞬間淚流滿面。
「雪兒⋯我都以為永遠見唔到你地⋯太好啦⋯見得返你實在太好啦⋯唔唔⋯⋯」

雪兒同嘉雯兩個攬咗一陣，雪兒便拉住嘉雯走到我面前，見到嘉雯後，我即刻諗返起以前某日寫咗封情信俾佢嘅事，感到十分尷尬⋯

嘉雯用手擦一擦面上嘅淚珠，然後便主動伸出手要同我握手。
「大陸仔，好耐無見。」

我顯得十分緊張⋯
「好⋯好耐無見⋯」

然後我便慢慢伸手同嘉雯握手，嘉雯隻手十分冰冷⋯我就好似摸住舊冰咁，嘉雯好快便抽返隻手。

我掃視嘉雯全身，見佢身上無穿無爛，距離沉船咁多日先出現係營地依到，咁佢應該一開始係島上某個地方生存，然後慢慢咁走過嚟，但島上生存著各種各樣嘅猛獸，好難能夠安全順利咁過嚟依邊。

但嘉雯得確完全無受傷，佢嘅出現令我感到十分好奇。

「嘉雯⋯依段時間你住係邊？點解會突然嚟到依到嘅？」

嘉雯正想開口回答我嘅疑問，突然一把沈重嘅人聲從裡面傳出嚟。
「王學東！仲記唔記得我啊？」

依把聲音⋯我驚恐咁望向聲音嘅方向⋯裡面再次慢慢走出個人出嚟⋯一個身形高大強壯嘅男人出現係我面前。

個男人見到我驚訝嘅樣，嘴角便上揚。
「做咩？見到阿Sir唔叫一聲！」

我憤怒地握緊雙拳，望住面前依位高我半個頭嘅男人⋯⋯



待續