荒島日記（新手、後宮甜）（不定期更新）: 手槍

「嘩！！！」
所有人見到肥佬陳掏出支槍後，紛紛發出驚慌既聲音。

我驚訝咁望住肥佬陳支槍，終於俾我見到支槍既真面目⋯

原來支槍係真㗎⋯但點解我潛入佢山洞咁多次⋯都係搵唔到支槍⋯

「你！把刀放下！」
肥佬陳示意辣椒妹放低把刀，但辣椒妹完全唔聽肥佬陳既說話，我拉住辣椒妹躲係我身後，槍頭瞬間向住我。



秋儀快速地跑到我面前，然後張開雙手大字型咁想幫我遮擋子彈。
「學東哥，我嚟保護你。」

唔好睇細粒得骰既秋儀，肥佬陳支槍槍頭向住佢方向，但佢完全無驚過，雙眼由始至終都係咁堅定。

「哈哈哈！你生得咁細粒！點保護到大陸仔啊！」
高佬佳奸笑咁同我地講。

「就算擋住他也沒用，我槍法可準呢！之前那頭野豬是給我爆頭而死的！」
肥佬陳雙手持槍，不斷單眼從槍身瞄住我既方向。



雪兒係依個時候都攞出弓箭，箭頭瞄準住肥佬陳身體。
「我勸你好快啲放低把槍。」

肥佬陳望了一眼雪兒。
「我看是你的箭快，還是我的槍快！」

雪兒聽完後用力捉緊弓箭。
「你⋯⋯我枝箭沾滿毒液！就算係營地既醫生都一定救唔返你！」



「你大我啊？我地陳總先唔會信你講既嘢！陳總！唔好俾佢嚇到啊！箭頭有毒喎！笑死人！」
肥豬劉邊恥笑邊講。

「咁你嚟試下啦！」
雪兒箭頭即刻瞄向肥豬劉，肥豬劉嚇到跑到肥佬陳身後。

「傻B啊你！拿我來擋箭！」
肥佬陳嬲到咆哮大罵肥豬劉，肥豬劉先無再用肥佬陳身軀遮擋。

「陳總，有事慢慢講啊，何必搞到流血收場呢，如果大陸仔俾你殺死咗，咁你就係殺人犯！返到去就要坐監！」
四眼妹開始勸說肥佬陳要冷靜。

高佬佳企到肥佬陳旁邊。
「將你地殺曬！咁就無人做證人囉！係唔係啊？陳總！」



肥豬劉眼角望了一眼高佬佳。
「對！你們全部死光了！就不會有人做證人了！」

四眼妹佢地同達叔既女伴嚇到攬埋一齊，達叔仇視咁望住肥豬劉同高佬佳，然後從心口掏出笛子。
「你試下開槍殺其中一個啊！我就即刻叫來福佢地嚟！你地所有人肯定會成為佢地既晚餐！個晚只係嚟咗一半狼！如果全部嚟曬！你地一定死咁！」

高佬佳囂張咁講。
「咁我地就依家殺曬你地！班狼嚟到都無人識指揮！陳總！開槍打爆佢地兩個個頭啦！」

我望向高佬佳同肥佬陳。
「你估班狼見到我地死咗，佢地就真係唔會發癲咬你地？依到係荒島，無瘋狗疫苗俾你地打㗎～陳總，你要生定要死就睇你自己決定～」

肥佬陳雙手繼續持槍，但佢雙眼卻望向其他地方，無再瞄準住我。

我用眼神示意達叔，達叔知道我想做咩，佢立刻點點頭，將笛子慢慢遞到自己個嘴邊，肥佬陳雙眼即刻望向達叔。



達叔準備要用力吹笛子既時候，肥佬陳即刻大嗌達叔。

「小伙子停停停！！！好了！好了！不用吹了，我不會再逼你們！」
肥佬陳講完便收起支槍，高佬佳同肥豬劉驚訝咁望住肥佬陳，佢地完全估唔到肥老陳會臨時縮沙。

高佬佳連忙勸說肥佬陳。
「陳總陳總⋯你唔洗驚佢地喎，我唔信啲狼真係會幫佢報仇啦！」

肥佬陳無講嘢，而係默默咁回頭走返去自己既山洞，高佬家繼續邊行邊遊說陳總唔好放棄對付我地。
「陳總陳總，你唔係好想要佢三條女既咩？陳總陳總，你唔係好想食大閘蟹既咩？只差一步！陳⋯⋯」

肥佬陳忍無可忍咁捉住高佬佳既衣領，狠狠地將佢扯高，然後對住佢咆哮。
「你他媽的！這個營地到底是誰說了算！是我！營地裡我最大！我現在不想玩了！你他媽別繼續煩我！明白嗎！」



「係⋯係⋯」
說罷，肥佬陳把高佬佳用力推向牆邊，高佬佳得低頭無再講嘢，肥豬劉眾人好失望咁望住佢兩個。

我望向肥佬陳個背影，佢慢慢咁消失係山洞之中。

睇嚟今晚，我要再潛入去多一次，入肥佬陳個山洞裡面偷搶。

支槍一日係佢手上，我地都會有危險⋯⋯



待續