荒島日記（新手、後宮甜）（不定期更新）: 開會

「支咩持啊⋯明明係佢自己選自己做營地既大佬⋯我地根本就無選擇既權利⋯」
達叔細細聲說到。

「無錯⋯」
四眼妹都細聲贊同達叔既說話。

肥佬陳舉起手，所有營地人都瞬間停止歡呼同拍掌。
「各位女士們，先生們，早上好，我是陳總，很高興大家都能出席今天的會議。」

我同達叔四眼妹你眼望我眼，完全唔知肥佬陳想點。



肥佬陳解鬆衫領。
「我們生活在這個島嶼已經有半年之久，我們情同手足，如兄如弟，這幾天，我們遇到生活以來最大的問題，我聽到好多聲音，都表示最近打獵沒有收穫，誒！你們是不是有什麼想說？」

肥老陳指住舉手中既營地人群，其中一個女仔慢慢起身，好緊張咁左望右望。
「係啊⋯自從個場大雨⋯我每日打獵到既食物幾乎唔夠一餐⋯再咁落去⋯我驚我會挨唔住⋯」

營地眾人得低頭沈默咗一陣，當個女仔坐返低後，便有個航空母艦級別既肥妹快速起身。

「我都餓咗好幾日⋯大家都知⋯肥人係唔可以捱餓㗎⋯我已經餓到連打獵都無力氣⋯再咁落去⋯我⋯媽咪⋯唔唔⋯睇嚟我無命返嚟香港見你啦⋯媽咪⋯⋯」


肥妹講講吓大喊出嚟。

我地全部人因為肥妹既大喊聲嚇到縮埋一舊，忍受佢刺耳既聲線，就好似要聽胖虎高歌一曲⋯

達叔按住耳仔係我耳邊講。
「依個肥妹⋯⋯我估佢一個人一日既食物份量⋯應該會係我加埋兩個老婆仔一日既食物⋯」

肥妹大喊咗兩三分鐘，終於停止流淚，原來係肚餓令佢無力氣再喊落去⋯

「你估我地好似有啲人！日日大魚大肉，三餐無憂咩！」


肥豬劉講完便望向我地，其他營地人都擰轉頭望我地，眼神帶有些少羨慕同仇恨。

肥佬陳拍一拍手，令大家再次安靜返。
「大家不要傷心！我這幾天想來想去，終於給我想到個解決方法，解決大家現在的糧食危機！文健！我快熱死了！還不快點出來！」

肥佬陳大嗌文健，文健快速咁從山洞裡面跑出嚟，手舉住大扇幫肥佬陳撥涼。

文健此刻穿著件破爛不堪既衫，瘦弱既身材從破洞中隱約展示俾眾人。

「依個唔係文健嚟？」

「佢唔見咁多日，我以為佢餓死咗。」

「原來佢去咗陳總山洞住⋯」
對於文健既出現，營地除咗高佬佳同肥豬劉之外，一一感到奇怪。



而曾經同文健生活過一段時間既女仔同人妻，佢地好尷尬咁得低頭，唔敢接觸其他人既目光。

撥咗唔夠一分鐘，就已經見到文健好吃力咁，汗水不斷從額頭冒出。

「依條粉腸都有今日啦～」
辣椒妹不屑咁望文健。

「乜嘢方法？陳總？」
營地眾人回過神後，便好緊張咁望住肥佬陳，而肥佬陳向秘書Lily招手。

秘書Lily快速上前遞上杯茶，肥佬陳飲咗一啖後慢慢講。
「就是～把大家的食物全部都拿出來，然後我們再平分食物給大家，這樣大家都會有食物，而不需要再挨餓！以後大家打獵到的食物都一樣拿出來平分！實行食物公有化政策！就算遇到什麼天災！我們都可以共同進退！」

乜嘢話⋯⋯食物公有化⋯阿爺個套政策都拎埋荒島到實行⋯真係佩服你諗到⋯



四眼妹都抱肚忍笑。
「咁即係食大鑊飯？估唔到⋯估唔到係依到⋯會食大鑊飯⋯笑死我⋯」

達叔笑一笑講。
「哈哈，估唔到陳總咁識玩，好彩我地唔係營地生活既。」

肥佬陳聽到達叔既說話，即刻擰轉面，然後大大聲同我地講。
「什麼不關你們的事？我可是一視同仁哦！不分彼此！你們那邊從現在起和我們營地是一齊的！」

我地眾人驚訝咁望住肥佬陳，而營地眾人擰轉面望向我地，原本愁眉苦臉既佢地立刻轉成喜悅既表情。

一個女仔開始拍手，而其他營地人亦高興到跟住拍手。
「好嘢！咁我地以後唔洗驚餓親啦！有佢地既食物一定可以解決肚餓！而且佢地打獵咁勁！」



「無錯啊！」

「陳總依個政策唔錯！」

營地眾人歡呼雀躍，而肥佬陳奸笑咁望住我，肥豬劉同高佬佳亦嘴角上揚。一朝早搞場大龍鳳，原來就係想沒收我地既食物⋯

辣椒妹嬲到企起身，然後指住肥佬陳。
「收皮啦！死肥佬！憑乜撚嘢攞我地啲食物！」

達叔都激動到企係身。
「無錯！你地憑乜嘢攞我地既食物！我地既食物全部都好辛苦咁打獵返嚟，你地一句話平分講平分？唔好發夢啦！」



待續