荒島日記（新手、後宮甜）（不定期更新）: 原因
「唔好講咁多，快啲爬上棵樹先。」
說罷，達叔就即刻爬上棵樹，然後捉住雪兒隻手，拉佢上去。
我地三個安靜咁坐係樹上，望住地上既鬣狗屍體，而禿鷹仍然係天上一邊大叫一邊盤旋，無左原本係周圍安靜咁觀察。
雪兒轉個頭問。
「達叔，點解你會走到嚟依到？」
達叔好尷尬咁摸一摸後腦。
「er⋯其實係咁既⋯⋯」
⋯⋯⋯⋯
///個晚///
達叔個山洞剩低既食物唔多，
於是達叔走過嚟多謝我既提醒後，
便匆匆忙忙咁走去上遊個邊打獵。
原本佢想睇下河個到有無魚可以捉，
點知河水實在太混濁，
平時捉魚都難，
係混濁既河水捉魚就難上加難。
係河邊捉左十幾分鐘仍然無收穫，
於是佢就放棄捉魚，
走去上游樹林個邊睇下，
以往係樹林都會遇到兔仔野雞之類既動物，
點知大雨過後，
一隻動物都見唔到。
一諗山洞裡面兩個老婆仔，
幾夜都要捉到獵物，
於是佢愈行愈遠，
愈行愈上，
就咁，佢走左上山頂。
抬頭望到天色已晚，
諗住回頭死死氣返山洞啦，
點知係山腰突然殺出隻鬣狗，
佢就嚇到調頭不斷咁跑，
無理個方向啱唔啱，逃命就最緊要。
而隻鬣狗一直係後面緊追住佢，
一直追到嚟依邊，
達叔見鬣狗就快追到佢，
於是爬上棵樹到，
等待隻鬣狗離開。
好幾次鬣狗離開佢既視線範圍，
佢就以為隻鬣狗離開左，
於是爬落棵樹，
點知隻鬣狗係附近一直觀察佢，
一見佢落嚟就即刻衝左出嚟，
嚇到達叔快速爬返上棵樹。
⋯⋯⋯⋯
雪兒聽完後講。
「原來係咁～」
我望一望達叔，達叔坐係一邊，身上既衣服無穿無爛，只係左腳就無著鞋，腳板有少量既血跡。
「達叔，你左腳受左傷喎。」
達叔笑笑口咁講。
「哦⋯逃跑個陣甩左個鞋，所以跑個陣俾啲沙石整損左，無事既無事既，只係皮外傷，傷口已經合埋左既啦。」
「仲話無事，你已經痛到係咁出汗。」
我指住佢額頭上既汗珠。
達叔一邊fing手一邊講。
「真係無事，執返條命仔已經好好，多謝關心多謝關心。」
「嗱，俾返你。」
雪兒從旅行袋裡面攞出達叔隻左腳波鞋。
「多謝多謝。」
達叔即刻著返對鞋。
不過仲有個疑問，點解依個島會有鬣狗依種動物棲息，佢地唔係應該得非洲大陸先有既咩？
定係依個島係挨近非洲？定係有人將依種生物帶過嚟依個島？
天上既禿鷹群仍不斷咁鳴叫，但樹下面仍然無動靜，鬣狗已經死去，無再繼續微弱咁抽搐。
究竟係咩令到啲禿鷹亂咁飛？
突然樹邊出現六十幾隻鬣狗，佢地迅速咁跑過嚟，然後見到地上死去既同伴後，不斷用頭頂一頂個屍體，確認佢係唔係死左。
我抬頭望一望天上既禿鷹，佢地仲係盤旋大叫，我估就係佢地既叫聲吸引依班鬣狗過嚟，因為佢地兩個都鐘意食腐肉。
達叔細細聲咁講，害怕講的太大聲會俾鬣狗發現。
「東哥⋯依家點算啊⋯」
我望住下面個群鬣狗。
「只可以等佢地走，一隻受傷既都咁難對付，何況依到六十幾隻⋯」
所有鬣狗周圍聞一聞，然後全部都抬頭望住我地三個既方向，我地三個即刻嚇到出冷汗。
鬣狗見到我地三個後，確認我地係殺害佢既同伴，個樣開始變得凶狠起嚟，嘴裡不斷發出磨牙既聲音。
大鑊⋯俾佢地發現到⋯我地就唔洗旨意可以離開依到⋯
數隻鬣狗發狂咁對住我地吠叫，雪兒俾鬣狗既叫聲嚇到緊緊攬實我。
「大陸仔⋯點算啊⋯」
我用手摸雪兒個頭安撫佢。
「我地唔落佢，佢奈我地唔何。」
十幾分鐘後，依班鬣狗見我地無動靜，於是躺係地上，有啲碌嚟碌去好似R痕咁，有啲好似貓狗般舔身上既毛，但佢地既目光仍然注視著我地三個，留意我地三個既一舉一動。
依班鬣狗⋯
真係打算同我地玩持久戰⋯
咳咳！咳咳！
不遠處傳來聲音，打破沈默中既我地，我地三個即刻互望對方，而樹下既鬣狗們都抬頭望聲音個方向。
「東哥⋯乜嘢聲嚟⋯」
「好熟⋯好似係邊到聽過⋯⋯」
咳咳！咳咳！咳咳！
聲音愈嚟愈接近我地依邊。
所有鬣狗即刻起曬身，一直望住聲音個方向，頭壓得好低，挺起個臀部，好似預備開跑既姿勢。
boom！
草叢中跑出一隻十分強壯既野豬，見到成群既鬣狗仍然橫衝直撞過去，一嘢撞開幾隻鬣狗，頭也不回繼續往前狂奔。
依隻野豬比一開始我地係竹棚遇到個隻野住足足大成倍，佢個獠牙都比個隻長好多。
如果以前個隻叫野豬仔，依隻就一定係叫野豬王！
鬣狗們見到咁肥美既野豬，即刻奔跑追住隻野豬，將係樹上既我地三個忘記得一乾二淨，留低啱啱俾野豬撞到暈陀陀既鬣狗。
估唔到突然殺出嚟既野豬會成為我地既救星，但下面仲有幾隻俾野豬撞到暈陀陀既鬣狗，如果我地落去佢地咁啱清醒返，我地三個就肯定會成為佢地既晚餐。
「阿嫂，嗱嗱臨用箭射爆依幾隻鬣狗，我地就可以安全離開依到。」
「好！」
雪兒拉弓瞄準地上既鬣狗，我伸手阻止。
「咪住，唔好魯莽行事。」
達叔見我用手擋住雪兒視線。
「東哥，依家係好機會嚟！佢地清醒返就唔易對付！」
「大家諗下，隻野豬突然出現，仲要跑得咁急，見到咁多隻鬣狗都照衝照撞，咁肯定係有嘢逼使佢喪跑。」
達叔瞪大雙眼望住我講。
「咁即係⋯有其他猛獸⋯」
嗚！嗚！嗚！
草叢突然跑出數隻野狼，見到前面方向有幾隻鬣狗係到，即刻停低腳步，同鬣狗互相對視⋯⋯
待續