荒島日記（新手、後宮甜）（不定期更新）: 食花生

我去旅行袋摷返把弓箭出黎，然後同辣椒妹揮一揮手就走出去，不過辣椒妹一直望住五隻雞仔，完全無心情回應我。

原本今日有唔少女仔都會聚集係靠近營地既河邊捕魚，但依家全部都唔見曬，熱鬧既河區變返原本既平靜，隱約聽到青蛙們在共鳴。

發生乜嘢事？究竟班女走曬去邊？不過都好，起碼唔洗阻到我打獵。

「佢地係個度啊，快D去啦！」
營地個度走出兩個女仔，其中一個女仔拖住另外一個女仔走去河下游既方向。

究竟下游發生左D乜嘢事？搞到佢地趕住去睇？八卦既我都要去睇下。



走左十幾分鐘後，差唔多到下遊地方，隱約聽到人群既聲音，於是加快腳步行。

係下游方向見到十數少女、大姐圍住河邊觀看，眾人發出嘩嘩嘩的叫聲。

「哇！好勁啊！」

「乜嘢黎㗎？蛇黎㗎？」

「好man啊！」



「佢地竟然咁夠膽捉蛇黎食，俾著我就掉頭跑啦！」

「對比返大陸仔捉個五隻雞仔，睇黎雪兒好快就搬去其他男仔山洞度住。」

依班女⋯真係去到邊都可以比較⋯不過我都好好奇佢地究竟睇咁D咩睇到嘩嘩聲，於是我爬上係不遠處既樹上探出頭觀察。

河邊有五個人係度捕抓獵物，其中兩個女仔抓住粗樹枝，不停咁插入條河裡面，而另外兩個女仔，係俾佢地搞到混濁既河水度摸索，尋找佢地要搵既獵物。

「係邊？啱啱明明見到佢㗎？」


說話既係五人中唯一既男仔，肥豬劉。

肥豬劉赤裸住上半身，肥大既肚腩，比美微胸少女既肥仔波，呈現係我地既眼前。

佢伸出雙手，不停咁摸索河底，佢個身型，同佢咁遲鈍既動作，再加埋佢個囧樣，真係好似一個啱啱冬眠完既黑熊走去河邊度覓食。

「佢遊到你腳下面啊！」
其中一個肥豬劉既女伴指住另外一個女仔既腳下。

肥豬劉聽到後即刻轉身飛奔去指住個位女仔既腳下，然後一嘢跳入水度，好似個深水炸彈咁，bom！水花四濺，造成既波浪差D令佢既女伴企唔穩。

如果我係奧運跳水裁判，我會俾佢依個跳水動作十分！

「捉到啦！」
肥豬劉個頭浮出水面，然後好興奮咁大叫。



「好勁啊！」

「果然係咁多個男仔裡面，打獵最勁個位！」

「真係好羨慕佢地啊⋯」

班女大大聲你一句我一句，搞到肥豬劉開心到大笑，而我係樹上就比較好奇肥豬劉捉咁D咩。

肥豬劉企起身捉起條黑色繩狀既獵物，條獵物不停咁扭動身體，試圖擺脫肥豬劉隻手，濺起水花潑向周圍既人。

我望清楚返肥豬劉手上個條黑色獵物，唔係班女所講既蛇，而係成身都無鱗片既「河鰻」。

條河鰻不停咁掙扎，係咁搏命扭動身體，誓要擺脫肥豬劉，肥豬劉集中精神好用力咁捉實條河鰻。



依一場，會係肥豬劉同河鰻之間既決鬥，肥豬劉大叫幫拖，但河鰻實在太滑，佢D女伴無一個捉得實。

河鰻扭動住濕滑既身體，肥豬劉越來越捉唔實條鰻魚。

「啊！」
緊隨住肥豬劉既大嗌，河鰻擺脫左肥豬劉，跌入混濁既河水裡面。

肥豬劉同女伴即刻彎下身尋找條河鰻，但好可惜，條河鰻已經游走左，依一場精彩既捕獵表演係班女噓聲中結束。