荒島日記（新手、後宮甜）（不定期更新）: 教徒

望住高佬佳帶住MK傑走返去營地個邊，呼，終於趕走兩個麻煩友。

「好型啊！！幾下趕走佢兩個！」
辣椒妹笑住咁拍我膊頭。

「你少笑我一陣。」
睇黎係依度，我會成為依班男人既公敵，唉，要我一個對付佢地咁多個，點搞⋯

「做咩啊，笑一下你都嬲啊？」
辣椒妹見我面色唔好睇，以為我嬲咁。



「唔係啊，無事無事。」

辣椒妹把嘴貼近我耳邊。
「唔好嬲啦，最多我幫你出火啦。」

然後佢吹左我耳仔一下，再用佢既扦手觸碰我條褲，搞到我紅都面曬，依條女真係癲㗎！

我推開辣椒妹，辣椒妹係度掩住嘴笑，我回頭望一望山洞，見到雪兒仲係度諗山洞既擺設。
（好彩雪兒無轉個頭見到，唔係又呷醋既啦⋯）



雪兒思考完之後走出黎。
「大陸仔，係山洞我地訓邊啊？訓地下啊？地下咁污糟⋯」

我望一望山洞既地下，又係既，全部都係泥土，訓完成身都係泥土。

「唔洗驚，我出去搵D乾草鋪張床俾你地訓，就唔洗訓地下啦。」
我轉身想去搵乾草返黎，啱啱先趕走兩個蛋散，依家又黎一個⋯

「雪兒！你真係係度啊！」


前面有一男四女走過黎我地依邊，個男既好興奮咁揮手。

「雪兒，估唔到會係度見到你。」
說話既男仔係我地既師兄。

劉日生，花名叫肥豬劉，因為著衫打扮等鐘意既嘢都好非主流，學校既人見佢身型又有D肥，所以就叫佢做肥豬劉。
佢身高一米七八，同我一樣高，屋企有D錢，聽講佢有親戚係大陸做官。

平時學校既交流團佢都有跟住參加，聽講曾經係團度食過唔少女，所以今次佢見我地今次畢業郵輪旅行，畢業後既佢貼錢都要跟埋黎。

「嘩！辣椒妹！原來你都係度啊，記唔記得我啊？我係師兄劉日生啊！」
肥豬劉邊講邊用手指指住自己。

「肯定記得你啦，畢左業兩年都成日返黎學校個師兄啊嘛！」
辣椒妹無講錯，肥豬劉真係經常返黎學校，好似做義工咁，其實實質想食學校既師妹，經常返學校只係想接觸師妹們。



「係啊係啊，我見得閒就返母校，睇下有咩可以幫手囉。」
俾辣椒妹認得既肥豬劉，開心到見牙唔見眼。

「師兄，你搵我地有事？」
雪兒問肥豬劉。

「哈，其實咁既，我啱啱返到營地個邊個陣，聽到出面空地有女同學話見到你出現，所以就過黎睇下你囉。」
肥豬劉雙眼一直望住雪兒，表面扮到好淡定咁，但從佢兩隻手不停咁搓，我就知佢見到雪兒係有幾咁興奮。

（死狗公，分明就係想過黎溝雪兒。）

「你知唔知郵輪出左事之後，我幾咁擔心你既安危啊，我幾驚你真係出左事啊，好彩依家見到你無死到，而且精神唔錯，我真係好開心，睇黎我祈禱係有作用㗎，多謝你，耶穌！」
肥豬劉講完，便微笑咁望上天空。



（你個仆街啊！扮到好關心雪兒從而得到雪兒既歡心都算啦，依家仲要扮教徒黎呃蝦條！我最撚憎D假教徒各個星期日返教會溝女既啦！）

「哈⋯多謝師兄關心⋯」
面對肥豬劉，雪兒只好尷尬咁笑。