荒島日記（新手、後宮甜）（不定期更新）: 美食

「我唔肯定係唔係寄生蟲搞到咁。」
我托住腮講。

「大陸仔，佢條尾D毛濕濕地，會唔會係凍親啊？」
雪兒摸住大馬騮條尾講。

「咁要搵D可以驅蟲又可以驅寒既藥俾佢食先得。」

「咁仲等D咩啊，拿拿臨去搵草藥啦！」
雪兒拖住我，迫不及待想早D搵到藥。



「雪兒，都係明天先啦，仲有兩三個鐘就天黑，兩三個鐘未必搵到藥㗎。」
我拉返雪兒過黎。

「唉⋯咁唯有一天光就出發去搵啦⋯」
雪兒個樣好失望。

「大家，我地今晚係度住一晚！朝早我就去搵山草藥，醫返個大馬騮。」

「大佬！我反對！」


文健一個人舉高隻手大嗌。

「你又反對D咩啊？」
我顯得唔耐煩。

「我反對今晚係度住，D馬騮好危險，佢地可能隨時發癲，而且隻大馬騮同我地無關係，佢死佢既事。」
文健又一倫嘴講。

「哇！你個撲街咁撚衰既！」
辣椒妹指住文健講。



「禽獸！」
秋儀都指住文健。

「文健，估唔到你一D愛心都無！」
雪兒嬲到紅都面曬。

「佢同佢老豆一旅行就走去打獵，點撚會有愛心啊！」
辣椒妹恥笑地說。

「你⋯唉⋯我都係為大家著想⋯點解無人會理解我⋯」
文健講完坐左係地下。

我地係附近搵左個地方休息，班馬騮可能知道我地會救佢地既阿頭，於是不停送D香蕉過黎俾我地食，馬騮仔係度同秋儀玩埋一齊，有時騎上來福身上。



我地係旁邊起左個火堆後，班馬騮就再無走過黎，一直在遠處樹後面望，睇黎佢地真係好驚火，慢慢地，越來越多馬騮圍觀我地。

以前係動物園、馬騮山，我地都會遠遠咁圍觀馬騮，睇下佢地懶洋洋個樣，睇佢地玩耍個樣，依家，我地調返轉頭，變成佢地圍觀我地觀察我地。

「大⋯大佬⋯你確定今晚係度住⋯依家越來越多馬騮⋯佢地⋯」
文健好驚青咁。

「放心啦，佢地唔敢接近我地㗎，佢地真係好怕火，而且昨天燒過佢同伴屎忽，你認為個馬騮返黎唔會警告其他馬騮咩？」
我一邊講一邊攞香蕉出黎燒。

無辦法啦，班馬騮俾既香蕉都好生，唯有燒熟黎食，燒左一陣，香蕉既香味四溢周圍，好多馬騮行前幾步，雖然怕火，但D香蕉香氣實在令佢地控制唔到。

我攞起一條燒熟左既香蕉，然後一嘢拋去一邊，成班馬騮即刻衝過去香蕉既方向。

嗚！嗚！


班馬騮興奮到大叫，搶唔到既馬騮，走返到原本位置，望住我地燒咁既香蕉。

「你地等我一陣，唔好行開。」
講完我就走去班馬騮面前指手畫腳，班馬騮睇完即刻四散，原本有成差唔多過百隻馬騮，即刻唔見曬。

「大陸仔，你同班馬騮講過咩黎，點解全部唔見曬。」
雪兒抓住我問。

「無講嘢啊，佢地都聽唔明我地講咩。」
我講完，雪兒疑惑咁望我。

「成日懶神秘感，哼！」
雪兒繼續燒香蕉。

過左十分鐘左右，幾隻馬騮抱住香蕉返黎，然後又有幾隻馬騮抱住D樹枝返黎，睇黎D馬騮分唔清楚邊D係乾柴邊D係樹枝⋯



幾隻馬騮坐定定望住我，雪兒走黎我背後，然後好驚訝咁問我。
「佢地做咩會咁既？」

我笑左一笑後攬住雪兒條腰，然後輕輕係佢耳仔邊講。
「我諗住用美食征服佢地。」