荒島日記（新手、後宮甜）（不定期更新）: 賊仔

——荒島——



「哎呀！」

突然依個大嗌，將我從夢中驚醒，啊⋯我仲未訓夠㗎⋯我捽左幾下雙眼就坐左起身，然後慢慢行落竹棚下，見到三女圍埋一堆企左係度。

「咩事啊？一朝早大嗌，吵醒我，啊～」
我講完就打左個喊路。



「大陸仔，我地醃製D鹹魚唔見左好多條啊！」
雪兒指住擺鹹魚既地方。

我走過去望一望，係喔，好似唔見左最少三分一，原本夠我地食三個星期，依家睇黎只可以勉強食兩個星期。

「一定係有賊仔偷嘢啦！日防夜防，家賊難防，肯X定係佢。」
辣椒妹一邊講一邊轉過頭望文健，我地都望過去，文健摸住個肚挨係竹棚下面其中一個角落訓教，自從個日俾我打完，佢除左食飯個陣，就一直挨係依度。

「你個撲街！同我醒啊X你老母！」


辣椒妹對住文健咆哮。

「啊！咩事⋯咩事？」
文健俾辣椒妹既咆哮聲嚇醒。

「喂！將D鹹魚交出黎！」
辣椒妹用鼻哥窿望住文健。

「鹹⋯鹹魚？咩鹹魚？我⋯無鹹魚喔⋯啊？」
文健一邊摸住個心口一邊講，睇黎一訓醒，佢心口既痛楚即刻感受返。



「你唔好扮X曬嘢！D鹹魚仲唔係你偷既？」
辣椒妹想蹲低抓起文健，突然來福從外面走左返黎，個嘴叼住條鹹魚。

「來福，原來係你偷鹹魚食啊？」
秋儀上前摸來福個頭。

「我都話唔係我偷啦！」
文健繼續摸住心口講。

「sorry囉。」
辣椒妹講完就走去抓住來福，係咁扯來福塊面。
「來福，你做咩偷食鹹魚啊？信唔信我打你啊拿？」

來福好似聽得明辣椒妹講咩，呆左一下，口中既鹹魚跌左係地上，然後來福不停咁搖頭，細細聲咁叫左幾下。



「啊，你個來福偷嘢唔認，打到你認為止。」
辣椒妹舉起隻手，來福即刻跑到我腳下，然後不停咁用頭撞我，然後跑到竹棚外，對住我嗷嗚左一聲，好似想叫我跟住佢。

「來福好似想我地跟住佢啊，我地去睇下啊。」
我講完就跟住出去，三女都跟埋出黎，竹棚淨返文健一個留係度。

跟住來福走左兩分鐘，來福帶我地走到一棵樹下面，然後來福嗷嗚左一聲，將個頭埋係樹下，我地跑過去睇，發現樹下面有個洞，來福好緊張一直望住洞裡面。

「睇黎來福係抓到賊仔，不過要小心D！我唔知洞裡面係咩生物，我驚會係蛇。」

三女聽到即刻向後退，雪兒同秋儀攬埋一齊。

「吱吱⋯吱⋯吱⋯」
來福聽到聲音後原地跳左幾下，我一聽到聲音就知賊仔係老鼠黎，哎呀呀，咁X大膽走到我地竹棚偷鹹魚，依班米奇真係未死過。



「偷我地鹹魚既係老鼠黎。」

「可惡啊！竟然咁X夠膽偷我地既食物，依D老鼠真係未死過，我要煎佢地皮，拆佢地骨！」
辣椒妹邊講邊扯衫袖。

「幫我睇下附近仲有無窿，老鼠洞應該唔會得一個出口既。」

「搵到啦！大陸仔！依度都有個窿啊！」
三米外，雪兒好興奮咁一邊講一邊揮手示意。

「辣椒妹，你同雪兒來福幫我睇住個邊個窿啊，依度得我同秋儀搞得掂。」

「哦，好啊。」
辣椒妹拖住來福走去雪兒個邊。



「秋儀，搵枝又長又粗既樹枝俾我。」

秋儀無幾耐就搵到又長又粗既樹枝俾我，我即刻將個樹枝插入洞裡面，然後不停咁撩，希望可以嚇到D米奇跑出黎。

「點啊？有無老鼠跑出黎啊？」

「無啊！大陸仔！」

哎呀，睇黎D荒島D米奇同我屋企D米奇一樣咁X聰明，以前係深水埗住個陣，D米奇晚晚爬水渠上黎我廚房偷食。我要唸個方法逼到佢地出黎先得，我望一望周圍，唸左一唸。

哈，有辦法！