荒島日記（新手、後宮甜）（不定期更新）: 報恩

我閉氣閉到鼻血都出埋黎，死啦死啦⋯再咁落去⋯我今次真係會死㗎⋯我仲有好多嘢未做㗎⋯我仲未帶雪兒秋儀返香港㗎⋯⋯

「咕嚕咕嚕⋯」

自己離海面越來越遠，光源開始慢慢變暗，有好多魚係我身邊遊過，但我無心去欣賞，今次⋯唔通我真係要死係依度⋯

但一想起溫柔體貼既雪兒，可愛聽話既秋儀，唔得，我唔可以就咁死左去，我要生存落去！我要繼續保護我重要既人，我唔可以離佢地而去㗎！

我繼續好努力咁掙脫，但樹藤依然綁得好緊，我點樣都掙脫唔到。



依一刻，我感到前所未有既絕望⋯我放棄掙扎⋯我慢慢咁咪埋雙眼，迎接我既死亡⋯⋯

正當我想咪埋雙眼既時候，我遠遠地見到個黑影遊咁過黎，而且遊得越來越快⋯
唔會係鯊魚啊嘛？

我想起電影大白鯊既情節，再想起大衛劉臨死時俾鯊魚玩，然後慘死既畫面，我即刻毛管動。

我好驚，我好似條蟲咁不停咁蠕動，但我點樣蠕動都好，我都係繼續沉落去，死啦死啦⋯條鯊魚遊過黎要食我啦⋯俾我死左你先再食啊⋯我唔想俾你咬死啊⋯⋯

個黑影向住我依邊遊，而且遊得越來越快，我終於可以望清楚個黑影，遊咁過黎既黑影係⋯係海龜啊！



我心唸依隻海龜會唔會係我之前救個隻啊嘛，個隻海龜遊到我面前，轉左一圈，然後又遊到我背後，佢即刻咬住D樹藤，然後拖住我遊上水面，佢不停咁加速遊。
無幾秒，我上到水面，我即刻呼吸，再吸唔到氧氣就真係死啦。

「呵⋯呵⋯呵⋯」

我訓係海龜個背隻度，海龜繼續帶住我遊，一直遊去沙灘個方向。

終於，海龜帶我上到沙灘度，我終於死裡逃生！我唔洗死啦！我唔洗英年早逝啦！但係綁住我手腳上既樹藤都係整唔走⋯X你老母死文健，綁得咁X緊。



一想起文健個撲街，我就即刻望一望沙灘周圍，見唔到文健既蹤影，睇黎文健以為我死X咁，所以走返左去竹棚度，無等我死左先走。

我不停咁掙扎，好想掙脫手腳上既樹藤，但都係徒勞無功，我X，點樣先可以解脫到，正當我煩惱咁既時候，隻海龜似乎知道我煩惱咁D咩，佢即刻咬住我手上既樹藤，不過佢D動作好慢，咬左好幾分鐘先咬爛左少少。

我有少少感動。
「多謝你啊海龜。」

龜係一種好有靈性既動物，我估唔到曾經我救佢，今日佢會救返我轉頭，我不停咁講多謝，但隻海龜無理到我，繼續埋頭苦幹咁幫我咬斷D樹藤。

咬左將近十幾分鐘，海龜終於咬爛左我手上既樹藤，我即刻伸出雙手望一望，望住自己對手，雙手上留低一條條被緊緊綁住既紅色痕跡，我係褲袋摸兩摸，好彩把瑞士軍刀無跌到。

我即刻攞起軍刀切雙腳上既樹藤，切左幾下，D樹藤即刻斷左，我再切埋綁係身上既樹藤。

我攬住海龜，感謝海龜既救命之恩，攬左幾秒後，隻海龜就向後退，睇黎海龜要返返去大海裡面。



之後隻海龜慢慢咁爬返落海個邊，又好似上次咁不停轉頭望下我，爬幾下就望一望，我不停咁同隻海龜揮手講再見，無幾耐，佢個影子係海裡面消失左。

我想企起身走返去竹棚，但走兩步就雙腳麻痺到坐係沙灘，我唯有扭動一下身體，手腳綁得太耐，搞到血液唔循環，有少少麻痺既感覺。

過左一陣，D麻痺感終於無曬，我即刻往竹棚個方向跑。

跑到差唔多到竹棚，突然聽到竹棚個邊好吵好大聲，唔會係文健又搞D咩事啊嘛？我緊張到加速跑過去，終於跑到竹棚外，我躲係樹後面抖氣。




「呵⋯呵⋯呵⋯」
我一邊抖氣，一邊探出個頭望一望竹棚裡面既情況，我見到三女企左係度，而文健一個跪左係佢地面前⋯⋯