荒島日記（新手、後宮甜）（不定期更新）: 大收穫

我同雪兒著返好D衫褲，然後靜靜咁等大家返黎。前幾日雪兒冷淡咁對我，成日發脾氣，依家又變返當初咁小鳥依人對待我，如果無文健個撲街打到我咁傷，可能我同雪兒依家仲吵咁。

我偷偷地望住雪兒，原來雪兒一直用眼角望我，咬住下唇，塊面紅啵啵，然後淡淡咁笑一笑，我俾依種反應搞到神魂顛倒，好似愛神丘比特對住我黎個萬箭穿心。

愛戀沒經驗～今天初發現～
（雪兒，你要我上刀山定落油鑊，我都願意！）

「哎呀，打攪左你地依對狗男女添！」

我地兩個即刻望返出面，見到辣椒妹攬住個竹籠返黎，竹籠裡面有三隻蟹係度。



我：「掂喔，辣椒妹，竟然識用竹籠抓蟹喔！」

「哼，洗X你講，我不嬲都咁X掂，不嬲都咁X叻」
辣椒妹講完驕傲咁用手指公掃個鼻。

「你依家點啊？好返D未？」辣椒妹走過黎問侯幾句。

「好返好多啦，老虎都打死幾隻」我一邊講一邊扭動個肩膀，其實仲痛痛地，不過我忍住無表現出黎。



「哈哈，你咁X屎既，俾文健打X到重傷！」辣椒妹一邊笑一邊指住我。

我無回應到佢，只係尷尬咁摸一摸自己個頭。（文健個撲街咁陰險狡猾，以後一定要防範佢先得。）

「學東哥！你終於醒啦！」
我望一望秋儀，秋儀個妹釘企左係出面，見到我醒左，即刻放低個旅行袋，然後衝左過黎攬住，我摸摸秋儀個頭，突然唸起雪兒係我身邊，我即刻轉頭望雪兒。

雪兒無之前咁黑曬面，反而面上帶住微笑咁睇我地兩個，然後佢伸手摸一摸秋儀個頭。

「唔⋯個日⋯你真係嚇親我同雪兒啦⋯你暈左幾日⋯一直唔醒⋯我同雪兒日日以淚洗臉。」


秋儀一邊攬住我一邊抽泣咁講。

「我以後都唔再俾你地擔心啦，唔好喊啦」
我攬住雪兒同秋儀講，雪兒錫左我塊面一啖，然後講。
「只要你係我身邊，我就已經足夠。」

我即刻嘴左雪兒個嘴，雪兒都含情脈脈咁同我錫左幾下。

辣椒妹反左個白眼就行去一邊，秋儀走返去攞返個旅行袋。

「哇，大佬，你醒左啦？」
文健滿面笑容咁行返黎。
其他人一聽到文健把聲，即刻用一絲敵意既眼光望住文健。

「你去左咁X耐，搵到D咩食物啊？」


辣椒妹用鼻哥窿望住文健講。

文健即刻黑曬面無出聲，辣椒妹行到去望一望文健背後，發現空手而回，啪！辣椒妹大大力打左文健一巴。

「X你老母，你依個飯桶，乜X嘢獵物都抓唔到，又要打傷大陸仔。」
辣椒妹嬲霸霸咁講。

「算啦，已經過左去，唔好吵啦⋯」
我冷靜咁講出依句。

來福咬住隻大老鼠好悠閒咁行返黎，辣椒妹見到後即刻指住來福同文健講。
「你個廢柴，來福都搵X到獵物啊，你呢？」

我眼角望到文健仇視咁望住我，當我一轉面，文健又對返我笑笑口咁（你個撲街唔去拍戲真係浪費曬）



「各位！我今日大收穫啊！」
秋儀一邊講，一邊打開個旅行袋俾我地睇⋯⋯