荒島日記（新手、後宮甜）（不定期更新）: 上山

解決左隻野豬後，我休息左好幾日，等到心口無咁痛，我決定要再去山個邊進發，去個度睇一睇。

於是一朝早我攞左幾舊熟番薯，擺入旅行袋，然後偷偷地離開竹棚。

我過左條河，行過埋番薯地，我離座山越來越近，我亦都開始小心翼翼咁行，不知不覺，我已經到左山腳下面，如果要知道依座島既情況，就真係要上山睇一睇先知。

於是我好吃力咁上山，然後係D樹度攞刀劃一劃。如果時間充足，我可以學國內同胞寫個「王學東到處一遊」都無妨。

落曬D記號，咁樣我就可以沿返D記號，唔洗搞到係樹林迷路。



上山既沿途中見唔少兔仔同野雞，X啊，原來依度咁多動物，睇黎第日如果無曬食物，可以走黎依度打獵下，依度D食物咁豐富。

我依家無心情打獵，因為今日係要觀察依個島為主要目的，而且我地D豬肉仲有咁多，有排都食唔曬。

辛苦一輪，我終於走上左依座小山既山頂，依座山後面有座稍微大少少既山，後面都仲有幾座山係度，睇黎依個島真係好大，咪住⋯⋯後面座山竟然有⋯⋯瀑布⋯

瀑布下面有個湖，個湖俾一片大樹林包圍住，瀑布落去之處掛住左條彩虹，搞到好似人間仙境咁。我除即拍醒自己，唔好再係度欣賞風景，我望返沙灘個邊。

原來個沙灘勁長，我地係一邊既盡頭，而另一邊盡頭我地無去過，咦？竟然有個橙色救生艇係海邊漂浮，會唔會係有其他生還者。



我：努力不懈，愛便生還，我為你何況上刀山～
一路哼住fishman首歌一路行山，真係別有一番風味。

聽日睇黎要去沙灘另一邊盡頭睇下，可能真係有生還者。

我沿途行返去，跟住樹上留低既記號行，行到差唔多天黑，終於行返到竹棚個邊。
見到秋儀同雪兒靜靜咁係度整晚餐。我揮一揮手嗌返到黎，兩女即刻抬頭望，秋儀笑騎騎咁，而雪兒塊面黑過包青天（大佬啊，我又做錯左D咩啊⋯）

今日既晚餐都係燒野豬，雪兒平均分配曬D燒豬肉，而我個塊⋯
（喂⋯燶到咁點食啊，又黑又硬⋯⋯成舊木炭咁⋯）



我正想攞起身同雪兒訴苦，雪兒即刻抬起個頭俾左個兇狠既眼神我，鼻哥窿大到好似要噴煙出黎。我望到佢握起個拳頭，青筋都凸埋出黎。

我唯有忍住食落肚，我已經唔覺得自己係食咁舊豬肉，依種感覺同食木炭有咩分別⋯由頭苦到落尾⋯最後我都死死氣咁食曬。

途中我有D想反胃。
（眼淚～在心裏流）

雪兒見我食曬舊木炭咁既豬肉，隨即發出一聲：哼！
（真係寧得罪小人，莫得罪女人）

我：雪兒秋儀，我聽日想去沙灘另外一邊行下，睇下個度有D乜嘢。

雪兒冷冷說到：你鐘意點就點囉～
（真係好X憎人講依句說話）



秋儀：學東哥，我要陪你去！

我：去一去好快。

秋儀：唔得，我點都要去。

我：咁好啦

雪兒：我都要去！

我望去雪兒，雪兒哼一聲就望一邊無望我啦。（依條女，最近係唔係姨媽黎？）