[真人真事][校園][純愛]《總有一天，會再次遇見》: 第七十二章

跟住暑假就溫書啦

正如我之前所講,

準中七學生邊有得休息

都係同之前一樣,

逢星期一三五就去圖書館溫書





晞澄就更加勤力

有時喺星期二四六都會同呀穎再溫過

講真嗰句我真係好佩服佢

竟然可以咁樣谷法

大致上都冇乜特別,





講得大致上即係唔係全部啦

因為我好記得有一日發生咗啲特別事

話說嗰日好似係禮拜五嚟

咁就正常去溫書啦

平時去圖書館都係唔多人,





咁樣晞澄嗰日好似有啲野做

我就話不如做完先去圖書館啦,

咁佢都話冇問題喺圖書館等門口

所以嗰日就比平時遲咗去

點知一去到嗰陣就爆晒棚

結果我地要去麥當勞溫

原本話想去starbucks嘅,

不過最近我地嗰間starbucks都唔算近





再加上放緊暑假麥當勞應該唔會好嘈掛

結果當然係我地估錯啦

麥當勞成班細路仔喺度玩

唔使問都知好難專心

跟住我地又搬竇,

傾下傾下我地喺度諗緊邊個地方可以溫書之際

佢無啦啦講咗一句





晞澄:「你屋企有冇人

不如去你屋企溫啦 」

我:「冇呀 」

我唔記得咗嗰陣我雙親係返咗工定係去咗旅行

總之係是但一樣啦

你地可能會問點解雙親去咗旅行但係你喺香港嘅

事關我根本就唔鍾意去旅行

不過我就真係唔記得咗嗰陣屋企點解冇人





晞澄:「咁就得啦

let's go

我:「你上我屋企唔係咁好嘅 」

晞澄:「你會做得啲乜丫

要做一早做咗啦 」

估唔到我連一個色狼都冇資格做

其實都真係幾失敗





記得我之前講過其實我都唔係好鍾意有人上我屋企,

不過今次佢話到就算啦

唔通話唔俾咩

同埋嗰陣真係冇地方去溫書,

如果唔係夏天呢就可以喺公園溫嘅

但係咁鬼熱睬你都傻啦

都係返屋企著數啲

跟住佢終於上咗嚟我屋企

我:「你當係自己屋企咁啦

廁所喺呢度雪櫃喺嗰邊,

有咩需要自己做啦 」

晞澄:「可唔可以飲野呀 」

我:「打開雪櫃自己拎啦 」

晞澄:「唔該

嘩點解你咁多飲品嘅 」

我:「唔係我買

我呀媽最鍾意就係買飲品同埋零食,

你肚餓就自己拎 」

晞澄:「咁又唔係餓

只係有啲口渴啫

呢啲天氣飲凍野爽 」

跟住我就開咗冷氣,

因為我都驚佢熱

與其開咁多把風扇不如開冷氣算啦

晞澄:「唔好意思呀要你開冷氣添 」

我:「傻啦

熱就梗係開啦 」

其實我講笑,

講真嗰句,

就算係幾熱都好,

我都係習慣咗夜晚沖涼嗰陣先至去開冷氣

唔係今日係咁,

基本上廿幾年都係咁

今次破例係其實係因為晞澄啫

當然調返轉頭睇其實唔係有啲咩特別,

都只係為佢而提早開冷氣一件咁少嘅事

不過又有邊個男仔想自己鍾意嘅女仔辛苦先得架

用多啲電都係咁講架喇,

或者有啲男仔真係好白痴,

成日暗地裏為自己鍾意嘅女仔,

做啲微不足道嘅事,

仲要去掩飾呢個舉動唔係特登為咗佢

但係當見到個女仔有佢預期嘅反應嗰陣,

就會好開心

呢種開心唔係平時見到人地做衰野跟住喺度開懷大笑嗰種

反而係比較含蓄,

只係淡然一笑

不過就好似酒咁樣,

經過時間嘅洗禮愈浸愈醇,

即使過咗好多年,

但都仲會記得當初呢一個嘅自己

我就係呢一種白痴嘅例子.