[真人真事][校園][純愛]《總有一天，會再次遇見》: 第二十八章

放完復活節假,
意味著正式踏入學期尾
好快就去到中五
其實嗰陣中四就嚟完,
會考得返唔夠一年
但係唔知點解冇乜危機意識
成日都覺得,
唔驚啦使乜咁快啫
梗係玩多陣啦
完全唔知咩叫會考




當然啦,
我地學校原校升讀中六個分數要求唔高
我呢啲茂利,
恃住自己有啲啲小聰明,
就諗住考天才波
依家諗返起就得啖笑
嗰陣覺得自己好型架
你班傻仔就溫咁耐,
我就一兩日
梗係我化算啲啦




大個就覺得咁樣好傻仔
期間晞澄都有叫過一齊去溫書,
不過我冇理佢
跟住我知佢有同佢個好姊妹,
亦即係之前講嘅呀穎
兩個人一齊去圖書館溫書,
唔鍾意就唔鍾意架啦
點樣逼冇用
嗰陣我仲喺度諗,
仲有成年使乜咁急




當然我冇咁同佢地講啦,
只不過真係唔知點解要咁趕
我自己就鍾意慢慢嚟
衰啲講就屎唔瀨都唔屙
依家回望返轉頭,
當然我唔會後悔啦
因為如果你地記得嘅話,
我係喺大學識到我老婆
不過趕會考嗰陣真係好辛苦,
A level嗰陣就好啲
因為嗰陣知道有目標,
所以就終於識自動自覺
原來唔經唔覺都過咗咁耐
老土啲講句,
時間的確係覺得幾快




趁住依家冇乜特別野就俾我廢噏下啦,
世界真係轉緊,
由我識到我老婆開始,
到我後來生咗個女,
中間其實講緊係六七年嘅事
但係所有野都好似唔係過咗好耐,
當然中間發生嘅野今日就有啲模糊啦,
或者你地會問我,
中學時期嘅事更加耐,
咁你又記得
印象中我都有講過,
我唔係一個記性好好嘅人
的而且確成日唔記得野
不過因為中學時期嘅事真係太深刻,
或者去到第日冇牙嗰陣,




都仲成日擺喺口邊,
點解咁記得就唔想講喇
或者每個人都會有啲事,
係好少會同人講,
但係又唔會唔記得,
即使係好細微嘅野都會有概念
可能已經冰封咗喺個腦度啦.

去到學期尾,
考完大考之後,
差唔多可以放暑假
當然啦仲有啲活動要舉行
例如嗰啲乜鬼天才表演呢,
又或者請唔知邊個嚟學校做show
年年都係咁




當然嗰排就係舉行班際足球班際籃球嘅日子
喺度講下啦,
小弟都係一個鍾意踢波嘅傻仔
依家諗返起真係後悔,
嗰陣點會揀踢波架
你知啦,
打籃球先吸引到女
不知幾鬼型棍
每次見到嗰啲籃球佬射波嗰陣,
啲女就好似濕晒咁樣
係咁喺度大聲叫
踢波就唔得啦
啲女都唔識欣賞
甚至我應該去打排球
女仔最鍾意就係打排球




我真係好q蠢,
竟然揀錯運動嚟玩
不過嗰年我地就冇玩班際足球
因為有一隊中六好乸勁,
成班人一致同意中六先參加
佢地話唔打無把握嘅仗喎
咁冇所謂,
都係佢地話事
同埋對手真係好鬼勁,
落到去獻醜就唔好啦
晞澄都有問我地點解唔玩
佢覺得未打唔應該判死刑,
我心諗佢真係太天真
其實贏面有幾大,
有份踢嗰啲心知肚明啦
大家都係踢開波,
邊啲人有斤兩,邊啲人冇一眼就知
以我地成班目前嘅水準,
我幾有信心落到去都係去到四強左右
如果抽籤唔靚分分鐘第一場就輸
咁就無謂啦,
講得班際足球,
當然唔少得班際籃球啦
班際籃球我地班就有玩,
因為如果夾硬要講,
我地班個籃球勢力係比足球大
平時打波嘅人都係多過踢波,
再加上佢地話成間學校籃球個水平比較平均
值得一試喎,
我呢啲連企喺度射波都唔入嘅,
就梗係食花生啦