[愛情甜故] 因為一次睇到佢打飛機,所以我地變咗做炮友: 165.S350.面對你的真心,我沒法不心動<完>
(人稱：葉子朗視覺)
我一直企喺度聽方芷諾講，佢講咗咁多我都冇出聲講任何說話
面對佢嘅真心，我竟然會係有啲愕然、有啲慌張…
「你愛我？」我問道
「嗯！我愛你呀！」方芷諾嘅回答並冇絲毫嘅猶疑
方芷諾毫不猶疑嘅回答，瞬間就懾住我嘅心，眼前嘅女仔仍然如此令人心動
比佢懾住嘅心，令我完全冇辦法知道要作出咩回答
佢嘅笑容，一舉手一投足都令我動心
喺我腦海入面，幻想咗無數次佢會點樣同我表白，因為我相信佢一定會再同我講
但當事實出現嘅時候，我冇辦法好似預期中一樣，冷靜咁回答佢嘅心意
「你唔需要即刻比答案我㗎～」方芷諾見我冇出聲就講道，「我唔係要你即刻比答案我…」
「我知道…」我點頭
方芷諾耷低頭，有啲唔知點算咁企喺度
「我知道你嘅心意呀…」我望住佢講，「呢段時間入面我睇得好清楚，你嘅一舉一動，我都有睇喺眼裏面。」我伸手撥一撥頭髮，避開咗佢嘅視線，「就係因為全都睇喺眼中，所以先不停撩動住我嘅心呀…」
「你講咩呀…」方芷諾一臉愕然咁定睛望住我
「就係呀…我都中意你嘅意思…」我避開佢嘅視線
方芷諾臉上掛住一副難以置信嘅表情
「因為你嘅一舉一動呀…令我都心動到停唔到落嚟…」我話
「但你唔係話要放低我㗎咩…」佢好似就嚟喊咁樣
「嗯…一開始係囉…但係你一話要追番我，我又冇志氣咁又心動…」我朝佢行近咗一步，有啲唔好意思咁講
就係因為你呀方芷諾，繼續冷淡落去咪好囉！點解要番轉頭，要追番我呀？
點解要咁樣「窮追不捨」，搞到我又再次比你動搖咗…
明明你一直對我冷淡落去就好呀…點解總係要撩動我嘅心呢？
「所以你都中意我？」芷諾藏不住笑意，都係露出咗笑容
「嗯…」我撇開臉，臉頰都慢慢熱起嚟
佢有啲開心咁耷低咗頭，我喺個腦入面組織緊要點樣同佢講好
雖然有啲冇面…我講咗放手但我又心動…但感情嘅事，我冇得唔面對呀，所以我諗緊點同佢講好
我同方芷諾都靜咗落嚟…大家都唔知道要點開口一樣…
「方芷諾，我…」「噓～」
正當我打算認真咁同佢講，認真咁表白嘅時候，方芷諾伸手抵喺我唇前
「今次由我講啦～」佢微笑道
方芷諾就好似已經知道我要做咩一樣，搶先一步講出口，佢深呼吸，然後抬起頭望住我
我嘅心臟立即就噗噗噗噗咁快速跳動
「葉子朗，我中意你呀！」一雙清澈嘅眼睛直望住我，「可唔可以比多次機會我呀？我今次唔想再錯過你啦！」佢輕輕咬唇，然後伸出手，「可唔可以同我一齊呀？」
我成個人就凍結咗咁企喺原地，心動嘅節拍已經令我個人嘅思維都跟唔上啦
「我已經錯過咗你3次啦，已經唔想再錯過你啦…」方芷諾認真咁望住我
我仲未諗到要點樣答佢，佢眼見我冇出聲就更加緊張
喺微弱嘅街燈下，都睇到佢雙眼紅紅的，眼眶都開始濕潤起嚟
「呀！」
我行上前，一下子抱起咗佢，攬實咗佢大腿位置，佢因為我呢個舉動嚇咗一跳
「嚇親我啦…」佢雙手搭喺我博頭上面
「我都中意你…」我抬頭望佢
「真係？」佢雙眼即刻bling bling起嚟，「咁你可唔可以同我一齊…？」
「嗯…」我點頭，露出笑容，「同你一齊呀方芷諾～我都唔想…再錯過你啦…」
9年前，我喺呢個巴士站拒絕咗方芷諾，我同佢講我一世都唔會中意佢
9年後，我地再喺番呢個巴士站，我毫不猶疑咁心動，接受咗佢嘅表白
由我拒絕佢，到我毫不猶疑咁心動，好似只係一刻間嘅事嚟
我放低咗佢，佢企喺地上面
我耷低頭，額頭貼住佢，手繞到佢腰後，一把將佢攬到自己擁裏
「方芷諾…點解你嘅魅力咁強…總係撩動我嘅心？」我柔聲問道
「因為我同你係命中注定嘅一對呀～」佢微笑道
我想將我所有嘅溫柔都留比佢，以後嘅日子亦只留比佢
「你係我嘅世界入面最重要嘅一塊呀～」佢將雙手輕輕扶喺我腰旁，「冇咗你嘅話…我嘅世界會崩塌…」
「你都係最重要㗎…如果唔係點值得我追8年，點值得我回頭？」我笑一笑
「我以後都唔再放開你啦！」佢甜甜咁笑起嚟
「嗯！」我用力咁點頭，「一年愛上，八年等待，換嚟你一句「我愛你」，再苦都值番晒…」
我伸手抬起佢下巴，喺佢唇上落下一個溫柔嘅吻
緣份或者就係咁玄妙，係佢嘅話，走到去邊都好始終都係佢；唔係佢嘅話，留一秒都嫌太多
我地嘅緣份喺呢個巴士站開始，我地嘅愛情亦喺呢度開始
呢個夜晚，冇星星月亮去點綴，成件事好似顯得冇咁浪漫
但係喺葉子朗同方芷諾之間，唔需要有星星月亮，唔需要有咩氣氛
因為有對方就已經係最美最浪漫嘅事情…
＜全文完＞
呢個故事就嚟到呢度啦，多謝大家一直支持呢個故事
方芷諾同葉子朗嘅故事就到呢度啦～
多謝大家一直等更新同埋支持(90度鞠躬)
希望大家繼續支持我出嘅故啦～
有feedback嘅話可以喺下面回應link嗰度比comment喔👇
IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link