[愛情甜故] 因為一次睇到佢打飛機,所以我地變咗做炮友: 164.S349.他的目光,是我的勇氣來源

「你又會落嚟呢度嘅…？」我望住葉子朗，唔知要比咩反應好
「落嚟買啲嘢食番上去，屋企冇晒嘢食啦～」葉子朗笑道
「哦…」我微微點頭
「你照顧咗我成晚都好攰啦係咪呀？」葉子朗坐喺我隔離，將個膠袋放喺枱上
「唔緊要，最重要係你冇事啫～」我微笑道
佢竟然主動同我講嘢同埋關心我，或者真係我照顧咗佢成晚嘅回報嚟
「你病好就好啦，但呢幾日都食得清淡啲會好啲，發燒應該唔會咁快病好。」我話
「我好番好多㗎啦，用探熱針度過，都已經差唔多回復水平。」葉子朗話
「都係多啲休息，飲多啲水，番工嘅話，唔好逼得自己太緊呀～」我提醒道
「嗯，我會㗎啦～」葉子朗點點頭，「不過如果冇你照顧我，我諗我應該有排病…」


佢定睛望住我，我冇避開佢嘅視線，同佢對望
「你都食完啦，你洗唔洗番屋企呀？我送你番去啦～」葉子朗問道
「嗯，好呀…」我點頭
我跟喺佢身後行，佢伸手推門，我行喺佢後面
我地一齊踏出咗便利店，喺巴士站嘅後方經過…
呢一刻喺我心入面，突然有好多嘢想要問佢，想要同佢講
呢一刻我想同佢講我真係好中意佢…今晚呢個係一個機會嚟，上天比我嘅機會嚟…如果我浪費咗嘅話就唔知下次係幾時，仲有冇呢啲機會比我講㗎啦
我話咗順天意，呢個係咪就係天意，安排咗比我嘅路嚟？
葉子朗…我中意你…呢個係事實嚟…就算係你都唔可以否認呢個事實
如果我宜家就伸手捉住你，你會唔會甩開我…？


如果我宜家就攬住你，你會唔會推開我…？
葉子朗…就算我今日要好似喺9年前咁樣失敗，我都想問個清楚明白！
我毫不猶豫咁伸手捉住佢嘅衫角…佢…冇甩開我…！
「做咩呀？」葉子朗回頭望向我
「葉子朗…你係咪好唔中意我呀…」我冇半點遲疑就問出口，佢望住我，一副有口難言嘅表情，「因為…我之前咁對你…所以你唔中意我係唔係呀？」
佢嘅沉默對我嚟講，係一個打擊…喺佢嘅沉默之上再加一副有口難言嘅表情，更係一個重擊
但有啲嘢今日我唔同佢講，我怕我之後冇勇氣同佢講…
「我…」我眉頭一皺，深呼吸，鬆開咗捉住佢衫角嘅手
佢今次冇行開，而係企喺原地轉身望向我…葉子朗投向我嘅目光，令我喺心底間瞬間聚起勇氣
「我要追番你，並唔係講挽㗎…」我微微耷低咗頭，冇望住佢，唔敢同佢有目光嘅交雜，「唔係因為唔甘心，唔係因為唔捨得放手，更加唔係因為我扮要挽留…我要追番你，係一刻嘅決定，就係閂上日記嘅嗰一刻，因為…我真係好中意你…」


我輕輕握緊拳，焦躁嘅小手無處安放，唯有雙手放喺前面，兩手輕輕扣住
葉子朗今日就好似一個聆聽者，靜靜咁企喺度聽我講…
「我知道我宜家講咩都好，可能…都已經太遲啦…但係我真係冇辦法咩都唔講睇住你走！」我一下子抬頭望佢，但好快我又冇咗望佢嘅勇氣，耷低咗頭，「你比我嗰本日記，我睇咗好多次…每一次睇完之後，我都更加肯定要追番你嘅心！就算見住你對我冷淡、眼尾都唔望我一眼都唔緊要㗎…只要你知道我嘅心意就得㗎啦！」
想同佢講嘅嘢仲有好多，我稍稍偷瞄佢一眼，葉子朗仍然好專心咁聽我講，光係呢點，已經令我想即刻上前攬住佢
「但我發現要真係做到其實好難…你同我之間嗰道牆突然愈嚟愈高，令我好不安、好難受嘅同時，我唔知點做好…好似冇辦法可以接近你一樣…你又變番嗰陣拒絕我嘅嗰個葉子朗…」我微微搖頭，「但係我中意你嘅心冇減滅，因為我知道係你，你就係我命中注定嘅嗰個人…兜兜轉轉我都係番到嚟你嘅面前，都係一樣中意你…」
葉子朗雙手插咗喺衫袋入面，喺一瞬間，我見到佢嘅嘴角微微揚起咗一下，可能因為覺得我太傻啦…
「我對你嘅愛冇停止過，從來只係有加冇減…我諗就算你拒絕我100次，我都一樣會企喺你面前，話比你知我願意等你，我一直都咁中意你！」我抬起頭望佢，雙手都放咗喺身後，身子微微向前傾，故作輕鬆咁講，「就算去到下一世，我都會喺你身邊。如果一定要加個期限，咁我嘅期限就係等到月亮喺宇宙消失嘅嗰一日，我就唔再愛你啦…」
我會一直喺你身邊，就好似…月球從未離開地球一樣…
喺葉子朗嘅表情中夾雜咗少許愕然，就算唔明顯，我都可以睇得出
「我今日同你講咁多嘢…只係想喺某一日你會見到我嘅真心，知道身邊仲有我…咁樣就足夠啦～」我微笑道

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link