[愛情甜故] 因為一次睇到佢打飛機,所以我地變咗做炮友: 155.S340.天意難測

「你今日又會咁早起到身，出嚟食早餐呀？」我媽手上捧住一份早餐喺廚房行出嚟
「平時呢個時候你仲話要瞓多陣㗎…」爸爸跟喺媽媽後面，手上捧住兩份早餐出嚟
「今日早咗醒，又瞓唔番嘛…」我坐埋位，坐喺爸媽對面
「平時有冇買早餐番去食呀？」我媽拎住兩杯奶茶出嚟，我爸見到即刻就起身行過去媽媽面前
「你叫我拎咪得囉，陣間燙到呀…」我爸一臉擔心咁接過兩杯奶茶
「都只係兩步路啫…」我媽無奈咁笑一笑
我望住我爸媽嘅互動，不禁希望我嘅未來都係咁…
唔需要大富大貴，只需要有對方陪伴一生就足夠，邊度有對方嘅存在，邊度就係家
「女呀，今日有機會落大雨呀！記得帶遮。」我媽依舊嘅體貼入微
「如果唔係就變落湯雞咁番嚟㗎啦～」我爸笑道


「我知啦～」我微微一笑
我食完早餐就著鞋出門口番工
「唔知今日會唔會撞到葉子朗呢？」我喃喃自語道，不禁偷笑咗一下
今日都仲係天陰陰咁，睇嚟落雨嘅機會都好大，但好彩我有帶遮出嚟啫～
我行去地鐵站搭地鐵番工，搭地鐵番工已經係我嘅習慣嚟，每一日去到月台，都會慣性咁望一望，睇下葉子朗喺唔喺度
今日嘅我…都唔例外
我搭電梯落到月台，第一件事就係四周圍望下，尋找我心上人嘅身影
喺我望得入神嘅同時，我終於喺「人海」中搵到佢嘅身影
我嘅心情瞬間就激動起嚟，我假裝成偶遇咁行到佢身旁，用力壓抑住自己心底入面嘅小興奮，然後伸手輕輕拍佢博頭
「早晨！」我定睛望住佢


佢亦抬起頭望我，臉上冇絲毫嘅驚訝
「早晨。」仍然係同平時一樣平淡嘅招呼
但係唔緊要，我已經好滿足啦！可以朝早見到佢，仲可以互相打招呼講聲早晨，我已經好心滿意足啦～
打完招呼之後，我地冇再講嘢，亦冇眼神交流，佢耷低頭睇手機
我默默企喺佢身邊，心入面嘅小鹿都就嚟要衝出嚟
已經好耐冇試過帶住咁熱烈嘅感覺去中意一個人，應該話…喺葉子朗之後，就再冇一個咁嘅人出現
心入面嘅小鹿時刻提點住我葉子朗就喺隔離，令我時不時就偷瞄佢一眼
小鹿小鹿！你乖啲得唔得呀？
列車駛入月台，我同佢前後腳上車，行到去車廂嘅中間，佢就企喺我隔離
列車閂上車門，開車嗰下我企唔穩，又捉唔切個扶手


車向前開動，我個人企唔穩咁向後跌咗兩步
「呀！」我一行咗兩步之後，重心仲未番嚟，我成個人再向後跌
葉子朗眼尾瞄到我要跌，好迅速咁就伸手出嚟捉住我上臂，將我拉番去扶手前面
「唔該…」我感覺到自己臉頰都紅起嚟，即刻就同佢講唔該，然後捉住扶手企穩
「嗯。」葉子朗輕嗯咗一聲，若無其事咁鬆開手捉番住個扶手企
只係比佢輕輕扶咗一下，我塊面即刻就燙起嚟
我耷低頭，等臉上嘅紅霞散去
列車駛入中環站嘅月台，車門打開，我同葉子朗同時踏出車廂
行到去車站出口嗰陣，我見到有一大群人塞住咗喺出口
我跟喺葉子朗身後行上樓梯，行上咗幾級，總算可以望到外面，我見到外面白茫茫一片
「落咁大雨，點行呀？」我身後嘅一個年輕OL講
「我今日仲冇帶遮㗎！」
「都唔知場雨要落幾耐…」
「過雲雨嚟㗎啫，陣間細雨啲我地跑番去呀！」
喺我身邊嘅人都喺度講，成個出口逼滿晒上班族


好彩今日我有帶到遮出嚟，我即刻伸手入手袋入面搵把遮
「咦…？」我伸手入去個袋入面，但就摸唔到把遮
我打開手袋低頭搵，點解冇嘅？
我今日明明拎咗㗎…唔通係我今日出門口嗰陣將佢放喺喺鞋櫃上面，然後著完鞋之後冇拎到就出咗門口！？
方芷諾，點解你咁大意㗎！！！
正當我懊惱緊點算好嘅時候，我見到葉子朗喺斜孭袋入面拎咗把遮出嚟
「葉子朗…」我有啲唔好意思咁伸手捉佢衫角，佢瞬間就擰轉頭嚟望我
我冇出聲，因為我唔好意思話比佢知我冇帶遮，陣間佢以為我係特登咁點算，而且仲要呢啲咁低級嘅錯誤…！
「你冇帶遮？」葉子朗竟然主動開口問我
「嗯…」我冇啲尷尬咁點頭
「唉…」葉子朗細細聲咁嘆咗一口氣，然後有少許無奈咁講：「過嚟啦…我遮你番去…」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link