[愛情甜故] 因為一次睇到佢打飛機,所以我地變咗做炮友: 138.S323.回憶中的Memo紙

「如果有個人咁樣等我，我會好感動。」靜瑜笑一笑，「一個人咁長情好難得，佢願意等你，意無反顧咁等你，從來都冇講過要咩回報，除咗想你同佢一齊之外。」
我飲咗一啖Long Island，一臉迷惘
「葉子朗以前係仆街咗啲，同洛天恩一齊但又中意你，但係佢同洛天恩分咗手之後，唔係一心一意等你啦咩？」靜瑜繼續講，「一個人要默默守候唔容易㗎…你同周樂恆結咗婚之後，佢都係一直等你；你同周樂恆離咗婚，佢都係一直等你；就算係你去到歐洲，去到英國都好，佢都係一直喺度等你。你以為佢唔知道咁樣等落去其實未必有結果咩？但係佢都一直默默忍耐，默默等待，佢都毫無怨言。一個咁樣嘅男仔，就唔值得你回頭？」
「就算再值得又點？佢已經放低咗我啦…佢見到我已經當我係陌生人啦…再值得又點？一切都太遲啦已經…！」我眉頭微微皺起，然後露出笑容，「回頭又點…唔回頭又點？佢已經唔會再為我停落嚟啦…」
靜瑜突然間露出笑容
「我唔打算再講啲咩，只係想同你講，你宜家有兩條路揀：放低佢唔好回頭…」靜瑜舉起食指，講第一條路，然後再舉起中指，講第二個選擇，「又或者，你回頭去追番佢，你企番喺佢以前嘅位置，做佢嘅追求者。」
我內心好混亂，都唔知要揀咩先啱，點解我冇辦法決斷咁揀一？
「但係…」靜瑜放低手，「你喺作出你嘅選擇之前，拜託你諗清楚你嘅心意係點，諗清楚你係因為突然有人唔再等你所以唔甘心，定係因為你其實仲係中意佢，心上有佢嘅位置。你諗清楚…」
比着係之前嘅我，一定會毫不猶疑，諗都唔諗就答佢「放低唔回頭」，但我宜家竟然喺度猶疑不決，果斷唔到…
…


我一個人坐喺書枱前，望住放喺書櫃上嗰6本日記
我係唔甘心定係仲中意…？
啱啱番到嚟樓下嗰陣，靜瑜再三叮囑我：「諗清楚，先好再行動！」
但係諗咩清楚啫…我自己都一舊雲咁…
我往後仰，望住白色嘅天花板
「葉子朗…到或係一個點樣嘅存在呢？」我自言自語
由一個青春嘅小伙子到宜家著起西裝，176cm嘅身高，眼睛大大的，有神的，以前嘅斜瀏海都用hair spray gel起咗
每日孭住個斜孭袋番工，手上戴住隻手錶，以前嘅佢都唔會戴，話有嘢整住隻手會唔舒服
身上總係有沐浴露嘅香味，清爽嘅感覺從來都唔會缺席
「葉子朗…」我再次輕喚呢個名字


明明陌生，但又熟悉，自相矛盾…
我合埋雙眼，諗緊佢佔咗一個點樣嘅位置
佢離我好遠，同時亦好近…明明就係身邊，但卻捉不住…
我再次睜開眼，我自然咁企起身，行到書櫃前，然後伸手拎咗嗰6本用膠水痴埋一齊嘅日記落嚟
點解我會伸手拎佢落嚟？我都唔知…我淨係知喺我諗到呢個問題嗰下，我手上已經拎住咗本日記
「咔！」突然傳嚟嘅聲音嚇咗我一下
我望向地下，有張紙從日記入面跌咗出嚟
我蹲下來，然後拎埋張紙，睇真啲原來唔係紙，係一個信封嚟
但係呢個厚度…入面應該唔係得一張紙…直覺話我知入面一定有啲咩特別嘅嘢
我將本日記放喺嗰一層嘅邊位，然後打開咗個信封嚟睇


入面有一疊淺黃色、對摺咗嘅紙，另外有一張白色嘅紙
我小心翼翼咁將淺黃色、對摺起嚟嘅紙拎出嚟，放喺日記上面，我慢慢咁逐張打開嚟睇
「呢啲咪…！」紙入面嘅內容令我震驚
我即刻放低手上嗰張，然後將其他嘅紙都打開，點知，令我更加震驚
「佢一張都冇掉到…」我望住眼前呢疊紙，仍未可以平伏到我心底嗰種驚訝
呢啲紙係Memo紙，係以前上堂嗰陣，我地唔想比人知我地傾計同埋咁熟絡，所以我地會「傳紙仔」
嗯！我地係同桌，坐隔離，嗰陣仲要係拍枱坐，但都要「傳紙仔」
我寫完之後，就會將張紙對摺再對摺，變成一個小正方形，然後放去佢櫃桶入面，佢拎到之後就會打開，然後再寫，寫完又放番去我櫃桶
我以為呢啲紙仔都掉晒，原來佢一直都keep起咗，冇掉到，一直都有好好keep起佢地
我不禁笑咗一笑，世上邊有人會咁傻，連呢啲紙都留番低㗎？
我將啲紙仔放埋一邊，然後紙白色信紙拎出嚟…

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link