[愛情甜故] 因為一次睇到佢打飛機,所以我地變咗做炮友: 127.S312.欲言又止（下）

我見佢咁嘅樣，諗都冇諗就開口問
「冇…冇咩。」佢搖搖頭
「真係？」我再問
佢猶疑咗一陣之後點頭
我同佢靜咗一陣，然後又對望
「應該食得飯啦…我地落去啦…」周樂恆雙手插住褲袋企起身
「嗯，好呀～」我點點頭
成晚食飯都唔錯，好耐都冇喺佢屋企食過飯
食完飯，佢就話送我番去
「要唔要遊車河？」周樂恆問


「嗯，好呀～」我點頭
上咗車之後，佢揸車去到附近嘅海傍，然後佢落咗車
「出嚟。」佢幫我開咗車門，我行出車，然後行到佢身邊
佢背靠住欄杆，曲住手肘放喺上面作其中一個支撐點，望住一幢又一幢嘅高樓大廈
「好耐都冇試過同你單獨相處啦～」我企喺佢身邊講
「嗯…」佢只係輕輕嗯咗一聲
「你做咩呀？」我側側頭望佢，然後微微一笑，「你一定係有心事㗎係咪？根據我對你嘅了解。」
佢企好個人，然後輕輕一笑
「果然係最了解我嘅方芷諾呀…」佢講出呢句夾雜住無奈同少許開心嘅說話
「識你第幾年呀？」我笑一笑講


「嗯…」佢無力一笑，就足以證明佢有心事
「做咩呀？有咩事呀？」我望住佢，「今日全日都欲言又止咁樣，做咩事呀？」
周樂恆一聲不發，走到車後，企喺車尾箱前
佢一手推開車尾箱嘅蓋，然後彎下腰拎嘢
我見住佢親手抱起一大束玫瑰花走向我
「送比你…」佢走到我面前，將束花遞比我
「咁大束送比我？」我笑一笑，然後接過玫瑰花，「咁我就唔客氣收咗佢㗎啦～」
「嗯，反正都係送比你。」佢笑一笑
「等等先…做咩突然送花呀？」我望向佢，佢仍然係一副有口難言，支支吾吾嘅模樣
佢仲手入去胸口前嘅袋，然後拎咗一隻戒指出嚟


「呢隻咪係…」我望住佢拎喺手中嘅戒指，「你仲帶住喺你身邊呀？」
「嗯，一直都…將佢放喺心上…」佢笑一笑
呢個大概…就係佢將戒指放喺胸口袋想表達嘅原因…
「嗯…」我移開視線，轉身望向維多利亞港，「有時有啲事，過去咗就係過去咗，一直拎住，心都會攰，不如將佢放低。」
「唔係所有嘅事都可以咁樣輕易放低。我的確未放低，但你又何嘗唔係仲將佢放喺心上？」周樂恆反問
面對住佢嘅反問，我冇作出任何回答
「唔係所有嘅事，都係講話可以放低就真係放得低。」佢捉住我手臂
「將來嘅事仲係一個未知之數，唔放低當前同過去，點樣有餘力行將來嘅路？」我認真咁望住佢，「有太多嘅事令我後悔過啦…我地唔再係小朋友，唔再係當日仲喺中學教室入面嬉鬧嘅細路仔啦！過去嘅事，已經過去咗，將來係點樣，就隨遇而安啦。就算係要有一個新嘅開始，都已經變得唔再一樣啦…」
「你講得啱…」佢鬆開手，「我地都唔係當日嘅嗰個自己啦…已經過咗好幾年，大家都已經有所改變。」
「Alvin，我知道你帶我嚟呢度嘅目的係乜嘢，我知道㗎…唔好當我係傻瓜，咩都唔知啦…」我苦笑，「我地拍過拖，離過婚，一直以嚟大家都係朋友唔係幾好咩？我地係最了解彼此嘅人，但又何必用婚姻去困住我地二人？你真係仲愛咩？定係你只係唔甘心，我知道㗎…」
佢一聲不響，自己沉思着
「Alvin，我同你之間，應該放低㗎啦…」我拎咗佢手上拎住嘅戒指，然後放喺佢西裝外套嘅衫袋入面，「我同你嘅過去，已經成為咗歷史嘅一部分，最美好嘅回憶，唔需要經常拎出嚟，偶爾回味，已經係對呢份過去最好嘅敬重。」
「嗯，試下啦…」佢苦笑
「唔係試下，係要做到！」我話，佢只係默默點頭
我諗，佢明白㗎啦～



IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link