[愛情甜故] 因為一次睇到佢打飛機,所以我地變咗做炮友: 125.S310.尷尬升華

喺升降機門快要關上嘅時候，突然一下子開番，一個女仔跑入嚟
「唔好意思呀…」嗰個女仔喘住氣咁企喺門前，然後令成個氣氛變得更加尷尬
佢同葉子朗嘅反應一模一樣，怔了一怔，然後又收起愕然嘅表情行入升降機之中
門總算關上後，升降機開始上升
我、周樂恆、葉子朗…加上洛天恩，簡直係一個「完美」嘅四角關係組合
大家都冇講嘢，亦冇郁，只係沉浸喺尷尬嘅氣氛之中
葉子朗雙手插住褲袋，然後抬頭望住樓層顯示器
洛天恩雙手唔知放邊好，只好捉住手袋嘅手提位，然後耷低頭，避免同大家有目光嘅交流
周樂恆雙手交叉環抱喺胸前，一時望一望手錶，一時又耷低頭
如果大家都係陌生人，咁都冇咁尷尬


點知大家都係彼此嘅中學同學、前任、什至情敵…就係呢種微妙嘅關係，令氣氛顯得格外不協調
「咳…」企喺我身旁嘅周樂恆突然咳咗一聲
但係並冇成件事緩和，我都話咗，大廈應該維修一下部升降機，咁慢都未上到去…
「嗨…咁啱嘅…?」洛天恩竟然第一個打開話題，佢望一望葉子朗，然後用眼尾瞄一瞄我
「嗯，真係好啱，呢個時間都撞到…」我擠出一個笑容
「嗯…」葉子朗都點頭
成件事真係…好尷尬！想點呀…係咪要講句「得閒出嚟食飯？」
好快又再次回復當初嗰一種尷尬…
到咗22樓嗰陣，洛天恩出咗去，走嘅時候回頭望咗我地一眼，然後微微一笑
其實洛天恩笑起嚟…都幾好睇呀～點解當初會覺得佢咁差？


或者因為佢以前成日都針對住我，睇我唔順眼嘅同時，我又睇佢唔順眼啦～
到咗29樓嘅時候，升降機門打開，葉子朗喺行出去前，望咗我一眼
我耷低頭冇望佢，唔係唔想望佢，而係想要避開佢嘅眼神…
我最怕望到佢呢一種眼神，帶住惋惜、失望同內疚嘅眼神
每次望到佢呢個眼神，心中就會不由自主咁諗起以前嘅日子
以前嘅日子…係幾咁開心，幾咁自由呀…
真心去愛一個人真係好辛苦…個心真係好難受…
葉子朗，你係時候離開我個心㗎啦！你走啦好唔好？唔好再困住我喺呢回憶中啦！
「諗緊咩呀？」周樂恆喺我眼前啪咗一下手指
我望向佢，然後微微一笑


「冇事呀…」我搖搖頭
佢點頭一下，然後笑一笑
佢知道我心中係有事，但佢揀咗唔出聲…
到咗34樓，我地出去
經過茶水間嘅時候我就入咗去，周樂恆就繼續直行番去佢間房
我沖咗杯咖啡比佢，然後就番出去位做嘢
反正都冇嘢做住，要做嘅都做晒啦～偷偷地挽下手機先
以前班上嘅女班長po咗個新嘅ig post，係以前嗰一套校服，喺畢業嗰年，我地Last day嗰陣喺上面寫晒嘢，就好似係對對方嘅一個祝福咁
我套衫好似仲喺屋企…今晚番去搵下先～
…
唔覺唔覺就已經放lunch，我一個人諗緊今日晏就食咩好，wing佢地都忙住做嘢，睇嚟公司最近都變得好忙
點解周樂恆仲咁得閒？佢好似日日都冇嘢做咁，日日都係番工等放工咁樣，而其他人就忙到要死
唔好見我都好得閒咁，我都好忙㗎，啱啱出嚟之前，Qunnie姐先拎咗一大疊嘢比我做
食完個飯，仲要幫其他人買飯，然後就要番去做嘢
都係喺飯堂食飯算啦…


我喺飯堂搵咗個二人位坐低，自己一個人食飯真係第一次
入咗嚟之後，大家對我都好熱情，所以日日都有人同我一齊食lunch
「唔該，我想問有冇人㗎…？」有人喺我背後講
我一回頭望過去，係洛天恩，佢手上拎住個餐盤，睇嚟係因為周圍都冇位坐，咁啱我對面個位係空嘅我同佢對望咗兩秒
「呃…冇人㗎…」我移開我個餐盤，比多少少位佢
「周圍都冇位呀～」佢尷尬咁笑住坐低喺我對面
「嗯，今日特別多人…」我都笑一笑
然後我同佢靜咗落嚟，又尷尬啦…

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link