[愛情甜故] 因為一次睇到佢打飛機,所以我地變咗做炮友: 114.S257.前奏

佢好快咁從旁邊嘅門入咗lobby
我真係睇唔透佢諗緊乜嘢...點解會係咁樣...
我咩都冇做錯，但要比佢黑我面咁...
好啦...算...
我番到公司，就勁忙碌咁做嘢
忙到就嚟連去廁所嘅時間都冇
今日仲要冇同周樂恆一齊出門口，啱呀...仍然係冷戰緊呀...完全唔知做咩...
佢單方面覺得我仲中意葉子朗，然後就嬲咗我
重點係我咩都冇做過，然後就比佢嬲咗我，仲要冷戰咗成個星期啦差唔多
放工番到嚟就扮睇唔到我，我真心無奈


其實我都想搵個機會同佢傾下
但係佢就成日避開我，一番到嚟又話攰，又話要有嘢要做之類，自己就閂埋門匿喺書房度，連夜晚瞓都喺書房瞓
佢唔同我講嘢，喺公司都只係傾公事上嘅嘢
真係有名無實嘅夫妻...
等我生咗個B出嚟之後，或者會同佢離婚...
或者...呢D嘢都未知...
.......
咁樣就過咗一個月...
啱呀...我同佢仲冷戰緊呀!
唔得，我一定要搵個機會同佢傾下先得


今日開完會之後，周樂恆行出會議室，我跟喺佢後面
喺佢就嚟番到佢自己office嘅時候
「阿恆，我地係咪應該傾下呢?」
佢停下步伐，然後開門
「入嚟先講。」佢冇擰過嚟望我，直接行咗入去
佢閂埋門，叫我坐低
「想傾D乜?」佢問我，「我知你嚟緊呢個星期三要做body check，我抽到時間同你去。」
原來佢有mark低我幾時要做產檢
「我想話我地仲要冷戰到幾時?」我有D激動，「我根本就冇講過我中意葉子朗!係你自己諗多咗咋嘛!」
「嗯，咁你做咩同佢食飯?」佢一個懷疑嘅眼神


「我都話我係咁啱撞到佢囉!」我話，「你要我講幾多次啫?」
「佢一次又一次咁hurt你，然後又一次又一次咁搵番你，佢想點呀?你又想點呀?」佢好似質問緊我咁
「我想點!?」我個心開始嬲嬲地，「你做咩下下都要舊事從提啫!」
「你睇你下下都幫住葉子朗!」佢竟然話番我轉頭，「我都係講事實啫!」
「你次次淨係識提住葉子朗點樣點樣唔要我，咁你不如講下你自己點樣唔要我啦!」我反駁番佢
「我宜家咪要你囉!你仲想點呀!」「講到好似我逼緊你要咁!」
我一下子就企起身
「我真係同你愈嚟愈溝通唔到㗎喎!」佢企起身，有D發脾氣咁樣
「我嘅錯!?」我一咁樣講，個肚就好痛
我即刻用手㩒住個肚，皺起眉頭
BB feel到爸爸媽媽鬧交所以唔開心嗎?
「邊度痛呀?肚痛呀?坐低先坐低先...」本來發緊脾氣嘅周樂恆即刻緩和咗，伸手扶住我坐低
「冇事...」我擺擺手
「你有咗就唔好著高踭鞋啦...」佢同我講
「得啦。」我點點頭


我坐咗一陣，我就企番起身
「我出番去做嘢先。」我拉門出去
我聽到周樂恆無奈咁嘆咗口氣
我番咗出去，然後去咗個toilet
入咗廁格，突然聽到有開門聲
有人入咗嚟廁所
我平時就唔太留意嘅，不過今次留意到係因為佢講緊電話，仲要喊住咁講電話
而呢把聲嘅主人係洛天恩
點解又係你㗎!冤家路窄?
「點解你唔要我呀?過咗咁多年啦!你個心仲喺佢度!?」佢喊住咁講
如果我冇估錯，同洛天恩講緊電話嗰個人呢，應該就係葉子朗嘅~
「佢宜家都有咗啦!你點解仲要放個心喺佢度呀?我真係唔明佢有咩好。」
洛天恩口中嘅「佢」，應該就係講緊我，方芷諾
「我等咗你咁多年，但係你個心都喺佢度，連當初你話要同我分手都係因為佢，你以為我唔知道你係因為佢而要同我分手咩?」
我去完廁所，然後輕輕力放低個廁所板蓋，陣間先沖廁


「子朗呀!你點解要因為佢一棵樹而放棄成個森林呀!?我真係唔明呀!佢邊度好呀?我有邊度比唔上佢呀?喂?喂!」
睇嚟比人cut咗線
「葉子朗我憎死你呀!全個世界D男人都痴線呀!眼中淨係有嗰個方芷諾!好似淨係為佢生存咁!真係痴線㗎!」佢喺廁所大嗌
我㩒制沖廁，然後行出去洗手
佢一見到我即刻抹走眼淚，佢冇講嘢
我一推開門出去，佢就拉咗我去後樓梯...

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link