[愛情甜故] 因為一次睇到佢打飛機,所以我地變咗做炮友: 13.我和他(上)
「好啦好啦!唔好再喊啦!」我拍拍佢嘅博頭,「我陪你去食嘢啦!」
我拉住佢行,行到去附近嘅一間茶餐廳到坐低
「食咩呀?照舊?」一個中年男人拎住紙同筆行過嚟
「嗯!好呀~唔該!」我笑咗一笑
「你地好耐都冇嚟食嘢啦!」佢笑住咁講,然後就行開咗
周圍嘅餐枱,天花板上面嘅吊扇,同兩年前都冇太大嘅分別
以前仲同阿恆拍緊拖嗰陣,我地日日放學都會嚟呢度食嘢
我地嘅口味都差唔多,最中意食呢度嘅餐蛋麵,次次嚟親都食呢個,所以老闆一見我地嚟就知道我地食咩飲咩
坐緊嘅呢個位,都係以前成日坐
喺收銀處隔離,貪呢個位夠隱蔽,啱啱一齊嗰陣都唔想比人見到
好似番咗去以前咁呢～
「好似番咗去以前咁呢~」佢開口講
我呆咗一呆,佢竟然...
講咗我嘅...心底話
「做咩呀?講咗你嘅心底話出嚟呀?」佢自豪咁笑咗一笑
見到佢自豪嘅笑容,就諗起以前...
「同你心有靈犀,可係我最自豪嘅事呢!」佢捉住我隻手,露出咗自豪嘅笑容
「知你叻啦!」我甜甜的笑起嚟
「伸隻手出嚟呀!」佢突然講
「咪伸咗囉…」我無奈咁講
「咦…係喎...」佢好似傻瓜咁笑起嚟
佢從佢嘅褲袋中拎咗一樣嘢出嚟,套咗落我隻手度
「呢隻手鐲,你上次話好靚嘅~我偷偷地將佢買咗落嚟呀~」佢笑住咁講,然後指一指佢自己嘅手
佢隻手戴住咗另一隻,呢隻情侶手鐲我上次同佢行街嗰陣見個,但我唔捨得買
但佢竟然...
「噹...」
「發咩呆呀方芷諾...」佢將杯凍可力放喺我面前,將我從過去拉番嚟現實
「冇嘢...」我搖搖頭
「咚~」
放喺我隔離嘅手機顯示屏着咗,有人whatsapp我...