【愛情甜故】我同條女敦倫的日子: 脫單

過左唔知幾耐，唔知點解我整個人都有股暖意，而光線亦十分光猛，連我合埋眼都覺得光，

正因為咁令我想張開雙眼望一望外面嘅世界，我雙眼慢慢打開，視線慢慢由模糊變得清晰，原來係陽光，

呢一日天氣清涼，間中有幾個背心阿伯係正前方跑過、天橋上嘅車輛亦開始變得車水馬龍，

再望望地下，地下上有幾個啤酒罐，陣陣寒風吹過將幾片樹葉吹起左，而我就正挨住一個軟綿綿嘅肩膀，

我挨住肩膀之餘，仲有另一個人都挨住我個頭瞓左係度，佢嘅一隻手亦係我腰間攬實，



冇錯，呢個正係茹姐。

呢個時候我個頭唔小心郁左一郁，然後茹姐就醒左。

「阿豪你醒啦?」

「係啊，點解你會係海濱?」

「我見琴晚冇野做咪過黎行下，點知就見到你飲到醉晒，然後我咪陪你係度瞓左一晚。」



「你係咪傻嫁?依家天氣咁凍你陪我係度吹左一晚風?你自己返屋企瞓先嘛，唔洗理我呢個傻閪。」

我知佢陪我係海濱瞓左一晚後我感到有啲驚訝，亦好擔心佢個身子。

「你有冇邊度唔舒服有冇凍親?」

「冇啊，我乜事都冇，有你係度我就唔會凍，因為你係我嘅依靠。」

當茹姐講完後，我先記起佢係鐘意我，我心情再次變到消沉。



「你好鐘意唔鐘意鐘意我呢個廢柴做咩?我唔會俾到幸福你。」

「唔理你廢柴又好天才又好，總之我鐘意得你就只係會跟實你一個，我就係鐘意你，我想令你開心。」

「知唔知點解我琴晚唔返屋企都係度陪你一晚，因為我好掛住你，我想為你排解煩惱唔想你諗歪左做傻事。」

「仲有，我地一齊唔需要愛得轟轟烈烈，只需要好似我地以前咁開開心心出去玩、可以時刻留係你身邊我已經好幸福。」

「我根本連一個女仔都保護唔好，你同我一齊會連累左你。」

「唔會...唔會嫁，我會聽你話我會幾時都癡實你，唔會俾人傷害。」

「以前我講過唔會再俾你同阿欣有事，結果到你地有事嗰陣我乜都幫唔到手。」

「我都講過，係呢件事上你已經盡左力你好勇敢...總之以後嘅日子我話你得就得!」



「就係因為我違背左我以前講嘅承諾，我唔敢再拍拖，我好驚...我好驚再失去，我唔想再有女仔好似阿欣嘅下場咁，我覺得自己好大罪惡感。」

「唔單止係咁，我仲唔敢面對所有人，我覺得我都係殺人犯，係我眼白白睇住佢俾人殺死而且見死不救，我呢個殺人犯根本冇資格再抬起頭做人。」

「你係殺人犯咁我係乜?我只係一個收兵萬千同周圍撩仔嘅狗女，玩過唔少人感情仲要違背過唔少同佢地嘅承諾，最後仲俾人cut晒圖放上FB開埋樣，到今時今日我有冇抬唔起頭做人?」

茹姐之前只係同我講佢收兵，第一次聽佢原來仲俾人放埋上FB。

「而你依家竟然因為咁樣而抬唔起頭做人?我鐘意你唔係因為你靚仔、唔係因為你有錢、唔係因為甜言密語，而係你個心，你會有呢個心去幫我、去關心我同著緊我。」

「如今我真心真意去愛你，點解就唔俾我留係你身邊為你排憂解愁、點解就唔可以俾我一個依靠?我只係想同你一齊姐，你知唔知我等呢日向你表白已經等左好耐。」

「雖然我以前好狗女，但我已經冇再係咁，我同你一樣好努力咁改晒自己啲壞性格，為左你我會聽晒你話，你叫我做乜我都會做。」



「同埋阿欣都叫你保重，叫你個腦就唔好再為佢而轉，你如果再係日日咁愁為左佢只會違背佢嘅承諾，你唔係話唔鐘意違背承諾咩?狀且仲要係佢最後嘅遺願。」

茹姐講完一大番安慰嘅說話，我仍然寂靜一片，但我心情仿佛開明翻少少。

「係咪因為我個樣依家太樣衰你唔鐘意?呢樣你可以放心喎，等我留長頭髮後我一定會打扮得靚過之前。」

「定係...你根本唔鐘意我，對我一啲感覺都冇...?」

茹姐說罷，我就遞出一隻手俾佢。

「拖住我啦，我送你返屋企，我驚你盪失路。」

然後茹姐流露心感滿足嘅微笑，亦即刻拖住我，佢隻手十分嫩滑但就十分冰冷。

「嗯...好，我地返屋企。」



茹姐講得啱，我再日日為阿欣嘅死而愁都冇用，唔通繼續愁落去佢會復活咩，

況且阿欣佢生前同我講過要我照顧好茹姐，我一定唔可以有負佢所托，既然我依家同左茹姐一齊就一定要更用心保護佢唔俾佢再有事。